കൊച്ചി: വികസനത്തിന്റെ മറവില് കണ്ടലുകള് വ്യാപകമായി വെട്ടിമാറ്റുന്നു. മുണ്ടംവേലി ചിറക്കല് പ്രദേശത്ത് ഭൂരിപക്ഷം തണ്ണീര്ത്തടങ്ങളും കണ്ടല്ക്കാടുകളും ജിസിഡിഎയുടെ അധീനതയിലാണുള്ളത്. ഈ മേഖല ചെമ്മീന് കെട്ടുകളും ചാലുകളും നിറഞ്ഞ് ജൈവ സമ്പന്നമായ കായലിനോട് ബന്ധപ്പെട്ട് കിടക്കുന്ന പ്രദേശങ്ങളില് ഒന്നാണ്. ജിസിഡിഎയുടെ നേതൃത്വത്തില് ടൂറിസം വികസനത്തിന്റെ മറവിലാണ് ഇവിടെ ഏക്കര് കണക്കിന് കണ്ടല് ചെടികള് വെട്ടിനശിപ്പിക്കുന്നത്. യന്ത്രസാമഗ്രികള് ഉപയോഗിച്ച് തണ്ണീര്ത്തടങ്ങള്ക്ക് ആഴം കൂട്ടി അതിനോട് ചേര്ന്നുകിടക്കുന്ന തണ്ണീര്ത്തടങ്ങളും കണ്ടല്ക്കാടുകളും നികത്തുകയും ചെയ്യുന്നുണ്ട്. ഇത് കൊച്ചിയിലെ മത്സ്യബന്ധന മേഖലയില് വലിയ പ്രത്യാഘാതങ്ങള്ക്ക് കാരണമാകും.
സുനാമിപോലുള്ള പ്രകൃതി ദുരന്തങ്ങള്ക്ക് തടയിടുന്നതിനും മത്സ്യങ്ങളുടെ പ്രജനന പ്രദേശങ്ങളായുമാണ് ഈ പ്രദേശം നിലനിന്നു പോന്നത്. കൊച്ചിയില് നിലനിന്നിരുന്ന കണ്ടല്ക്കാടുകളില് ഇന്ന് അവശേഷിക്കുന്നത് കേവലം ഒരു ശതമാനം മാത്രമാണെന്ന് പരിസ്ഥിതി പ്രവര്ത്തകര് പറയുന്നു. സാമൂഹ്യ പാരിസ്ഥിതിക സാമ്പത്തിക മേഖലയില് വലിയ സംഭാവനകള് നല്കുന്ന കണ്ടല്ക്കാടുകളും തണ്ണീര്ത്തടങ്ങളും ഇല്ലാതാവുന്നത് വലിയ ദുരന്തങ്ങള്ക്ക് കാരണമാവാന് ഇടയുണ്ട്. കേരള തണ്ണീര്ത്തട നിയമപ്രകാരമുള്ള പാരിസ്ഥിതിക ആഘാത പഠനങ്ങളോ ബന്ധപ്പെട്ട അധികൃതരുടെ ശുപാര്ശകളോ അനുമതിയോ ഇല്ലാതെയാണ് ഇത്തരത്തിലുള്ള പ്രവര്ത്തനങ്ങള് യുദ്ധകാലാടിസ്ഥാനത്തില് നടന്നുകൊണ്ടിരിക്കുന്നത്.
ഇതിനെതിരെ ജനകീയ പ്രസ്ഥാന ദേശീയ സഖ്യം സംസ്ഥാന കമ്മറ്റിയുടെ നേതൃത്വത്തില് ഫോറസ്റ്റ് അധികൃതര്ക്ക് പരാതി നല്കിയിട്ടുണ്ട്.
