ടോക്കിയോ: 2020-ല് ടോക്കിയോയില് നടക്കുന്ന ഒളിമ്പിക്സില് അഞ്ച് ഇനങ്ങള് കൂടി ഉള്പ്പെടുത്താന് നിര്ദ്ദേശം. ബെയ്സ് ബോള്, കരാട്ടെ, സ്കേറ്റ് ബോര്ഡിംഗ്, സ്പോര്ട്സ് ക്ലൈംബിംഗ്, സര്ഫിംഗ് എന്നീ ഇനങ്ങള് കൂടി ഉള്പ്പെടുത്താന് ടോക്യോ ഒളിമ്പിക്സ് സംഘാടക സമിതിയാണ് നിര്ദ്ദേശം മുന്നോട്ടുവെച്ചത്.
നിര്ദേശം നടപ്പിലാക്കുകയാണെങ്കില് 474 അത്ലറ്റുകള് കൂടി വിവിധ ഇനങ്ങളിലായി മത്സരിക്കും. പുതിയ നിയമ പ്രകാരം ഒളിമ്പിക്സിന് ആതിഥ്യമരുളുന്ന രാജ്യത്തിന് തങ്ങള്ക്ക് താല്പര്യമുള്ള കായിക ഇനങ്ങള് ഉള്പ്പെടുത്തുന്നതിന് താല്പര്യമറിയിക്കാവുന്നതാണ്. അടുത്ത ആഗസ്റ്റില് ചേരുന്ന അന്താരാഷ്ട്ര ഒളിമ്പിക് കമ്മിറ്റിയാണ് ഇത് സംബന്ധിച്ച് അന്തിമ തീരുമാനമെടുക്കുക.
സ്ക്വാഷ്, വുഷു എന്നീ ഇനങ്ങളും ടോക്കിയോ ഒളിമ്പിക്സിനായി മത്സരിക്കുന്നുണ്ട്. ഐഒസി പ്രസിഡന്റ് തോമസ് ബാഷ് കഴിഞ്ഞ വര്ഷം നിയമങ്ങളില് വരുത്തിയ പരിഷ്കാരങ്ങളുടെ അടിസ്ഥാനത്തിലാണ് ഒളിമ്പിക്സിന് ആതിഥേയത്വമരുളാനൊരുങ്ങുന്ന രാജ്യങ്ങള് വിവിധ നിര്ദ്ദേശങ്ങള് മുന്നോട്ടു വെച്ചിരിക്കുന്നത്.
