കോട്ടയം: അച്ഛന്റെ പാരമ്പര്യം പിന്തുടര്‍ന്ന് എട്ടാം വയസ്സില്‍ വീണ നിര്‍മ്മാണ രംഗത്തേക്ക് പിച്ചവെച്ചു തുടങ്ങിയ അശോകനിന്ന് പിന്നിട്ടത് 50 വര്‍ഷങ്ങള്‍. എം.ജി നാദം 2015 ല്‍ വീണ നിര്‍മ്മാണ രീതികള്‍ പ്രദര്‍ശിപ്പിക്കുന്നതിന് മംഗലാപുരം സ്വദേശിയായ അശോകനും എത്തിയിട്ടുണ്ട്. അച്ഛന്‍ തിരുവനന്തപുരത്ത് എത്തി വീണ നിര്‍മ്മിക്കുന്ന ഫാക്ടറി ആരംഭിച്ചു. അശോകന്റെ ജനനത്തിന് ശേഷം ഇവരുടെ കുടുംബം പാലക്കാട്ടേയ്‌ക്ക് കുടിയേറി. അവിടേയും സരസ്വതി വീണഫാക്ടറി തുടങ്ങി. എട്ടാം വയസ്സില്‍ അശോകന് അച്ഛനെ സഹായിക്കുവാനായി ഫാക്ടറിയിലെത്തിത്തുടങ്ങി. പതിമൂന്നാം വയസ്സില്‍ അച്ഛന്‍ മരിച്ചതോടെ ഫാക്ടറിയുടെ പൂര്‍ണ്ണ ചുമതല അശോകനായി, ഈ രംഗത്ത് 50 വര്‍ഷം പിന്നിടുന്ന അശോകന് ഇപ്പോഴും തിരക്കാണ്. പുതിയ വീണകളുടെ നിര്‍മ്മാണവും പഴയ വീണകളുടെ അറ്റകുറ്റപണികള്‍ക്കുമായി കേരളത്തിന്റെ വിവിധ പ്രദേശങ്ങളില്‍ നിന്നായി നിരവധിയാളുകളാണ് സരസ്വതി വീണഫാക്ടറി തേടി പാലക്കാട്ട് എത്തുന്നത്.
പച്ചപ്ലാവിന്റെ തടിയിലാണ് വീണ നിര്‍മ്മിക്കുന്നത്. സാധാരണ ഗതിയില്‍ 20 ഇഞ്ച് നീളവും 16 ഇഞ്ച് പൊക്കവുമുള്ള വീണകളുമാണ് നിര്‍മ്മിക്കുന്നത്. വ്യാളിമുഖം, കഴുത്ത്, ദണ്ഡ്, കുടം എന്നിങ്ങനെ നാലുഭാഗങ്ങളായുള്ള വീണ നിര്‍മ്മിക്കുന്നതിന് 21 ദിവസം വരെയെടുക്കും.16000 രൂപാവരെ വില വരും. അഞ്ചു തന്ത്രികളായിട്ടാണ് സാധാരണയുള്ളത്. അതില്‍ ആദ്യത്തെ രണ്ടെണ്ണം സ്റ്റിലിലും, ബാക്കി മൂന്നെണ്ണം പിച്ചളയിലുമാണ് നിര്‍മ്മിക്കുന്നത്.
പുതിയ തലമുറയ്‌ക്ക് വീണയിലുള്ള താല്‍പര്യം കൂടിയതുകൊണ്ടാണോ അതോ ഈ രംഗത്ത് ജോലി ചെയ്യുന്നവരുടെ എണ്ണം കുറഞ്ഞതുകൊണ്ടാണോ എന്നറിയില്ല തനിക്ക് നല്ല തിരക്കാണെന്ന് ആശോകന്‍ ജന്മഭൂമിയോട് പറഞ്ഞു.
