മാഡ്രിഡ്: സ്പാനിഷ് ലീഗില് സെല്റ്റ ഡി വിഗോ തകര്പ്പന് വിജയവുമായി രണ്ടാം സ്ഥാനത്തേക്കുയര്ന്നു. ഞായറാഴ്ച നടന്ന എവേ മത്സരത്തില് ഒന്നിനെതിരെ രണ്ട് ഗോളുകള്ക്ക് സെല്റ്റ വിയ്യാറയലിനെ തകര്ത്തു. സെല്റ്റക്ക് വേണ്ടി 41-ാം മിനിറ്റില് ഫാബിയന് ഒറെല്ലയും 90-ാം മിനിറ്റില് അഗുഡോ ഡുറാനും ലക്ഷ്യം കണ്ടപ്പോള് വിയ്യാറയലിന്റെ ആശ്വാസഗോള് 67-ാം മിനിറ്റില് ഡെനിസ് സുവാരസ് നേടി.
47-ാം മിനിറ്റില് വിയ്യാറായലിന്റെ എറിക് ബെയ്ലി ചുവപ്പുകാര്ഡ് കണ്ട് പുറത്തുപോയശേഷം പത്തുപേരുമായി കളിക്കേണ്ടിവന്നതും അവര്ക്ക് തിരിച്ചടിയായി. വിജയത്തോടെ 8 കളികളില് നിന്ന് 18 പോയിന്റുമായി റയല് മാഡ്രിഡിന് പിന്നില് രണ്ടാം സ്ഥാനത്തേക്കുയര്ന്നു. റയലിനും 18 പോയിന്റാണുള്ളതെങ്കിലും ഗോള് ആവറേജിലാണ് അവര് മുന്നിലെത്തിയത്. മൂന്നാം സ്ഥാനത്തുള്ള ബാഴ്സലോണക്കും 18 പോയിന്റ്.
മറ്റൊരു എവേ മത്സരത്തില് അത്ലറ്റികോ മാഡ്രിഡ് 2-0ന് റയല് സോസിഡാഡിനെ കീഴടക്കി. 9-ാം മിനിറ്റില് അന്റോണിയോ ഗ്രിസ്മാനും ഇഞ്ചുറി സമയത്ത് ഫെരേര കരാസ്കോയും അത്ലറ്റികോയുടെ ഗോളുകള് നേടി. 16 പോയിന്റുമായി അത്ലറ്റികോ നാലാമതാണ്.
മറ്റൊരു മത്സരത്തില് ഗറ്റാഫെ മറുപടിയില്ലാത്ത നാല് ഗോളുകള്ക്ക് ലാസ് പല്മാസിനെ തകര്ത്തപ്പോള് ഡിപോര്ട്ടീവോ-അത്ലറ്റിക് ബില്ബാവോ കളി ഗോള്രഹിത സമനിലയില് കലാശിച്ചു.
