743. ദശാനാഥ കോപോപദ്രവഹാരിണീ- ദശാനാഥന്റെ കോപംമൂലം ഉണ്ടാകുന്ന ഉപദ്രവങ്ങളെ ഹരിക്കുന്നവള്. ജ്യോതിഷം മനുഷ്യജീവിതത്തെ പല ദശകളായി വിഭജിക്കുന്നു. ഓരോ ദശയ്ക്കും നാഥനായി ഓരോ ഗ്രഹത്തെയും സങ്കല്പിക്കുന്നു. സൂര്യന്, ചന്ദ്രന്, മംഗളന്(ചൊവ്വ), ബുധന്, ഗുരു(വ്യാഴം), ശുക്രന്, ശനി, രാഹു, കേതു എന്നീ ഒന്പതു ഗ്രഹങ്ങളെ ഭാഗ്യനിയാമകരായി ജ്യോതിഷം കല്പിക്കുന്നു.
മനുഷ്യശിശു ജനിക്കുന്ന സമയത്തെ ആധാരമാക്കി ശിശുവിന്റെ ജനനദശ ഇതില് ഏതെങ്കിലും ഒരു ഗ്രഹത്തിന് ആധിപത്യമുള്ളതായി കണക്കാക്കുന്നു. നവഗ്രഹങ്ങളില് ഓരോന്നിനും അതതിന്റെ ഭ്രമണപഥത്തില് ഒരു തവണ സഞ്ചരിക്കാന് ആവശ്യമുള്ള കാലത്തെ അതതുഗ്രഹത്തിന്റെ ആധിപത്യകാലം അഥവാ ദശ എന്നുപറയുന്നു. എല്ലാ ഗ്രഹങ്ങളുടെയും ആധിപത്യകാലം ഒരു വ്യക്തിയുടെ ജീവിതത്തില് ഉണ്ടാകണമെങ്കില് നൂറ്റിയിരുപതുവര്ഷം ജീവിക്കണം.
ഓരോ ദശയിലും അതതു ദശയുടെ നാഥന്മാര് അനുകൂലമായ സ്ഥാനങ്ങളിലാണെങ്കില് ജാതകന് സുഖവും തൃപ്തിയും അനുഭവിക്കും. ദശാനാഥന്മാര് അനുകൂലമല്ലാത്ത സ്ഥാനത്തെത്തിയാല് ജാതകനു പലതരത്തിലുള്ള ക്ലേശങ്ങള് അനുഭവിക്കേണ്ടിവരും. ഏതു ദശാനാഥന് ഏതു സ്ഥാനത്തുനിന്നാലും മൂകാംബികാ ഭക്തന് ദുഃഖം അനുഭവിക്കേണ്ടി വരുകയില്ല. ഗ്രഹങ്ങളും നക്ഷത്രങ്ങളുമൊക്കെ ദേവിയുടെ അനന്തശക്തിയുടെ അല്പമാത്ര സ്ഫുരണങ്ങള് മാത്രമല്ലേ?
