ആലപ്പുഴ: തദ്ദേശസ്വയംഭരണ സ്ഥാപനങ്ങളില്‍ പുതിയ അംഗങ്ങള്‍ സത്യപ്രതിജ്ഞ ചെയ്ത് ചുമതലയേറ്റു. ത്രിതലപഞ്ചായത്ത്, നഗരസഭാ വാര്‍ഡുകളില്‍നിന്ന് വിജയിച്ച ജില്ലയിലെ 1,551 ജനപ്രതിനിധികളാണ് സത്യപ്രതിജ്ഞ ചെയ്ത്. ഓരോ തദ്ദേശസ്ഥാപനത്തിലെയും മുതിര്‍ന്ന അംഗങ്ങളാണ് ആദ്യം സത്യപ്രതിജ്ഞ ചെയ്ത്. അംഗങ്ങളുടെ സത്യപ്രതിജ്ഞ പലയിടത്തും കൗതുകകരമായി. സഭാകമ്പം മൂലം പലര്‍ക്കും പ്രതിജ്ഞാ വാചകങ്ങള്‍ തെറ്റി. ചിലര്‍ക്ക് ശബ്ദം പോലും പുറത്തു വന്നില്ല. ഇടതുപക്ഷത്ത് നിന്ന് ജയിച്ചവരും പലയിടങ്ങളിലും ദൈവനാമത്തിലാണ് സത്യപ്രതിജ്ഞയെടുത്തത്. ജില്ലാ പഞ്ചായത്തില്‍ കളക്ടര്‍ എന്‍. പദ്മകുമാറും മറ്റിടങ്ങളില്‍ അതത് വരാണാധികാരികളും മുതിര്‍ന്ന അംഗത്തിന് സത്യപ്രതിജ്ഞാവാചകം ചൊല്ലിക്കൊടുത്തു. തുടര്‍ന്ന് മുതിര്‍ന്ന അംഗം സത്യവാചകം ചൊല്ലിക്കൊടുത്ത് മറ്റുള്ളവരുടെ സത്യപ്രതിജ്ഞാ ചടങ്ങുകള്‍ പൂര്‍ത്തിയാക്കി.
ജില്ലാ പഞ്ചായത്തില്‍ പുന്നപ്ര ഡിവിഷനില്‍നിന്ന് വിജയിച്ച സിപിഎം ജില്ലാ സെക്രട്ടേറിയറ്റംഗം ജി. വേണുഗോപാലാണ് ആദ്യം സത്യപ്രതിജ്ഞ ചെയ്ത് അധികാരമേററത്. ആലപ്പുഴ നഗരസഭയില്‍ പള്ളാത്തുരുത്തി വാര്‍ഡില്‍നിന്ന് വിജയിച്ച സിപിഎമ്മിലെ ഡി. ലക്ഷ്മണനും ആദ്യം സത്യപ്രതിജ്ഞ ചെയ്തു. ചെങ്ങന്നൂര്‍ നഗരസഭയില്‍ ടെമ്പിള്‍ വാര്‍ഡില്‍നിന്ന് വിജയിച്ച ബി.ജെ.പി. സ്ഥാനാര്‍ഥി ടി.ടി. ഭാര്‍ഗവിയാണ് ആദ്യം സത്യപ്രതിജ്ഞ ചെയ്തത്. ചേര്‍ത്തല നഗരസഭയില്‍ അംബേദ്കര്‍ (18) വാര്‍ഡില്‍നിന്ന് വിജയിച്ച സി.പി.എമ്മിലെ കെ. രത്‌നവല്ലി ആദ്യം സത്യപ്രതിജ്ഞ ചെയ്തു.
കായംകുളം നഗരസഭയില്‍ മുതിര്‍ന്ന അംഗമായ എ. ഹസന്‍ കോയയാണ് ആദ്യം സത്യപ്രതിജ്ഞ ചെയ്തത്. മാവേലിക്കര നഗരസഭയില്‍ എല്‍ഡിഎഫ് സ്വതന്ത്രനായിജയിച്ച പി.കെ. മഹേന്ദ്രന്‍ ആദ്യം സത്യപ്രതിജ്ഞയെടുത്തു.
പുതുതായി രൂപവത്കരിച്ച ഹരിപ്പാട് നഗരസഭയില്‍ നങ്ങ്യാര്‍കുളങ്ങര 18-ാം വാര്‍ഡില്‍നിന്ന് ജയിച്ച സുധടീച്ചര്‍ ആദ്യം സത്യപ്രതിജ്ഞ ചെയ്തു.
ജില്ലയിലെ 72 ഗ്രാമപ്പഞ്ചായത്തുകളില്‍ 71 ഇടങ്ങളില്‍ മാത്രനാണ് ഇന്നലെ പുതിയ ഭരണസമിതി അധികാരമേറ്റത്. ബുധനൂര്‍ ഗ്രാമപ്പഞ്ചായത്തില്‍ ഡിസംബര്‍ ഒന്നിനേ പുതിയ ഭരണസമിതി സത്യപ്രതിജ്ഞ ചെയ്ത് സ്ഥാനമേല്ക്കൂ. ജില്ലയിലെ 71 പഞ്ചായത്തുകളിലായി 1,155 ജനപ്രതിനിധികളും ആറുനഗരസഭകളിലായി 215 പേരും 12 ബ്ലോക്ക് പഞ്ചായത്തുകളിലായി 158 പേരുമാണ് സത്യപ്രതിജ്ഞ ചെയ്തത്. ജില്ലാപഞ്ചായത്തില്‍ 23 പേരും സത്യപ്രതിജ്ഞ ചെയ്തു. തദ്ദേശസ്ഥാപനങ്ങളിലെ പ്രസിഡന്റുമാരുടെയും വൈസ് പ്രസിഡന്റുമാരുടെയും തിരഞ്ഞെടുപ്പ് ഈ മാസം 18, 19 തീയ്യതികളില്‍ നടക്കും. നഗരസഭകളിലെ ചെയര്‍മാന്‍ തിരഞ്ഞെടുപ്പ് 18ന് രാവിലെ 11നും വൈസ്‌ചെയര്‍മാന്‍ തിരഞ്ഞെടുപ്പ് ഉച്ചയ്‌ക്കുശേഷം രണ്ടിനുമാണ്. ഗ്രാമപ്പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവിടങ്ങളിലെ പ്രസിഡന്റ് തിരഞ്ഞെടുപ്പ് 19നാണ്. അന്നുതന്നെ ഉച്ചയ്‌ക്ക് വൈസ് പ്രസിഡന്റുമാരെയും തിരഞ്ഞെടുക്കും.
