ആലുവ: ലക്ഷക്കണക്കിന് രൂപ കോഴ വാങ്ങി സംസ്ഥാന പൊതുമേഖല സ്ഥാപനമായ കാംകോയില് അനധികൃത നിയമനത്തിന് നീക്കം നടക്കുന്നതായി സംയുക്ത തൊഴിലാളി യൂണിയനുകള് ആരോപിച്ചു.
ഒരാളില്നിന്നും 25 ലക്ഷം രൂപ വരെ കോഴ വാങ്ങി അഞ്ച് അസി. മാനേജര്മാരെ നിയമിക്കാനാണ് നീക്കം നടക്കുന്നതെന്ന് കാംകോ എംപ്ളോയീസ് ഫെഡറേഷന് (എഐടിയുസി), കാംകോ എംപ്ളോയീസ് യൂണിയന് (സിഐടിയു), കാംകോ എംപ്ളോയീസ് സെന്റര് (യുടിയുസി) എന്നീ സംഘടനകള് ആരോപിച്ചു. മാസങ്ങള്ക്ക് മുമ്പ് സമാനമായ രീതിയില് നാല് അസിസ്റ്റന്റ് മാനേജര്മാരെ നിയമിക്കാന് നടത്തിയ നീക്കത്തിനെതിരെ യൂണിയനുകള് കോടതിയെ സമീപിച്ചതിനാല് ലക്ഷ്യം നടന്നില്ല. തൊട്ടുമുമ്പ് ഏഴ് പേരെ കോഴവാങ്ങി നിയമിക്കുകയും ചെയ്തു. പ്രമോഷന് അര്ഹരായ നിരവധി പേര് കമ്പനിയില് ജോലി ചെയ്യുമ്പോള് പുറത്തുനിന്ന് ആളെ നിയമിക്കുന്നതിന് പിന്നില് അഴിമതി മാത്രമാണ് ലക്ഷ്യമെന്നാണ് ആരോപണം.
മൂന്ന് പതിറ്റാണ്ടിലേറെയായി മികച്ച ലാഭത്തില് പ്രവര്ത്തിക്കുന്ന കാംകോ മാനേജ്മെന്റിന്റെ പിടിപ്പുകേട് മൂലം പ്രതിസന്ധിയിലേക്ക് നീങ്ങുകയാണ്. അഴിമതിയും പിടിപ്പുകേടും പിന്വാതില് നിയമനവും മൂലം ലാഭം നാമമാത്രമായി ചുരുങ്ങി. മാര്ക്കറ്റിംഗ് വിഭാഗത്തിന്റെ വീഴ്ച്ചമൂലം വിദേശ ഓര്ഡറുകള് നഷ്ടമായി. കോടിക്കണക്കിന് രൂപ ഡീലര്മാരില് നിന്നും പിരിഞ്ഞുകിട്ടാനുണ്ട്. പുതിയ യൂണിറ്റുകള് തുടങ്ങുന്നതിനും ഓഫീസുകള് നവീകരിക്കുന്നതിനും ആഡംബര വാഹനങ്ങള് വാങ്ങുന്നതിനുമെല്ലാമാണ് മാനേജ്മെന്റിന് താത്പര്യം. മാള യൂണിറ്റില് നല്ല നിലയില് പ്രവര്ത്തിക്കുന്ന ടില്ലര് നിര്മ്മാണം പത്ത് കോടി രൂപ ചെലവില് കണ്ണൂരിലേക്ക് മാറ്റാന് നീക്കം നടക്കുന്നതും ഇതിന്റെ ഭാഗമാണ്.
നാല് യൂണിറ്റുകളുള്ള സ്ഥാപനത്തില് സ്ഥിരം എംഡിയില്ലാത്തതും ദൈനംദിന പ്രവര്ത്തനങ്ങളെ ബാധിക്കുകയാണ്. കരാര് കാലാവധി മൂന്ന് വര്ഷം പിന്നിട്ടിട്ടും തൊഴിലാളികളുടെ ശമ്പള വര്ദ്ധനവ് നടപ്പാക്കിയിട്ടില്ല. സ്ഥാപനത്തെ മികച്ച നിലയിലാക്കാന് മാനേജ്മെന്റ് തയ്യാറായില്ലെങ്കില് തൊഴിലാളികള് സമരം ആരംഭിക്കുമെന്നും യൂണിയനുകള് അറിയിച്ചു.
