കോഴിക്കോട്: ബേപ്പൂര് മണ്ണ് ചുവപ്പല്ലെന്ന് പ്രഖ്യാപനമാണ് ബേപ്പൂരില് നിന്നാരംഭിച്ച വിജയാഹ്ലാദ റാലിയില് മുഴങ്ങിക്കേട്ടത്. സിപിഎം കേന്ദ്ര കമ്മിറ്റിയംഗത്തിന്റെ നാട്ടില് സ്ഥലം എംഎല്എ കൂടിയായ സഖാവിന്റെ കുതന്ത്രങ്ങള് മുഴുവന് പരാജയപ്പെടുത്തിയാണ് മൂന്നു ഡിവിഷനുകള് ബിജെപി പിടിച്ചെടുത്തത്. ബലിദാനികളുടെ ചോരവീണ് കുതിര്ന്ന മാറാടിന്റെ മണ്ണില് മതമൗലികവാദികളും മാര്ക്സിസ്റ്റുകളും ഒരിക്കല് കൂടി ഒരുമിച്ച് ചേര്ന്ന് ദേശീയ പ്രസ്ഥാനത്തെ തകര്ക്കാന് ശ്രമിച്ചപ്പോള് അതിനെതിരെ പോരാടി വിജയിച്ചതിന്റെ മധുരപ്രതികാരത്തിന്റെ ലഹരിയിലായിരുന്നു റാലിയില് പങ്കെടുത്ത ആയിരങ്ങള്.
അക്രമ രാഷ്ട്രീയത്തിന്റെ വക്താക്കള് കൊല ചെയ്ത മനോജിന്റെ ബലികുടീരത്തില് പുഷ്പാര്ച്ചന ചെയ്തുകൊണ്ടായിരുന്നു റാലിയുടെ തുടക്കം. ബേപ്പൂരില് നിന്ന് പ്രകടനമായി നടന്നു നീങ്ങിയ ആയിരങ്ങള്ക്ക് വഴിനീളെ ആവേശോജ്വല സ്വീകരണമാണ് ലഭിച്ചത്. വാദ്യമേളങ്ങളുടെ താളത്തിനൊപ്പിച്ച് ആഹ്ലാദനൃത്തം ചവിട്ടി നീങ്ങിയ പ്രകടനം വട്ടക്കിണറില് നിന്ന് മീഞ്ചന്തയിലെ പ്രകടനവുമായി ചേര്ന്ന് നഗരത്തിലേക്ക് വാഹനറാലിയായി നീങ്ങി. തുറന്ന വാഹനത്തില് കൗണ്സിലര്മാരായ ടി. അനില്കുമാര്, നമ്പിടി നാരായണന്, പൊന്നത്ത് ഷൈമ, എന്. സതീഷ്കുമാര് എന്നിവര് നീങ്ങി. തുറന്നവാഹനത്തിന് മുന്നിലും പിന്നിലുമായി നൂറുകണക്കിന് ഇരുചക്രവാഹനങ്ങളില് പ്രവര്ത്തകര് മുന്നോട്ടു നീങ്ങി.
കോഴിക്കോട് കോര്പ്പറേഷനില് ബിജെപി യുഗം ആരംഭിച്ചുവെന്ന സന്ദേശമുയര്ത്തിയാണ് പ്രകടനം നഗരത്തിലെത്തിയത്. ആവേശത്തിന്റെ പൂത്തിരികളുയര്ത്തിയ വന് പ്രകടനം മുതലക്കുളത്തെത്തുമ്പോള് ബിജെപി സംസ്ഥാന സെക്രട്ടറി വി. വി. രാജന്റെ പ്രസംഗം പകുതിയിലെത്തിയിരുന്നു. ഫൈനലിലേക്ക് നീങ്ങുന്ന ടീമായി തങ്ങള് മാറിയെന്ന വി.വി. രാജന്റെ പ്രഖ്യാപനത്തിനു ആവേശകരമായ പ്രതികരണമാണ് പ്രവര്ത്തകര് നല്കിയത്. നഗരം ഇന്നോളം ദര്ശിക്കാത്ത ആവേശം മുറ്റിയ ആഹ്ലാദപ്രകടനമാണ് നഗരത്തില് ഇന്നലെ നടന്നത്.
