എരുമേലി: പിന്നോക്ക സാമുദായക സംഘടനകളായ ചേരമര്‍-സാംബവ വിഭാഗത്തില്‍പ്പെട്ട ആദ്യകാല പാര്‍ട്ടി പ്രവര്‍ത്തകരെ സിപിഎം പുറത്താക്കി. സിപിഎമ്മിന് ഒരുകാലത്ത് ഏറെ സ്വാധീനമുണ്ടായിരുന്ന കനകപ്പലം- ശ്രീനിപുരം കോളനിയില്‍പ്പെട്ട നെടുംകാവുവയല്‍ സിപിഎം ബ്രാഞ്ച് സെക്രട്ടറി ചാലുങ്കല്‍ സജി, ഭാര്യ നിഷാ സജി, പാര്‍ട്ടിയുടെ സജീവ അംഗങ്ങളായിരുന്ന കാവുകാട്ട് വത്സമ്മ രാഘവന്‍, വളവനാട് ശശികുമാര്‍ എന്നിവരെയാണ് പാര്‍ട്ടി വിവിധ കാരണങ്ങള്‍ ചൂണ്ടിക്കാട്ടി പുറത്താക്കിയത്.
കനകപ്പലം കോളനി മേഖലയിലെ ആദ്യകാല സിപിഎം പാര്‍ട്ടി കുടുംബങ്ങളില്‍പ്പെട്ട പ്രവര്‍ത്തകരെ പുറത്താക്കിയ നടപടി സിപിഎമ്മിന് കനത്ത തിരിച്ചടിയാണുണ്ടാക്കിയിരിക്കുന്നത്. ത്രിതലപഞ്ചായത്ത് തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ത്ഥിയാക്കാമെന്ന് വാഗ്ദാനം നല്‍കി അവസാനം നിഷ്‌ക്കരുണം വെട്ടിനിരത്തിയതില്‍ പ്രതിഷേധിച്ചവരെയാണ് പാര്‍ട്ടി കോളനിയിലെ ചില നേതാക്കളുടെ ഒത്താശയോടെ പുറത്താക്കിയതെന്നും അണികള്‍ പറയുന്നു.
സിഎസ്ഡിഎസ് വിഭാഗത്തില്‍പ്പെട്ട പാര്‍ട്ടി പ്രവര്‍ത്തകരെ പുറത്താക്കിയതില്‍ സമുദായ സംഘടനയില്‍നിന്നും ശക്തമായ പ്രതിഷേധംകൂടി ഉയര്‍ന്നതോടെ സിപിഎം കടുത്ത പ്രതിസന്ധിയിലാക്കിയിരിക്കുകയാണ്. കണ്ണൂരിലെ ഗുരുനിന്ദപ്രശ്‌നത്തെ തുടര്‍ന്ന് എസ്എന്‍ഡിപി നടത്തിയ പ്രതിഷേധത്തില്‍ പങ്കെടുത്ത കനകപ്പലം കോളനിയിലെ നിരവധി പാര്‍ട്ടിപ്രവര്‍ത്തകരെ പുറത്താക്കാനുള്ള നീക്കം നടക്കുന്നതിനിടെയാണ് സിഎസ്ഡിഎസ് വിഭാഗത്തിലെ നാലുപേരെ സിപിഎം പുറത്താക്കിയിരിക്കുന്നത്.
കനകപ്പലത്ത് സിപിഎമ്മില്‍നിന്നും പുറത്താക്കിയ നെടുങ്കാവുവയല്‍ സജിയുടെ ഭാര്യ നിഷ സജിയെ ബിജെപി ശ്രീനിപുരം സ്ഥാനാര്‍ത്ഥിയായി രംഗത്തിറക്കിയതും സിപിഎമ്മിന് കനത്ത തിരിച്ചടിയാണുണ്ടാക്കിയിരിക്കുന്നത്. സിഎസ്ഡിഎസ് സമുദായ സംഘടനാ പ്രവര്‍ത്തനം നടത്തിയതിന്റെ പേരില്‍ പുറത്താക്കിയ പാര്‍ട്ടി പ്രവര്‍ത്തകര്‍ ബിജെപി അടക്കമുള്ള രാഷ്‌ട്രീയ പാര്‍ട്ടികള്‍ക്ക് പിന്തുണ അറിയിച്ചതും സിപിഎമ്മിന് വലിയ പ്രതിസന്ധിയാണുണ്ടാക്കിയിരിക്കുന്നത്.
കനകപ്പലം കോളനിയില്‍ പിന്നോക്കക്കാരുടെ വികസനത്തിനായി ലഭിച്ച ലക്ഷങ്ങള്‍ ചെലവഴിച്ചതില്‍ സിപിഎം നേതാക്കള്‍ കാട്ടിയ അഴിമതി അന്വേഷിക്കണമെന്നാണ് കോളനി നിവാസികള്‍ ആവശ്യപ്പെടുന്നത്.
