കൊച്ചി: മേയറെ ഉപരോധിക്കാനായി പ്രതിപക്ഷ കൗണ്‍സിലര്‍മാരും നഗരസഭാ കവാടം ഉപരോധിക്കുന്നതിനായി എല്‍ഡിഎഫും രംഗത്തെത്തിയതോടെ നഗരം ഗതാഗതകുരുക്കില്‍ കുടങ്ങി. സൗത്ത് മുതല്‍ മേനക വരെയുള്ള ഭാഗങ്ങളിലാണ് മണിക്കൂറുകളോളം ഗതാഗതം തടസപ്പെട്ടത്. മേയറെ ഉപരോധിക്കുന്നു എന്ന വാര്‍ത്ത പരന്നതോടെ പ്രവര്‍ത്തകര്‍ കൂട്ടത്തോടെ നഗരശഭാ കവാടത്തിനു ചുറ്റും കൂടി. ഇതോടെ ഇതുവഴിയുള്ള ഗതാഗതം നിലച്ചു. ഹൈക്കോര്‍ട്ട് ഭാഗത്തു നിന്നും വരുന്ന വാഹനങ്ങള്‍ മേനകയില്‍ നിന്നും, വൈറ്റില ഭാഗത്തുനിന്നും വന്ന വാഹനങ്ങള്‍ സൗത്തില്‍ നിന്നും തിരിച്ചു വിടാന്‍ പൊലീസ് ശ്രമിച്ചെങ്കിലും ഫലപ്രദമായില്ല. ജെട്ടി സ്റ്റാന്റിലും മറൈന്‍ െ്രെഡവിലും ബോട്ട് ജെട്ടിയിലുമെത്തിയ യാത്രക്കാര്‍ കാല്‍ നടപോലും സാധ്യമാകാതെ കുരുക്കില്‍ കുരുങ്ങി. സമരത്തെ തുടര്‍ന്ന എംജി റോഡും കുരുക്കില്‍ കുരുങ്ങി. 10 മണിക്കൂറോളമാണ് നഗരം ഗതാഗതകുരുക്കില്‍ കുരുങ്ങിയത്. ഈ ഭാഗങ്ങളിലെ വഴിയോര കച്ചവടക്കാരെയും സമരം ബാധിച്ചു.
ഫോര്‍ട്ട്‌കൊച്ചി ബോട്ട് ദുരന്തത്തില്‍ ജുഡീഷ്യല്‍ അന്വേഷണം ആവശ്യപ്പെട്ട് നഗരസഭാ മന്ദിരത്തിനു മുമ്പില്‍ എല്‍ഡിഎഫ് നടത്തിവരുന്ന നിരാഹാര സമരം ഇന്നലെ അഞ്ചാം ദിവസത്തിലേക്ക് കടന്നപ്പോള്‍, സത്യാഗ്രഹികളായ നഗരസഭാ പ്രതിപക്ഷ നേതാവ് കെ.ജെ. ജേക്കബിനെയും സി.എ. ഷക്കീറിനെയും പൊലീസ് അറസ്റ്റു ചെയ്തു നീക്കി. ഇരുവരുടെയും ആരോഗ്യനില ഗുരുതരമായതിനെ തുടര്‍ന്നായിരുന്നു അറസ്റ്റ്. പകരം കൗണ്‍സിലര്‍മാരായ കെ.എന്‍. സുനില്‍കുമാറും ജോജി കുരീക്കോടും സത്യഗ്രഹമാരംഭിച്ചു.
ഇന്നലെ രാവിലെ ആറുമണിയോടെയാണ് സത്യഗ്രഹ പന്തലിലെത്തിയ പൊലീസ് കെ.ജെ. ജേക്കബിനെ അറസ്റ്റ് ചെയ്തത്. വൈകിട്ട് നാലോടെ സി.എ. ഷക്കീറിനെയും പൊലീസ് അറസ്റ്റ് ചെയ്ത് നീക്കി ജനറല്‍ ആശുപത്രിയില്‍ പ്രവേശിപ്പിച്ചു.
