ബെയ്റൂട്ട്: ലെബനന്റെ തലസ്ഥാനമായ ബെയ്റൂട്ടില് ഉണ്ടായ ഇരട്ട ചാവേര് സ്ഫോടനത്തില് 43 പേര് കൊല്ലപ്പെട്ടു. 240 പേര്ക്ക് പരിക്കേറ്റു. ഇതില് പലരുടെയും നില ഗുരുതരമാണ്. ബെയ്റൂട്ടിലെ തെക്കന് പ്രദേശമായ ബുര്ജ് അല് ബറാജ്നെഹിലാണ് സ്ഫോടനമുണ്ടായത്.
പ്രാദേശിക സമയം വൈകിട്ട് ആറോടെ സ്ഥലത്തെത്തിയ രണ്ട് ചാവേറുകള് പൊട്ടിത്തെറിക്കുകയായിരുന്നു. സംഭവത്തിന്റെ ഉത്തരവാദിത്വം ഏറ്റെടുത്ത് കൊണ്ട് ഇസ്ലാമിക് സ്റ്റേറ്റ് രംഗത്ത് വന്നിട്ടുണ്ട്. ലെബനന് ഭരണകൂടം ഇസ്ലാമിക് സ്റ്റേറ്റിന്റെ അവകാശവാദം സ്ഥിരീകരിച്ചിട്ടില്ല.
ഷിയ പള്ളിയിലും ഷോപ്പിംഗ് മാളിലുമാണ് സ്ഫോടനം നടന്നത്. ശരീരത്തില് ബെല്റ്റ് ബോംബ് ധരിച്ചെത്തിയ ചാവേറുകള് സ്വയം പൊട്ടിത്തെറിക്കുകയായിരുന്നു. ലെബനനില് കാല് നൂറ്റാണ്ടിനിടെയുണ്ടായ ഏറ്റവും ശക്തമായ സ്ഫോടനമാണ് വ്യാഴാഴ്ചയുണ്ടായത്.
അതേസമയം സ്ഫോടനത്തില് പരിക്കേറ്റ പലരുടെയും നില ഗുരുതരമാണെന്ന് ആശുപത്രി വൃത്തങ്ങള് അറിയിച്ചു. മരണസംഖ്യ ഇനിയും ഉയര്ന്നേക്കുമെന്നാണ് സൂചന.
