അമ്പലപ്പുഴ: പത്തുവര്‍ഷം മുമ്പ് നിര്‍മ്മാണം പൂര്‍ത്തിയാക്കിയ ഗ്ലൂക്കോസ് അമിന്‍ പ്ലാന്റിന്റെ പ്രവര്‍ത്തനം സര്‍ക്കാര്‍ അട്ടിമറിച്ചു. കഴിഞ്ഞ എല്‍ഡിഎഫ് സര്‍ക്കാരിന്റെ കാലത്ത് ഏഴരക്കോടി രൂപ അനുവദിച്ച് അന്ന് മന്ത്രിയായിരുന്ന ജി. സുധാകരന്റെ അദ്ധ്യക്ഷതയില്‍ ഫിഷറീസ് മന്ത്രി എസ്. ശര്‍മ്മയാണ് പ്ലാന്റ് ഉദ്ഘാടനം ചെയ്തത്.
എന്നാല്‍ പിന്നീട് സര്‍ക്കാരും മത്സ്യഫെഡ് ചെയര്‍മാനും മാറുകയും പകരം വന്ന ചെയര്‍മാന്‍ പ്ലാന്റിന്റെ പ്രവര്‍ത്തനം അട്ടിമറിക്കുകയുമായിരുന്നു. ചെമ്മീന്‍തോടില്‍ നിന്നും കൈറ്റോണ്‍ ടാബ്ലറ്റ്, ഗ്ലൂക്കോസ് അമീന്‍ ടാബ്ലറ്റ് എന്നിവ ഉത്പാദിപ്പിക്കാനും അതുവഴി നാല്പതോളം പേര്‍ക്ക് തൊഴിലവസരങ്ങള്‍ സൃഷ്ടിക്കാനുമായിരുന്നു പ്ലാന്റിന്റെ ലക്ഷ്യം.
അധികാരമേറ്റ കോണ്‍ഗ്രസുകാര്‍ ഇതിന്റെ കെട്ടിടം സംരക്ഷിക്കാന്‍ ചില ഉദ്യോഗസ്ഥരെ നിയമിച്ചതല്ലാതെ ഒന്നും ചെയ്തില്ല. ഇതോടൊപ്പം ഇതിനെതിരെ പ്രതികരിക്കേണ്ട സിപിഎം. സിപിഐ തുടങ്ങിയ പ്രതിപക്ഷ പാര്‍ട്ടികളും പ്ലാന്റ് തുറക്കണമെന്നാവശ്യപ്പെടാതിരുന്നതും വികസനത്തിന് തുരങ്കം വയ്‌ക്കാന്‍ മാത്രമാണ് ഉപകരിച്ചത്.
ചെയര്‍മാന്‍ സ്ഥാനം തെറിക്കാതിരിക്കാന്‍ മത്സ്യഫെഡ് ചെയര്‍മാനും ഒരിക്കല്‍പോലും ഇതിനെതിരെ പ്രതികരിച്ചില്ല. പകരം ചെയര്‍മാനുമായി അടുത്ത ബന്ധമുള്ള ഉദ്യോഗസ്ഥനെ സ്‌പെഷ്യല്‍ ഓഫീസറാക്കിയതും ഇതിന്റെ പ്രവര്‍ത്തനത്തെ തടസ്സപ്പെടുത്തുകയായിരുന്നു.
മത്സ്യത്തൊഴിലാളി മേഖലയില്‍ ആയിരക്കണക്കിന് തൊഴില്‍ അവസരങ്ങള്‍ നേടിക്കൊടുക്കുമായിരുന്ന തോടപ്പള്ളി, പുന്നപ്ര എന്നിവിടങ്ങളിലെ ഫിഷിങ് ഹാര്‍ബര്‍, മത്സ്യഫെഡ് വഴി നടപ്പാക്കാന്‍ സാധിക്കുമായിരുന്ന നിരവധി തൊഴിലവസരങ്ങള്‍ എന്നിവയാണ് സര്‍ക്കാര്‍ അട്ടിമറിച്ചത്.
പ്ലാന്റിന്റെ പ്രവര്‍ത്തനം ഉടന്‍ ആരംഭിക്കുമെന്ന് ചില കേന്ദ്രങ്ങളില്‍ നിന്നും പറഞ്ഞുകേള്‍ക്കുന്നുഎന്നാല്‍ നിയമസഭാ തെരഞ്ഞെടുപ്പിന് ദിവസങ്ങള്‍ മാത്രം ബാക്കി നില്‍ക്കെ രാഷ്‌ട്രീയ തട്ടിപ്പാണ് ഇതിന്റെ ലക്ഷ്യമെന്നും നാട്ടുകാര്‍ പറയുന്നു.
