ചങ്ങനാശ്ശേരി: ചങ്ങനാശ്ശേരി റെയില്വേ സ്റ്റേഷന് ശബരിമല തീര്ത്ഥാടകരുടെ ഇടത്താവളമാക്കി മാറ്റണമെന്ന ആവശ്യമുയരുന്നു. എറണാകുളം റെയില്വേസ്റ്റേഷന് കഴിഞ്ഞാല് ഏറ്റവുംകൂടുതല് വാഹനപാര്ക്കിംഗിന് സൗകര്യമുള്ള റെയില്വേ സ്റ്റേഷന് ചങ്ങനാശ്ശേരിയാണെന്നും ശബരിമല തീര്ത്ഥാടകര്ക്ക് ആവശ്യമായ സൗകര്യങ്ങള് ഒരുക്കുന്നതിന് ഇവിടെ ഇടംഉണ്ടെന്നും ചൂണ്ടിക്കാണിക്കപ്പെടുന്നു. റോഡ്, റെയില്, ജലപാതകളിലൂടെ ചങ്ങനാശ്ശേരിയില് എത്തിച്ചേരാമെന്നതും തീര്ത്ഥാടകര്ക്ക് സൗകര്യപ്രദമാണ്.
ചങ്ങനാശ്ശേരിയില് നിന്നും വിവിധ പാതകളിലൂടെ പമ്പയിലെത്തിച്ചേരാനും കഴിയും. മണിമല, എരുമേലി വഴിയും, റാന്നി- വടശ്ശേരിക്കര വഴിയും പമ്പയിലെത്തിച്ചേരുന്നതിന് പുറമേ ഈ വഴികളുമായി ബന്ധമുള്ള പല ഉപവഴികളിലൂടെയും പമ്പയിലെത്തിച്ചേരാം.
ചങ്ങനാശ്ശേരി റെയില്വേ സ്റ്റേഷനില് അടുത്തിടെ കേന്ദ്രസര്ക്കാര് പ്രഖ്യാപിച്ച നിര്മ്മാണ പ്രവര്ത്തനങ്ങള്കൂടി പൂര്ത്തിയാകുമ്പോള് റെയില്വേ സ്റ്റേഷനിലെ സൗകര്യങ്ങള് പതിന്മടങ്ങ് വര്ദ്ധിക്കും. ചക്കുളത്ത് കാവ് , ഹരിപ്പാട്, അമ്പലപ്പുഴ, മണ്ണാറശാല, പഞ്ചപാണ്ഡവ ക്ഷേത്രങ്ങളായ തൃക്കൊടിത്താനം, പുലിയൂര്, തിരുവന്വണ്ടൂര്, തൃച്ചിറ്റാറ്റ്, ആറന്മുള എന്നിവിടങ്ങളിലേക്ക് തീര്ത്ഥാടകരെ എത്തിക്കുന്നതിന് ചങ്ങനാശ്ശേരിയില് നിന്നും കെഎസ്ആര്ടിസി ബസ് സര്വ്വീസ് ആരംഭിക്കണമെന്നും ആവശ്യമുയരുന്നു.
