കൊച്ചി: പെരുകിവരുന്ന വാഹനാപകടങ്ങള് കുറയ്ക്കാന് എല്ലാത്തരത്തിലുമുള്ള ബോധപൂര്വ്വമായ സമീപനം ആവശ്യമാണെന്നു ഗതാഗത മന്ത്രി തിരുവഞ്ചൂര് രാധാകൃഷ്ണന് പറഞ്ഞു. സംസ്ഥാന മോട്ടോര്വാഹന വകുപ്പ് തയാറാക്കിയ ഡ്രൈവിംഗ് സിമുലേറ്ററിന്റെ ഉദ്ഘാടനം കാക്കനാട് സിവില് സ്റ്റേഷന് അങ്കണത്തില് നിര്വഹിക്കുകയായിരുന്നു അദ്ദേഹം.
ഡ്രൈവിംഗ് പരിശീലനത്തിനായി ഓട്ടോമറ്റിക് സംവിധാനമാണ് ഇവിടെ ഒരുക്കിയിട്ടുള്ളത്. ട്രാന്സ്പോര്ട്ട് കമ്മീഷണര് ടോമിന് ജെ. തച്ചങ്കരി സ്വാഗതം ആശംസിച്ച ചടങ്ങില് ബെന്നി ബഹന്നാന് എംഎല്എ അധ്യക്ഷനായിരുന്നു. നമ്മുടെ നാട്ടില് വാഹനാപകടങ്ങള് ഇപ്പോള് വലിയ പ്രശ്നമായി മാറിയിരിക്കുകയാണ്.
രാജ്യത്തെ ശരാശരി നോക്കുമ്പോള് അപകടനിരക്ക് കുറവാണെങ്കിലും അതിന്റെ തിക്തഫലം ഭീകരമാണ്. നിരത്തിലെ 60 ശതമാനവും ഇരുചക്ര വാഹനങ്ങളാണ്. അപകടങ്ങളുടെ പകുതിയും ഇവര് വരുത്തിവയ്ക്കുന്നതാണ്. 150 കിലോമീറ്റര് വരെ വേഗത്തില് പായുന്ന ചെറുപ്പക്കാരെ അതില് നിന്നു പിന്തിരിപ്പിക്കാന് മാതാപിതാക്കളും തയാറാകണം. വേണ്ടത്ര റോഡില്ല എന്ന യാഥാര്ഥ്യം കാണേണ്ടിയിരിക്കുന്നു അദ്ദേഹം ചൂണ്ടിക്കാട്ടി. ട്രാന്സ്പോര്ട്ട് കമ്മീഷണര് ടോമിന് തച്ചങ്കരിയെ അദ്ദേഹം അഭിനന്ദിച്ചു. ഭാരത് പെട്രോളിയം കോര്പറേഷന്റെ സാമ്പത്തിക സഹായത്തോടെയാണു സിമുലേറ്റര് തയാറാക്കിയിട്ടുള്ളത്. സര്ക്കാരുമായി ചേര്ന്ന്ഡ്രൈവിംഗ് വൈഭവ കേന്ദ്രം സ്ഥാപിക്കുന്നതിന് കമ്പനി തയാറാണെന്ന് കമ്പനി എക്സിക്യൂട്ടീവ് ഡയറക്ടര് പ്രസാദ് പണിക്കര് അറിയിച്ചു. ചടങ്ങില് ജില്ല കളക്ടര് എംജി രാജമാണിക്യം, ജോയിന്റ് ട്രാന്സ്പോര്ട്ട് കമ്മീഷണര് പി. എ. സൈനുദീന്, ഡെപ്യൂട്ടി ട്രാന്സ്പോര്ട്ട് കമ്മീഷണര് കെ. ജി. സാമുവേല് എന്നിവര് പ്രസംഗിച്ചു. ആര് ടി ഒ കെ. എം. ഷാജി നന്ദി പറഞ്ഞു.
