വടകര: താലൂക്കിലെ ബസ്തൊഴിലാളികള് വിവിധ ആവശ്യങ്ങളുന്നയിച്ച് നടത്തുന്ന അനിശ്ചിതകാല പണിമുടക്ക് യാത്രക്കാരെ വലച്ചു. വടകര, കുറ്റിയാടി തൊട്ടില്പ്പാലം, കാവില്, തീക്കുനി, തണ്ണീര്പന്തല്, ആയഞ്ചേരി, തിരുവള്ളൂര്, മണിയൂര്, കോട്ടക്കല് തുടങ്ങിയ റൂട്ടുകളില് ബസ്സോട്ടം രണ്ട് ദിവസമായി പൂര്ണ്ണമായും നിലച്ചിരിക്കുകയാണ്.
മോട്ടോര്വകുപ്പും, തൊഴിലാളി യൂണിയനുകളും സംയുക്തമായി നടത്തിയ ചര്ച്ച പരാജയപ്പെട്ടു. ബസ്സ് ജീവനക്കാരെ മര്ദ്ദിച്ച മുഴുവന് പ്രതികളെയും അറസ്റ്റുചെയ്യുക, നയനം ബസ്ജീവനക്കാര്ക്കെതിരെ നാദാപുരം പോലീസ് ചാര്ജ്ജ് ചെയ്ത കേസ് പിന്വലിക്കുക തുടങ്ങിയ കാര്യങ്ങളില് യോഗത്തില് ധാരണയായില്ല.
ഇന്ന് വടകര താലൂക്ക് അതിര്ത്തിക്കുള്ളില് മറ്റ് താലൂക്കുകളില് നിന്ന് വരുന്ന ഹ്രസ്വദൂര ബസ്സുകള് തടയുമെന്ന് സംയുക്തസമരസമിതി നേതാക്കള് അറിയിയിച്ചു.
സംയുക്തസമരസമിതിയുടെ ആഭിമുഖ്യത്തില് വടകര താലൂക്കോഫീസിലേക്ക് മാര്ച്ച് നടത്തി. സംയുക്ത സമരസമിതി കണ്വീനര് കെ.വി.രാമചന്ദ്രന് മാര്ച്ച് ഉദ്ഘാടനം ചെയ്തു. ബസ്ജീവനക്കാര്ക്ക് നേരെ നിരന്തരമായി ഉണ്ടാകുന്ന അക്രമം അവസാനിപ്പിക്കണമെന്നും അദ്ദേഹം ആവശ്യപ്പെട്ടു. യോഗത്തില് എം.ബാലകൃഷ്ണന്(ബിഎംഎസ്) അധ്യക്ഷത വഹിച്ചു. ചെറിയത്ത് വിനോദന്(എച്ച്എംഎസ്), മീനത്ത് മൊയ്തു(എസ്ടിയു), വി.ആര്. രമേഷ്(എഐടിയുസി), നാരായണനഗരം പത്മനാഭന്(ഐഎന്ടിയുസി) എന്നിവര് സംസാരിച്ചു. കെ.സതീശന് സ്വാഗതവും എരഞ്ഞിക്കല് രവീന്ദ്രന് നന്ദിയും പറഞ്ഞു.
