പത്തനാപുരം: താലൂക്കിലെ ഏക ഇഎസ്ഐ ആശുപത്രിയുടെ നിര്മ്മാണം ആരംഭിച്ചിട്ട് 22 വര്ഷം പിന്നിടുന്നു. എന്നാല് ഫണ്ടിന്റെ അപര്യാപ്തതയും നിര്മ്മാണസാമഗ്രികളുടെ അഭാവവും കാരണം തുടര്പ്രവര്ത്തനങ്ങള് അനന്തമായി നീളുകയാണ്.
1993ല് സ്ഥലമേറ്റെടുപ്പ് പൂര്ത്തിയാകുകയും ചുറ്റുമതിലുകള് നിര്മ്മിക്കുകയും ചെയ്തു. എന്നാല് ഫണ്ട് ലഭ്യമല്ലാത്തതിനാല് തുടര്നിര്മ്മാണങ്ങള്ക്ക് 20 വര്ഷം കാത്തിരിക്കേണ്ടി വന്നു.
2013ല് കൊടിക്കുന്നില് സുരേഷ് ഇടപെട്ട് ഇഎസ്ഐ കോര്പ്പറേഷനില് നിന്നും കെട്ടിടനിര്മ്മാണത്തിനായി തുക അനുവദിച്ചിരുന്നു. ഒന്നരക്കോടി രൂപയായിരുന്നു പദ്ധതി വിഹിതം. 2013 ഏപ്രില് 13നാണ് ആശുപത്രിക്കായി ശിലാസ്ഥാപനം നടത്തിയത്. പുനലൂര്, പത്തനാപുരം മേഖലകളില് കിടത്തിചികിത്സയുള്ള ഏക ഇ എസ് ഐ ആശുപത്രിയാണ് കുന്നിക്കോട് നിര്മ്മാണത്തിലിരിക്കുന്നത്. ഹിന്ദുസ്ഥാന് ലാറ്റക്സ് ലിമിറ്റഡിനായിരുന്നു നിര്മ്മാണചുമതല. വിപുലമായ സൗകര്യങ്ങളാണ് ഒരുക്കുന്നത്. രണ്ട് പരിശോധനാമുറികള്, ഫാര്മസി, റിസപ്ഷന്, അഡ്മിനിസ്ട്രേറ്റീവ് ബ്ലോക്ക്, ഒബ്സര്വേഷന്റൂം, ഇന്ഞ്ചക്ഷന് മുറികള്, റിക്കോര്ഡ്സ് സെക്ഷന്, ഓഫീസ് മുറി എന്നിവയാണ് നിര്മ്മിച്ചിരിക്കുന്നത്. വാഹനപാര്ക്കിംഗിനായി പ്രത്യേകസംവിധാനവും ഒരുക്കിയിട്ടുണ്ട്.
ഈ വര്ഷം മാര്ച്ചില് നിര്മ്മാണം പൂര്ത്തിയാക്കുമെന്നായിരുന്നു ആദ്യപ്രഖ്യാപനം. എന്നാല് മാര്ബിള് കിട്ടാനില്ലെന്ന കാരണത്താല് നിര്മ്മാണം വീണ്ടും ഇഴഞ്ഞു. നിലവില് സമീപത്തെ വാടകകെട്ടിടത്തിലാണ് അശുപത്രി പ്രവര്ത്തിക്കുന്നത്. കരാറുകാര് നിര്മ്മാണപ്രവര്ത്തനങ്ങള് നിര്ത്തിവച്ചിരിക്കുകയാണ്. 70 ലക്ഷം രൂപയുടെ ബില്ലുകള് മാറി കിട്ടാത്തതിനാലാണ് നിര്മ്മാണം വൈകുന്നത്. വൈദ്യുതീകരണപ്രവര്ത്തനങ്ങളും ചായംപൂശലും മോടി പിടിപ്പിക്കല് പ്രവര്ത്തനങ്ങളുമാണ് ബാക്കിയുള്ളത്. ഇതിനിടെ നിരവധിതവണ ആശുപത്രിയുടെ നിര്മ്മാണം ധ്രുതഗതിയിലാക്കണമെന്നാവശ്യപ്പെട്ട് സമരപരിപാടികളും നടന്നിരുന്നു.
കിഴക്കന് മേഖലയിലെ ജനങ്ങള് ഇപ്പോള് കൊല്ലത്തെ ആശുപത്രിയെയാണ് ആശ്രയിക്കുന്നത്. തോട്ടം തൊഴിലാളികളും കശുവണ്ടി തൊഴിലാളികളും തിങ്ങിപാര്ക്കുന്ന മലയോരമേഖലയില് ഇഎസ്ഐ ആശുപത്രി വേണമെന്നാവശ്യത്തിന് വര്ഷങ്ങളുടെ പഴക്കമുണ്ട്.
