കൊച്ചി: പൊക്കാളി നിലങ്ങളിലെ നെല്ക്കൃഷിയും ജൈവപച്ചക്കറി വിളകളും വന് പ്രതിസന്ധി നേരിടുന്നു. ആലപ്പുഴ, എറണാകുളം, തൃശൂര് ജില്ലകളിലെ തീരപ്രദേശങ്ങളില് മാത്രം കണ്ടുവരുന്ന പൊക്കാളിക്കൃഷിരീതി നിരന്തരഓരുജല മത്സ്യവാറ്റുകാരുടെ സമ്മര്ദ്ദം മൂലം നാമാവശേഷമാവുകയാണ്. ഓരിനേയും ജലപ്രളയത്തേയും അതിജീവിച്ച് യാതൊരു രാസവളങ്ങളുടേയോ കീടനാശിനികളുടേയോ സഹായമില്ലാതെയാണ് ഔഷധമൂല്യമുളള അരി പൊക്കാളിപ്പാടങ്ങളില് ഉത്പാദിപ്പിക്കപ്പെടുന്നത്.
അതുകൊണ്ട് തന്നെ പൊക്കാളി നിലങ്ങളിലെ സര്ക്കാരിന്റെ പ്രഖ്യാപിത നയമായ “ഒരുനെല്ലും ഒരു മീനും” കര്ശനമായി നടപ്പിലാക്കേണ്ടതുണ്ട്.
ആലപ്പുഴ, എറണാകുളം ജില്ലകളിലെ വിവിധ പ്രദേശങ്ങളില് ദീര്ഘനാളുകളായി നിരന്തര ഓരുജല മത്സ്യവാറ്റ് മാത്രം നടത്തിയിരുന്ന പാടശേഖരങ്ങളില് സമിതിയുടെ പ്രവര്ത്തനഫലമായി നെല്ക്കൃഷി പുന:രാരംഭിക്കുവാന് സാധിച്ചിട്ടുണ്ട്. ഈ പ്രക്രിയയുടെ ഭാഗമായി എരമല്ലൂര് കുടപ്പുറം ഫെറിക്ക് സമീപമുളള കൂരിച്ചാല് പാടശേഖരത്ത് ചെട്ടിവിരിപ്പ്, വൈറ്റില – 6, എന്നി വിഭാഗങ്ങളില്പ്പെട്ട നെല്ലിനങ്ങളാണ് കൃഷി ചെയ്തിരിക്കുന്നത് . കാര്ഷിക പ്രവര്ത്തനങ്ങള്ക്ക് ഇന്ന് നേരിടുന്ന തൊഴിലാളി ക്ഷാമത്തിന് യന്ത്രവത്ക്കരണം മാത്രമേ പരിഹാരമുളളൂ. കേരള കാര്ഷിക സര്വ്വകലാശാലയുടെ വൈറ്റിലയിലുളള നെല്ലുഗവേഷണ കേന്ദ്രത്തിന്റെ സഹായത്തോടെ പൊക്കാളി നിലങ്ങള്ക്കനുയോജ്യമായ ഞാറ് നടീല്യന്ത്രം ഉപയോഗിച്ചാണ് കൂരിച്ചാല് പാടശേഖത്തില് കൃഷിയിറക്കിയിട്ടുളളത്. ആലപ്പുഴ ജില്ലയിലെ പ്രഥമ സംരംഭം എന്നിനിലയില് ജില്ലാകളക്ടര് എന്. പത്മകുമാര് കൃഷി ശാസ്ത്രജ്ഞരുടേയും, ജസ്റ്റിസ് കെ.സുകുമാരന്റേയും സാന്നിദ്ധ്യത്തില് ജൂണ് – 30 നാണ് പ്രവര്ത്തനങ്ങള്ക്ക് തുടക്കം കുറിച്ചത്. പൊക്കാളി സംരക്ഷണ സമിതി നിലം പാട്ടത്തിനെടുത്താണ് കൃഷി നടത്തുന്നത്.
പാടശേഖരത്തിലെ നിലമൊരുക്കല് ഉള്പ്പെടെയുളള പ്രവര്ത്തനങ്ങള് തൊഴിലുറപ്പ് പദ്ധതിയില്പ്പെടുത്തി പിന്തുണയ്ക്കാമെന്ന ഉറപ്പ് ഇതുവരെ പാലിക്കപ്പെട്ടിട്ടില്ല. എഴുപുന്ന പഞ്ചായത്തിലെ ബഹുഭൂരിപക്ഷം പാടശേഖരങ്ങളിലും പൊക്കാളി നിലങ്ങളില് വിതക്കാന് അനുയോജ്യമല്ലാത്ത വിത്തിനങ്ങളാണ് കൃഷിഭവന് നല്കിയിട്ടുളളത്. അതുകൊണ്ട് തന്നെ ഈ പാടശേഖരങ്ങളിലെല്ലാം നെല്ച്ചെടികളെ അപേക്ഷിച്ച് കളകളാണ് നിറഞ്ഞു നില്ക്കുന്നത്. പൊക്കാളിയിനങ്ങളില്പ്പെട്ട നെല്ക്കൃഷി സംരക്ഷിക്കുവാന് സര്ക്കാരിനും കൃഷിഭവനും ബാധ്യതയുണ്ട്. ഈ പശ്ചാത്തലത്തിലാണ് ഗാന്ധിജയന്തി ദിനത്തില് പൊക്കാളി സംരക്ഷണസമിതി ശ്രമദാനപ്രവര്ത്തനങ്ങള് സംഘടിപ്പിക്കുന്നത്.
