ലീഗല് സര്വ്വീസ് ദിനത്തിന്റെ ഭാഗമായി ദല്ഹിയില് സംഘടിപ്പിച്ച ചടങ്ങില് മികച്ച ജില്ലാ ലീഗല് സര്വ്വീസ് അതോറിറ്റികള്ക്കും വോളന്റിയര്മാര്ക്കുമുള്ള പുരസ്കാരം പ്രധാനമന്ത്രി നരേന്ദ്ര മോദി വിതരണം ചെയ്യുന്നു. കേന്ദ്ര നിയമമന്ത്രി സദാനന്ദ ഗൗഡ സമീപം
ന്യൂദല്ഹി: ലോക്അദാലത്തുകള് രാജ്യത്തെ പാവപ്പെട്ടവര്ക്ക് നീതി ലഭ്യമാക്കുമെന്ന് പ്രധാനമന്ത്രി നരേന്ദ്രമോദി പറഞ്ഞു. ദരിദ്രര്ക്ക് എങ്ങനെ നീതി ലഭ്യമാക്കും എന്ന വിഷയത്തില് നടക്കുന്ന ചര്ച്ചകള് കാലികപ്രസക്തമാണെന്നും പ്രധാനമന്ത്രി പറഞ്ഞു. ലീഗല് സര്വ്വീസ് ദിനത്തിന്റെ ഭാഗമായി നടന്ന സമ്മേളനത്തില് പ്രസംഗിക്കുകയായിരുന്നു നരേന്ദ്രമോദി.
ലോക്അദാലത്തുകള് നല്കുന്ന സേവനങ്ങളെപ്പറ്റി പൊതുജനങ്ങള്ക്ക് അവബോധം വളരെ കുറവാണ്. സബ്കാ സാധ് സബ്കാ വികാസ് (എല്ലാവര്ക്കും വികസനം) എന്നതിനൊപ്പം തന്നെ സബ്കാ ന്യായ്(എല്ലാവര്ക്കും നീതി) എന്നുകൂടി കൂട്ടിച്ചേര്ക്കേണ്ടതുണ്ട്. എല്ലാവര്ക്കും നീതി എന്ന ആശയത്തിനായി രാജ്യത്തെ നിയമ സര്വ്വകലാശാലകള് പഠനം നടത്തി വേണ്ട കണ്ടെത്തലുകളും ശുപാര്ശകളും നല്കണമെന്നും പ്രധാനമന്ത്രി നിര്ദ്ദേശിച്ചു. രാജ്യത്തെ നിയമസര്വ്വകലാശാലകള് അവിടങ്ങളിലെ വിദ്യാര്ത്ഥികള്ക്ക് രാജ്യമെങ്ങും നടക്കുന്ന ലോക്അദാലത്തുകളെപ്പറ്റി ഗവേഷണം നടത്താന് നിര്ദ്ദേശിക്കണം. അവര് അവരുടെ കണ്ടെത്തലുകള് റിപ്പോര്ട്ടായി അവതരിപ്പിക്കുകയും ചെയ്യണം.
വിദ്യാര്ത്ഥികളാണ് ലോക്അദാലത്തുകളെന്തെന്ന് ആദ്യം അറിയേണ്ടത്. സാധാരണജനങ്ങള്ക്ക് നേരെ അനീതി നേരിടേണ്ടിവരുന്നുണ്ട്. എന്നാല് അവരാകട്ടെ കോടതികളില് നിന്നും അകന്നുനില്ക്കാനും ആഗ്രഹിക്കുന്നു. ഇവിടെയാണ് ലോക്അദാലത്തുകളുടെ പ്രസക്തി.
രാജ്യത്താകമാനം 15 ലക്ഷം ലോക്അദാലത്തുകളാണ് നടക്കുന്നത്. ഇതുവഴി 8.5 കോടി പേര്ക്ക് നീതി നല്കുന്നതായും പ്രധാനമന്ത്രി പറഞ്ഞു. സൂപ്രീംകോടതി നിയുക്ത ചീഫ് ജസ്റ്റിസ് ടി.എസ്. താക്കൂര്, കേന്ദ്രനിയമമന്ത്രി സദാനന്ദഗൗഡ എന്നിവര് ചടങ്ങില് പങ്കെടുത്തു.
