യാങ്കോണ്‍: മ്യാന്‍മറില്‍ ജനാധിപത്യ ഭരണത്തിന്റെ സാധ്യതകളിലേക്ക് വഴിതുറന്ന് പൊതുതെരഞ്ഞെടുപ്പ് ഫലത്തോട് സൈനിക നേതൃത്വത്തിന്റെ ക്രിയാത്മക പ്രതികരണം. തെരഞ്ഞെടുപ്പില്‍ ഭൂരിപക്ഷത്തോട് അടുത്ത ആങ് സാങ് സൂകിയുടെ പാര്‍ട്ടിയായ എന്‍എല്‍ഡിയുമായി കൂടിയാലോചനകള്‍ക്ക് തയ്യാറാണെന്ന് സൈനിക തലവന്‍ മിന്‍ ആങ് ഹ്ലെയിങ് വ്യക്തമാക്കി. വിജയത്തില്‍ സൂകിയെ അഭിനന്ദനമറിയിക്കാനും സൈന്യത്തിന്റെ ഔദ്യോഗിക ഫെയ്‌സ് ബുക്ക് പേജിലെ പോസ്റ്റില്‍ ഹ്ലെയിങ് മറന്നില്ല. പ്രസിഡന്റ് തെയിന്‍ സെന്നും സൂകിയെ അഭിനന്ദിച്ചു.
664 അംഗ പാര്‍ലമെന്റിലെ 25 ശതമാനം സീറ്റുകള്‍ സൈന്യത്തിനുവേണ്ടി മാറ്റിവയ്‌ക്കപ്പെട്ടവയാണ്. അവശേഷിച്ച 491 എണ്ണത്തിലേക്കാണ് വോട്ടെടുപ്പ് നടന്നത്. ഭൂരിപക്ഷത്തിന് 329 സീറ്റുകളിലെങ്കിലും ജയിക്കണം. ഫലം പ്രഖ്യാപിച്ചതില്‍ 256 സീറ്റുകള്‍ എന്‍എല്‍ഡി നേടിയിട്ടുണ്ട്. സൈന്യത്തിന്റെ പിന്തുണയുള്ള ഭരണകക്ഷിയായ യുഎസ്ഡിപിക്ക് 21 ഇടത്തേ ഇതുവരെ പ്രാതിനിധ്യം ഉറപ്പിക്കാനായിട്ടുള്ളു.
രണ്ടരപ്പതിറ്റാണ്ടായി മ്യാന്‍മറില്‍ സൈന്യവും അവരുടെ കൂട്ടുകക്ഷികളുമാണ് ഭരണം കൈയാളുന്നത്. 1990ലെ തെരഞ്ഞെടുപ്പില്‍ സൂകിയുടെ പാര്‍ട്ടി വിജയിച്ചിരുന്നെങ്കിലും സൈന്യം അംഗീകരിച്ചിരുന്നില്ല. 1989 മുതല്‍ 15 വര്‍ഷക്കാലം സൂകിയെ സൈന്യം വീട്ടുതടങ്കലില്‍വെക്കുകയുംചെയ്തു.
അതിനാല്‍ത്തന്നെ മ്യാന്‍മറി രാഷ്‌ട്രീയ സംതുലനത്തില്‍ മാറ്റം വരുത്തുന്നതാണ് ഇപ്പോഴത്തെ വോട്ടെടുപ്പ് ഫലമെന്നു വിലയിരുത്തപ്പെടുന്നു. സമ്പൂര്‍ണഫലം വന്നശേഷം സൂകിയുമായ കൂടിക്കാഴ്ച നടത്തുമെന്ന് സൈനികത്തലവന്‍ അറിയിച്ചിട്ടുണ്ട്. രാജ്യത്തിന്റെ ഭരണനേതൃത്വത്തെ നിശ്ചയിക്കാന്‍ സൈന്യവും രാഷ്‌ട്രീയ കക്ഷികളും അഭിപ്രായ സമന്വയത്തിലെത്തണമെന്നും ജനവിധി അംഗീകരിക്കണമെന്നും സൂകി അഭ്യര്‍ത്ഥിച്ചിരുന്നു.
