ആലപ്പുഴ: ആലപ്പുഴ നഗരസഭ നടപ്പാക്കുന്ന എല്‍ഇഡി പദ്ധതി് തടസപ്പെടുത്താന്‍ ശ്രമിക്കുന്നതായി ആരോപിച്ച് കെ. സി. വേണുഗോപാല്‍ എംപിയുടെ വീട്ടിലേക്ക് എല്‍ഡിഎഫ് മുനിസിപ്പല്‍ കമ്മിറ്റി നേതൃത്വത്തില്‍ മാര്‍ച്ച് നടത്തി. കൗണ്‍സിലര്‍മാര്‍ നിരാഹാര സമരം നടത്തുമെന്ന പ്രഖ്യാപനം വിഴുങ്ങി. ഇടതുവലതു ഒത്തുതീര്‍പ്പ് നാടകത്തിനെതിരെ അണികളിലും പൊതുജനങ്ങളിലും അമര്‍ഷം ഉയരുന്നു.
തിരുവാമ്പാടി ജങ്ഷനു സമീപത്തുനിന്ന് പ്രകടനം ആരംഭിച്ചു. പഴവീട്ടില്‍ എംപിയുടെ വസതിക്കു സമീപം പോലീസ് പ്രകടനം തടഞ്ഞു. തുടര്‍ന്ന് പ്രവര്‍ത്തകര്‍ റോഡില്‍ കുത്തിയിരുന്ന് പ്രതിഷേധിച്ചു. പ്രതിഷേധ യോഗം നഗരസഭാധ്യക്ഷ മേഴ്‌സി ഡയാന മാസിഡോ ഉദ്ഘാടനംചെയ്തു. സിപിഐ മണ്ഡലം സെക്രട്ടറി വി. എം. ഹരിദാസ് അധ്യക്ഷനായി. എന്നാല്‍ എംപിയുടെ വീടിന് മുന്നില്‍ നിരാഹാര സമരം നടത്തുമെന്ന പ്രഖ്യാപനത്തില്‍ നിന്ന് നഗരസഭാ കൗണ്‍സിലര്‍മാര്‍ പിന്നോക്കം പോയത് പ്രതിഷേധത്തിനിടയാക്കി.
ആറാം തീയതി മുതല്‍ അനിശ്ചിതകാല നിരാഹാര സമരം നടത്തുമെന്നാണ് നേരത്തെ ചെയര്‍പേഴ്‌സന്‍ മേഴ്‌സി ടീച്ചര്‍ പത്രസമ്മേളനം നടത്തി പ്രഖ്യാപിച്ചിരുന്നത്. ഈ സാഹചര്യത്തില്‍ എല്‍ഡിഎഫ് നടത്തിയ സമരം രാഷ്‌ട്രീയ തട്ടിപ്പ് മാത്രമാണെന്നും ആക്ഷേപം ഉയരുന്നു. നഗരത്തിലെ ഒരു വിഭാഗം കോണ്‍ഗ്രസ്, ഇടതുപക്ഷ കൗണ്‍സിലര്‍മാര്‍ തമ്മില്‍ ഒത്തുകളിയുണ്ടെന്ന പ്രചരണം ശരിവെയ്‌ക്കുന്നതാണ് ഈ സമരവും. നിരാഹാര സമരം ഒഴിവാക്കി അണികളെയും ജനങ്ങളെയും കബളിപ്പിക്കാനാണ് സമരം കേവലം മാര്‍ച്ചില്‍ അവസാനിപ്പിച്ചതത്രെ.
നേരത്തെ നഗരം ഭരിക്കുന്ന എല്‍ഡിഎഫിന്റെ ജനവിരുദ്ധ പ്രവര്‍ത്തനങ്ങള്‍ക്കെതിരെയും അഴിമതികള്‍ക്കെതിരെയും യുഡിഎഫും സമരനാടകങ്ങള്‍ നടത്തി പൊതുജനത്തെ കബളിപ്പിക്കുകയായിരുന്നു. കോണ്‍ഗ്രസിനുള്ളിലെ കടുത്ത ഭിന്നതയും മുസ്‌ളീംലീഗിന്റെ ഇടതുപ്രേമവുമാണ് കഴിഞ്ഞ അഞ്ചുവര്‍ഷക്കാലവും നഗരത്തില്‍ ഇടതുപക്ഷത്തിന് തുണയായത്. കെ. സി. വേണുഗോപാല്‍ എംപിയുമായി നഗരത്തിലെ ചില പ്രമുഖ സിപിഎം നേതാക്കള്‍ക്ക് അവിശുദ്ധ ബന്ധമുണ്ടെന്ന് പാര്‍ട്ടിക്കുള്ളില്‍ തന്നെ പാട്ടാണ്. തെരഞ്ഞെടുപ്പ് കാലയളവിലും ഇടതുപക്ഷവും കോണ്‍ഗ്രസും തമ്മില്‍ അവിശുദ്ധ സഖ്യം തുടരുകയാണ്.
