കൊച്ചി: യുഡിഎഫിനെയും എല്ഡിഎഫിനെയും ഭീതിയിലാക്കി തദ്ദേശ തെരഞ്ഞെടുപ്പ് പ്രചാരണരംഗത്ത് ബിജെപി സ്ഥാനാര്ഥികളുടെ മുന്നേറ്റം. ഏറെ നേരത്തെ പ്രചാരണം ആരംഭിച്ചതും സ്ഥിരതയോടെ മുന്നോട്ടു കൊണ്ടുപോകുന്നതും ബിജെപി സ്ഥാനാര്ഥികള്ക്ക് അട്ടിമറി ജയ പ്രതീക്ഷ നല്കുന്നു. ഇരു മുന്നണികളിലെയും വിമത ശല്യവും വിവിധ സാമുദായിക സംഘടനകള് തങ്ങള്ക്കു നല്കുന്ന പിന്തുണയും ബിജെപി സ്ഥാനാര്ഥികളെ ശക്തമായ നിലയിലെത്തിച്ചിരിക്കുന്നു. വേറിട്ട പ്രചാരണ ശൈലിയും വരും ദിവസങ്ങളില് ഉന്നത നേതാക്കളുടെ സാന്നിധ്യവും തെരഞ്ഞെടുപ്പില് ഗംഭീര പ്രകടനം കാഴ്ചവയ്ക്കാന് സഹായിക്കുമെന്ന പ്രത്യാശയിലാണ് ബിജെപി സ്ഥാനാര്ഥികള്.
ചിട്ടയായ പ്രവര്ത്തനമാണ് ഒരു മാസത്തിലേറെയായി 37-ാം ഡിവിഷന് ഇടപ്പള്ളിയിലെ ബി.ജെ.പി. സ്ഥാനാര്ഥി കെ. എസ്. സുരേഷ്കുമാര് നടത്തിവരുന്നത്. മൂന്നാംവട്ട പ്രചാരണം തുടരുകയാണ്. പദയാത്രയും കണ്വെന്ഷനും കുടുംബയോഗങ്ങളുമൊക്കെ ചേര്ന്നുള്ളതാണ് പ്രചാരണം. യുഡിഎഫിന് റിബല് സ്ഥാനാര്ഥിയുണ്ടെന്നത് സുരേഷ്കുമാറിന്റെ പ്രതീക്ഷകള്ക്ക് കൂടുതല് കരുത്തേകുന്നു. ശക്തമായ ത്രിതോണമത്സരമാണ് ഇടപ്പള്ളിയില്. നാളെ ബിജെപി സംസ്ഥാന വൈസ് പ്രസിഡന്റ് എം.ടി. രമേശ്, സുരേഷ്കുമാറിന്റെ പ്രചാരണത്തിനായി എത്തുന്നുണ്ട്. വൈകിട്ട് ആറിന് ദേവന്കുളങ്ങരയില് രമേശ് പ്രസംഗിക്കും. ഒന്നിന് പദയാത്രയില് പാര്ട്ടി സംസ്ഥാന ജനറല് സെക്രട്ടറി എ. എന്. രാധാകൃഷ്ണന് പങ്കെടുക്കും. രണ്ടിന് വൈകുന്നേരം നാലിന് റോഡ് ഷോയും സംഘടിപ്പിച്ചിട്ടുണ്ട്.
