മോദിയും കാമറൂണും ജനപ്രതിനിധി സഭ സ്പീക്കര് ജോണ് ബെര്കോയും തെംസ് നദിക്കരയില്
ലണ്ടന്: ഭീകരതയ്ക്ക് എതിരെ ഐക്യരാഷ്ട്ര സഭയില് അന്താരാഷ്ട്ര തലത്തില് നിയമം കൊണ്ടുവരണമെന്ന് പ്രധാനമന്ത്രി നരേന്ദ്ര മോദി. ലണ്ടനില് ബ്രിട്ടീഷ് പാര്ലമെന്റിന്റെ സംയുക്ത സമ്മേളനത്തില് പ്രസംഗിക്കുകയായിരുന്നു അദ്ദേഹം. ഇതാദ്യമായാണ് ഒരു ഭാരത പ്രധാനമന്ത്രി ബ്രിട്ടീഷ് പാര്ലമെന്റില് പ്രസംഗിക്കുന്നത്. സമ്മേളനകാലമല്ലാതിരുന്നിട്ടും മോദിക്കു വേണ്ടി പ്രത്യേക സംയുക്ത സമ്മേളനം വിളിച്ചു ചേര്ക്കുകയായിരുന്നു.
ഭീകര സംഘടനകളെ തരംതിരിക്കുന്നതില് അര്ഥമില്ല. ഭീകരരെ ഒറ്റപ്പെടുത്താന് നാം കൂട്ടായി തീരുമാനിക്കണം. ഭീകരത കൊടികുത്തിവാഴുന്ന രാജ്യങ്ങളില് ഇതിനെതിരെ സാമൂഹ്യപ്രസ്ഥാനം രൂപം കൊള്ളണം. മതവും ഭീകരതയും തമ്മില് കൂട്ടിക്കുഴയ്ക്കരുത്. മോദി പറഞ്ഞു.
മേഖല സുരക്ഷിതമാകണം. ഇന്ത്യന് മഹാസമുദ്രത്തിലെ സമാധാന അന്തരീക്ഷമാണ് ഈ മേഖലയിലുള്ള രാജ്യങ്ങളുടെ വികസനത്തിനു വേണ്ടത്.
ഭാരതവും ബ്രിട്ടനും തമ്മിലുള്ള സഹകരണം കൂടുതല് ശക്തമാക്കണം. എല്ലാവര്ക്കും ഭവനം, എല്ലാവര്ക്കും കുടിവെള്ളം, എല്ലാവര്ക്കും വൈദ്യുതി, മികച്ച വഴികള്, റെയില്വേ സംവിധാനം, തുടങ്ങിയ വലിയ സ്വപ്നങ്ങളാണ് ഭാരതത്തിനുള്ളത്. ഇവ സാക്ഷാത്ക്കരിക്കുന്നതില് ബ്രിട്ടന് വലിയ പങ്കു വഹിക്കാനുണ്ട്. ഈ രംഗങ്ങളില് വലിയ നിക്ഷേ പ സാധ്യതയാണ് ബ്രിട്ടനുള്ളത്. മോദി പറഞ്ഞു. ഇതിന് ഉതകുന്ന അന്തരീക്ഷം തന്റെ സര്ക്കാര് സൃഷ്ടിച്ചുവരികയാണ്. സുതാര്യതയും ഉത്തരവാദിത്വബോധവും ലളിതമായ നടപടിക്രമങ്ങളും കൊണ്ടുവന്നിരിക്കുന്നു. തന്റെ സര്ക്കാരിന്റെ പ്രവര്ത്തനങ്ങള് വിശദീകരിച്ച് അദ്ദേഹം പറഞ്ഞു.
ഇന്ന് മോദിയുടെ സന്ദര്ശനം സമാപിക്കും. 12ന് എത്തിയ മോദിക്ക് അതിഗംഭീരമായ സ്വീകരണമാണ് ലഭിച്ചത്. ഒരു രാഷ്ട്രത്തലവന് നല്കുന്ന തരത്തിലുള്ള സ്വീകരണം. ബ്രിട്ടന്റെ പരമ്പരാഗതമായ എല്ലാവിധ ആഡംബരങ്ങളോടെയുമുള്ള സ്വീകരണം.
ആദ്യം ബ്രിട്ടനിലെ പഞ്ചാബി സമൂഹവുമായി ചര്ച്ച നടത്തിയ മോദി പിന്നീടാണ് പാര്ലമെന്റില് പ്രസംഗിച്ചത്. ബ്രിട്ടനിലെ വ്യവസായ ബിസിനസ് പ്രമുഖരുമായി കൂടിക്കാഴ്ച നടത്തിയ മോദി പാര്ലമെന്റ് സ്ട്രീറ്റിലെ ഗാന്ധിജിയുടെ പ്രതിമയെ വണങ്ങി. പ്രധാനമന്ത്രി ഡേവിഡ് കാമറൂണുമായി ഉഭയകക്ഷി ചര്ച്ചയും നടത്തി. യുഎന് രക്ഷാ സമതിയില് സ്ഥിരാംഗത്വമെന്ന ഭാരതത്തിന്റെ ആവശ്യത്തെ പിന്തുണച്ച ബ്രിട്ടന് ഭാരതത്തില് 900 കോടി പൗണ്ട് നിക്ഷേപിക്കുമെന്നും വ്യക്തമാക്കി. സിവില് ആവശ്യങ്ങള്ക്ക് ആണവോര്ജ്ജം ഉപയോഗിക്കാന് സഹകരിക്കാനുള്ള ആണവ കരാറില് ഇരുരാജ്യങ്ങളും ഒപ്പിട്ടു.
പിന്നീട് ബ്രിട്ടീഷ് പ്രധാനമന്ത്രി ഡേവിഡ് കാമറൂണ് തന്റെ വസതിയില് ഒരുക്കിയ സ്വകാര്യവിരുന്നിലും മോദി പങ്കെടുത്തു.
