കൊളംബോ: വെസ്റ്റിന്ഡീസിനെതിരെ സമ്പൂര്ണ ജയത്തിന് ശ്രീലങ്കയ്ക്ക് വേണ്ടത് 163 റണ്സ്. രണ്ടാം ട്വന്റി20യില് ആദ്യം ബാറ്റ് ചെയ്ത വിന്ഡീസ് ആറു വിക്കറ്റ് നഷ്ടത്തില് 162 റണ്സെടുത്തു. ടെസ്റ്റ്, ഏകദിന പരമ്പരകളില് ജയം നേടിയ ലങ്കയ്ക്ക് ജയിച്ചാല് ട്വന്റി20 പരമ്പരയും സ്വന്തമാക്കാം. ആദ്യ മത്സരം ലങ്ക ജയിച്ചിരുന്നു.
ടോസ് നേടി ബാറ്റിങ് തെരഞ്ഞെടുത്ത വിന്ഡീസിനെ കൂട്ടായ പ്രകടനങ്ങളാണ് ഭേദപ്പെട്ട സ്കോറിലേക്കു നയിച്ചത്. 22 പന്തില് ഒരു ഫോറും രണ്ട് സിക്സറുമടക്കം പുറത്താകാതെ 34 റണ്സെടുത്ത ദിനേശ് രാംദിനും, 25 പന്തില് ഒരു ഫോറും, മൂന്നു സിക്സറമടക്കം 34 റണ്സെടുത്ത ഓപ്പണര് ജോണ്സണ് ചാള്സും ടോപ് സ്കോറര്മാര്.
ഡ്വെയ്ന് ബ്രാവോ (31 പന്തില് 31, ഒരു സിക്സര്), ആന്ദ്രെ ഫ്ളെച്ചര് (21 പന്തില് 23, നാല് ഫോര്), ഡാരന് സമി (ഏഴു പന്തില് പുറത്താകാതെ 12, ഒരു ഫോര്) എന്നിവരും സംഭാവന നല്കി. ലസിത് മലിംഗ, മിലിന്ദ സിരിവര്ധനെ എന്നിവര് രണ്ടു വീതവും, ദുഷ്മന്ത ചമീര ഒന്നും വിക്കറ്റെടുത്തു.