53-ാം ഡിവിഷന് പൊന്നുരുന്നിയിലെ ബി.ജെ.പി. സ്ഥാനാര്ഥി സജി എസ്. വോട്ടര്മാരെ കഴിയുന്നത്ര തവണ നേരിട്ടു കാണുന്നു. മൂന്നാംവട്ട പ്രചാരണത്തിന്റെ അവസാന ഘട്ടത്തിലാണ് സജി. വോട്ടര്മാരുടെ പ്രതികരണത്തില് തികഞ്ഞ വിജയ പ്രതീക്ഷയിലാണ് സ്ഥാനാര്ഥി. വനിതകളുടെ സ്ക്വാഡ് സജിക്കുവേണ്ടി പ്രചാരണ രംഗത്തുണ്ട്. വാഹന റാലി ഉള്പ്പെടെയുള്ള പ്രചാരണപരിപാടികള് അടുത്ത ദിവസങ്ങളിലായി നടക്കും. മൂന്നാംവട്ട പ്രചാരണം തുടരുന്നു 43-ാം ഡിവിഷന് പാലാരിവട്ടത്തെ ബിജെപി സ്ഥാനാര്ഥി ഗിരിജാ രവി സാമൂഹ്യ സേവന രംഗത്തെ പാരമ്പര്യം തുണയ്ക്കുമെന്ന പ്രതീക്ഷയിലാണ്. ചാരിറ്റബിള് ട്രസ്റ്റ് ഗുരുദേവ സത്സംഗം പ്രവര്ത്തകയായ ഗിരിജ രവി വോട്ടര്മാരെ മുഖാമുഖം കണ്ട് വോട്ടുറപ്പാക്കുന്നു. വ്യക്തിപരവും കുടുംബപരവും സാമൂഹികവുമായ ക്ഷേമവും ഉന്നതിയും ഉറപ്പാക്കുകയാണ് ലക്ഷ്യമെന്ന് ഗിരിജ രവി വോട്ടര്മാരോട് വിശദീകരിക്കുന്നു.
വിവിധ സമുദായ സംഘടനകളുമായി അടുപ്പം പുലര്ത്തിക്കൊണ്ടാണ് 39-ാം ഡിവിഷന് കറുകപ്പള്ളിയിലെ ബിജെപി സ്ഥാനാര്ഥി സജിനി രവികുമാറിന്റെ മൂന്നാംഘട്ട പ്രചാരണം അന്ത്യത്തോടടുക്കുന്നത്. സ്ക്വാഡ് പ്രവര്ത്തനങ്ങളും മുറയ്ക്കു നടക്കുന്നു. ഞായറാഴ്ച പ്രചാരണത്തിന്റെ ഭാഗമായി ബൈക്ക് റാലി സംഘടിപ്പിച്ചിട്ടുണ്ട്. മാലിന്യം, വെള്ളക്കെട്ട് തുടങ്ങിയ പ്രശ്നങ്ങള് ഉയര്ത്തിക്കാട്ടിയാണ് സജിനിയുടെ പ്രചാരണം. ഒ. രാജഗോപാല് ഇവിടെ പ്രസംഗിക്കാനെത്തുന്നുണ്ട്. എസ്എന്ഡിപി പിന്തുണയാണ് 41-ാം ഡിവിഷന് പാടിവട്ടത്ത് ബിജെപിയുടെ അനില സുരേന്ദ്രന്റെ സ്ഥാനാര്ഥിത്വത്തെ ശ്രദ്ധേയമാക്കുന്നത്. എസ്എന്ഡിപിയിലെ സജീവ പ്രവര്ത്തകയായ അനില നേരിട്ടുള്ള ജനസമ്പര്ക്കത്തിലൂടെ വോട്ട് ഉറപ്പാക്കുന്നു. വളരെ പ്രതീക്ഷാജനകമാണ് ജനങ്ങളില്നിന്നുള്ള പ്രതികരണമെന്ന് അനില പറയുന്നു.
സിപിഎം റിബല് സ്ഥാനാര്ഥിയുടെ സാന്നിധ്യംകൊണ്ട് ശ്രദ്ധേയമായ 50-ാം ഡിവിഷന്-ചമ്പക്കരയില് ബിജെപി സ്ഥാനാര്ഥി സാഖില് ആര്-നു ഏറ്റവും ഗുണം ചെയ്യുന്ന ഘടകവും അതുതന്നെ. മൂന്നാംഘട്ട പ്രചാരണത്തിലാണ് സാഖില്. കണ്വെന്ഷനും സ്ക്വാഡ് പ്രവര്ത്തനവും പദയാത്രയുമൊക്കെയായാണ് സാഖിലിന്റെ പ്രചാരണം മുന്നേറുന്നത്.
40-ാം ഡിവിഷന് മാമംഗലത്തെ ബിജെപി സ്ഥാനാര്ഥി വിനു കെ. എമ്മും തികഞ്ഞ ജയ പ്രതീക്ഷയിലാണ്. മാറ്റം വേണമെന്ന ആഗ്രഹം വോട്ടര്മാരില് പ്രകടമാണെന്ന് വിനു പറയുന്നു. വിനുവിന്റെ പ്രചരണാര്ഥം ഞായറാഴ്ച പദയാത്ര നടക്കും.
