ഡമാസ്‌ക്കസ്: സമാധാനപരമായ ജീവിതവും മാന്യമായ ജീവനോപാധിയും തേടി രാജ്യം വിടുന്ന മുസഌം രാജ്യങ്ങളില്‍ നിന്നുള്ള അഭയാര്‍ഥികള്‍ക്ക് അന്താരാഷ്‌ട്ര ഇസഌമിക ഭീകര സംഘടനയായ ഐഎസിന്റെ ഭീഷണി. പാശ്ചാത്യ രാജ്യങ്ങളിലേക്ക് പലായനം ചെയ്യുന്നത് പാപമാണ്. യൂറോപ്പിലേക്കുള്ള യാത്രക്കിടെ ബോട്ട് മുങ്ങി മരണമടഞ്ഞ അയ്‌ലാന്‍ കുര്‍ദിയെന്ന ബാലന്റെ ദയനീയമായ ചിത്രത്തിനൊപ്പം ചേര്‍ത്തിരിക്കുന്ന ഐഎസ് ഭീഷണിയില്‍ പറയുന്നു.
ഗ്രീസിലേക്കുള്ള പലായനത്തിനിടെ ബോട്ട് മുങ്ങി തുര്‍ക്കി കടല്‍ത്തീരത്താണ് അയ്‌ലന്റെ ജഡം അടിഞ്ഞത്. ഈ ചിത്രം വളരെയേറെ ശ്രദ്ധയാകര്‍ഷിച്ചിരുന്നു. ഐഎസിന്റെ ദാബിഖ് എന്ന പ്രസിദ്ധീകരണത്തിലാണ് ഭീഷണി. ദാറുള്‍ ഇസഌം അഥവാ സിറിയയിലെയും ഇറാഖിലെയും ഖലീഫയുടെ സാമ്രാജ്യം ഉള്‍പ്പെട്ട ഇസഌമിന്റെ രാജ്യം ഉപേക്ഷിക്കുന്നതിലെ ആപത്ത് എന്നാണ് ഭീഷണിയുടെ തലക്കെട്ട്.
ചില സിറിയക്കാരും ലിബിയക്കാരും നിരവധി ജീവനുകളും ആത്മാവുകളും അപകടത്തില്‍ പെടുത്തി, അവരില്‍ പലരേയും ബലികഴിച്ച് കുരിശുയുദ്ധക്കാരുടെ നാടുകളിലേക്ക് ആപല്‍ക്കരമായ യാത്ര ചെയ്യുകയാണ്. കുട്ടികളെ പാശ്ചാത്യരാജ്യങ്ങളില്‍ എത്തിക്കുന്നവര്‍ കൊടിയ പാപമാണ് ചെയ്യുന്നത്.അവിഹിത ബന്ധം, സ്വവര്‍ഗരതി, മയക്കുമരുന്ന്, മദ്യം എന്നിവയുടെ ഭീഷണിയിലേക്കാണ് അവരെ അയക്കുന്നത്.ഐഎസ് പറയുന്നു.
സിറിയയുടേയും ഇറാഖിന്റെയും വലിയ ഭാഗങ്ങള്‍ കൈയടക്കിയ ഐഎസ് അവിടെ ഖലീഫയുടെ സാമ്രാജ്യം സ്ഥാപിച്ചിരിക്കുകയാണ്. ഐഎസ് മേധാവി അബൂബക്കര്‍ അല്‍ ബാഗ്ദാദിയാണ് ഖലീഫ.
സിറിയ, ഇറാഖ്, അടക്കം പല രാജ്യങ്ങളിലും ഐഎസ് കൊടിയ അക്രമമാണ് അഴിച്ചുവിടുന്നത്. കൂട്ടമാനഭംഗങ്ങളും കൂട്ടക്കൊലകളും പീഡനങ്ങളും സ്ത്രീകളെയും കുട്ടികളെയും ലൈംഗിക അടിമകളാക്കുകയും ഒക്കെയാണ് അവര്‍ ചെയ്തുവരുന്നത്. എല്ലാം ലോകമൊട്ടാകെ ഖലീഫയുടെ സാമ്രാജ്യം കൊണ്ടുവരാനത്രേ. യസീദികളും ക്രിസ്ത്യാനികളുമാണ് കുര്‍ദുകളും ഇസഌമിലെ തന്നെ ഇതര വിഭാഗക്കാരുമാണ് ഇവരുടെ കിരാതമായ പീഡനങ്ങള്‍ക്ക് കൂടുതലും ഇരയാകുന്നത്.
കൊടിയ പീഡനങ്ങള്‍ അനുഭവിക്കുന്നലക്ഷങ്ങളാണ് സൈ്വരവും സമാധാനവും ജീവിത മാര്‍ഗവും തേടി പാശ്ചാത്യ രാജ്യങ്ങളിലേക്ക് പലായനം ചെയ്യുന്നത്.ഐഎസ് നിയന്ത്രണത്തിലുള്ള ഭാഗങ്ങളില്‍ നിന്നാണ് കൂട്ടപ്പലായനം.
