ന്യൂദല്ഹി: ഭാരതവും ശ്രീലങ്കയും തമ്മില് പ്രതിരോധ-സുരക്ഷാ മേഖലകളിലെ സഹകരണം കൂടുതല് ദൃഢവും ആഴത്തിലുള്ളതുമാക്കുമെന്ന് പ്രധാനമന്ത്രി നരേന്ദ്രമോദി. ഭാരത നിക്ഷേപകര് ശ്രീലങ്കയിലെ വിവിധ മേഖലകളില് വന്തോതില് നിക്ഷേപം നടത്തുമെന്നും റെയില്വേ, ഊര്ജ്ജം, സാമൂഹ്യ വികസന പദ്ധതികള്, കൃഷി, കെട്ടിട നിര്മ്മാണം, ശാസ്ത്ര-സാങ്കേതികം, ബഹിരാകാശം, സിവില് ആണവ മേഖല എന്നിവയില് ഇരു രാജ്യങ്ങളും തമ്മിലുള്ള സഹകരണം വര്ദ്ധിപ്പിക്കുമെന്നും പ്രധാനമന്ത്രി പറഞ്ഞു. ശ്രീലങ്കന് പ്രധാനമന്ത്രി റെനില് വിക്രമസിംഗെയുടെ സന്ദര്ശനത്തോടനുബന്ധിച്ച് ഇരു പ്രധാനമന്ത്രിമാരും നടത്തിയ സംയുക്ത പ്രസ്താവനയില് പ്രസംഗിക്കുകയായിരുന്നു മോദി.
ഭാരത-ശ്രീലങ്ക ബന്ധത്തില് ചരിത്രപ്രാധാന്യമര്ഹിക്കുന്ന വര്ഷമാണ് കടന്നുപോകുന്നതെന്നും ശ്രീലങ്കയുടെ വികസനത്തിലൂടെ തെക്കനേഷ്യയുടെ സമ്പൂര്ണ്ണ വികസനമാണ് ലക്ഷ്യമിടുന്നതെന്നും പ്രധാനമന്ത്രി മോദി പറഞ്ഞു. മാറ്റത്തിനും വികസനത്തിനുമായി ശ്രീലങ്കയില് നടന്ന വോട്ടെടുപ്പ് സമാധാനത്തിന്റെയും പ്രകാശത്തിന്റെയും പുതുവഴി അവര്ക്ക് നല്കുമെന്ന് ഉറപ്പാണ്. തമിഴ് വംശജരുടെ ഉള്പ്പെടെ തുല്യതയോടെയുള്ള ജീവിതവും സമാധാനവും നീതിയും ശ്രീലങ്കയിലെ ഐക്യം വര്ദ്ധിപ്പിക്കും.
ഇരുരാജ്യങ്ങളും തമ്മില് ആഴത്തിലുള്ള സാമ്പത്തിക സഹകരണമാണ് ഉള്ളത്. വാണിജ്യ-വ്യാപാര ബന്ധങ്ങള് ഇനിയും വര്ദ്ധിപ്പിക്കാനാണ് തീരുമാനം. ഉഭയകക്ഷി കരാറുകളും വ്യാപാരങ്ങളും നിക്ഷേപങ്ങളും ഇതിന് സഹായിക്കും. ശ്രീലങ്കയിലെ സാമ്പത്തിക വികസനത്തിനായി അടിസ്ഥാന സൗകര്യ,ഊര്ജ്ജ, ഗതാഗത മേഖലകളില് നിക്ഷേപത്തിനൊരുങ്ങുന്ന ഭാരതീയരെ പ്രോത്സാഹിപ്പിക്കുമെന്നും മോദി പറഞ്ഞു.
ഇരു രാജ്യങ്ങളിലെയും ജനങ്ങള് തമ്മിലും സാമ്പത്തികമായും ഉള്ള ബന്ധം കൂടുതല് ദൃഢമാക്കും. പ്രതിരോധ-സുരക്ഷാ മേഖലയിലെ സഹകരണവും കൂടുതല് ആഴത്തിലുള്ളതാക്കും. ഭീകരവാദത്തെ നേരിടുന്നതിനായി യോജിച്ച് പ്രവര്ത്തിക്കും. ഇരുരാജ്യങ്ങളും പ്രതിരോധ മേഖലയില് പരിശീലനങ്ങള് യോജിച്ച് നടത്തുമെന്നും മോദി പറഞ്ഞു.
മത്സ്യബന്ധന മേഖലയിലെ പ്രശ്നങ്ങള് പരിഹരിക്കുന്നതിനായി ക്രിയാത്മകമായ പരിശ്രമങ്ങള് ഇരുരാജ്യങ്ങളും ആരംഭിച്ചിട്ടുണ്ട്. ജീവിക്കുന്നതിനായുള്ള പരിശ്രമം എന്ന നിലയില് മനുഷ്യത്വപരമായി വിഷയത്തെ സമീപിക്കണമെന്ന് ശ്രീലങ്കയോട് അഭ്യര്ത്ഥിച്ചിട്ടുണ്ട്. ആഴക്കടല് മത്സ്യബന്ധനത്തിന് ഭാരത മത്സ്യത്തൊഴിലാളികളെ പ്രോത്സാഹിപ്പിക്കുമെന്നും മോദി പറഞ്ഞു. ഇരു രാജ്യങ്ങളും തമ്മിലുള്ള സഹകരണം സാധാരണ പൗരന്മാരുടെ ഹൃദയങ്ങളിലാണ് ഉണ്ടാവേണ്ടതെന്നും പ്രധാനമന്ത്രി നരേന്ദ്രമോദി കൂട്ടിച്ചേര്ത്തു.
