നമുക്ക് ആപത്ത് വരുമ്പോള്, മറ്റുള്ളവര് സഹായിക്കും എന്നു ധരിക്കുന്നത് വെറുതെയാണ്. പലപ്പോഴും അത് നിരാശയില് കലാശിക്കും. ‘ബന്ധുക്കള് സഹായിക്കും. സുഹൃത്തുക്കള് സഹായിക്കും’ എന്നൊക്കെ പലപ്പോഴും നമ്മള് വിചാരിക്കാറുണ്ട്. പക്ഷെ, സമയം വരുമ്പോള് അത്തരം പ്രതീക്ഷകള് വെറുതെയായിരുന്നു എന്ന് നമുക്ക് ബോദ്ധ്യമാകും. ഒരാള്ക്ക് അത്യാവശ്യമായി പതിനായിരം രൂപ വേണം. വളരെ അടുത്തൊരു സുഹൃത്തുണ്ട്. അയാളോട് ചോദിച്ചാല് കിട്ടും എന്ന് പ്രതീക്ഷിച്ച് അവിടെ ചെല്ലുന്നു. ചിലപ്പോള് ചോദിച്ച തുക തന്നെന്നിരിക്കും. എന്നാല് സ്നേഹം കൊണ്ട് പതിനായിരത്തിനു പകരം സുഹൃത്ത് പതിനയ്യായിരം രൂപ തന്നെന്നും വരാം. ചിലപ്പോള് അയ്യായിരമോ രണ്ടായിരമോ ആയിരിക്കും തരുന്നത്. ഒന്നും തരാതെയുമിരിക്കാം. ‘അയ്യോ കൂട്ടുകാരാ, ഞാന് വല്ലാത്ത സാമ്പത്തിക ഞെരുക്കത്തിലാണ്. വാസ്തവം പറഞ്ഞാല്, ഞാന് നിന്നോട് കുറച്ചു പണം കടം ചോദിക്കാനിരിക്കുകയായിരുന്നു’ എന്ന് പറയാനുള്ള സാദ്ധ്യതയും ഉണ്ടെന്നു ധരിക്കുക.
‘ആരും ആര്ക്കും കൂട്ടല്ല. നമുക്ക് കൂട്ട് നമ്മള് മാത്രം, നമ്മിലെ ഈശ്വര തത്വം മാത്രം’ ഇതാണ് ആധ്യാത്മിക ശാസ്ത്രങ്ങള് പഠിപ്പിക്കുന്നത്. മനസ്സിന്റെ സൂക്ഷ്മമായ പ്രവര്ത്തനങ്ങള് മനസ്സിലാക്കാന്, നിരന്തരം മാറിക്കൊണ്ടിരിക്കുന്ന ലോകത്തിന്റെ സ്വഭാവം അറിഞ്ഞു ജീവിക്കാന് ആത്മീയത നമ്മളെ സഹായിക്കും. നല്ലവണ്ണം നീന്താന് അറിയാവുന്നവര്ക്ക് കടലിലെ തിരമാലകള്ക്കൊപ്പം നീന്തിത്തുടിക്കുന്നത് ആനന്ദകരമായ ഒരനുഭവമാണ്. എന്നാല്, നീന്തല് അറിയാത്തവര് കടലില് ഇറങ്ങിയാല് അത് സുഖകരമായ ഒരനുഭവമായിരിക്കില്ല. എന്നു മാത്രമല്ല, ചിലപ്പോള് തിരമാലകളില്പ്പെട്ട് മുങ്ങിപ്പോകാനും സാദ്ധ്യതയുണ്ട്. ചെറുതും വലുതും ഭീമാകാരവുമായ തിരമാലകള് നിരന്തരം അലയടിക്കുന്ന ഒരു മഹാസമുദ്രം പോലെയാണ് ഈ ലോകം. ഇവിടെ ആധ്യാത്മിക തത്വം അറിഞ്ഞ് ജീവിതം നയിച്ചാല്, ഏതു പ്രതിബന്ധവും സുഖകരമായ അനുഭവമാക്കി മാറ്റാന് കഴിയും. തളരാതെ, അതിനെ അഭിമുഖീകരിക്കാനും അതിജീവിച്ച് മുന്നേറാനും സാധിക്കും.
ഒരു മെഷീന് വാങ്ങുമ്പോള് അതിന്റെ പ്രവര്ത്തന രീതിയും പ്രവര്ത്തിപ്പിക്കാനുള്ള നിര്ദേശങ്ങളും അടങ്ങുന്ന ഒരു ബ്രോഷര് അതിനോടൊപ്പം തരും. മെഷീന് ഉപയോഗിക്കാന് തുടങ്ങുന്നതിനു മുന്പ് അത് വായിച്ച് മനസ്സിലാക്കണം. വേണ്ടവണ്ണം മനസ്സിലാക്കാതെ മെഷീന് ഉപയോഗിച്ചാല്, അത് അധികനാള് ഉപയോഗിക്കാന് സാധിക്കാതെ വരാം. അതുപോലെ മനസ്സിന്റെ പ്രകൃതവും ലോകത്തിന്റെ സ്വഭാവവും നല്ലവണ്ണം മനസ്സിലാക്കി എങ്ങനെ സന്തോഷത്തോടെ ജീവിക്കാം എന്നു പഠിപ്പിക്കുന്ന ജീവിതത്തിന്റെ ‘മാനുവല്’ ആണ് ആധ്യാത്മികം. അത് പഠിക്കേണ്ടതും ജീവിതത്തില് പ്രായോഗികമാക്കേണ്ടതും പരമപ്രധാനമായ കാര്യം തന്നെയാണെന്ന് എപ്പോഴും ഓര്ക്കുക.
