കടുത്തുരുത്തി: വ്യാജമദ്യത്തിനെതിരെ പോലീസ് നടപടികള് ശക്തമാക്കിയപ്പോള് മറുവശത്തുകൂടി ലഹരിമരുന്നുകള് വ്യാപകമായെന്നാക്ഷേപം. ഓണക്കാലത്ത് വ്യാജമദ്യത്തിനറെ വരവ് തടയുന്നതിന് എക്സൈസ് വകുപ്പ് കര്ശന നിരീക്ഷണം ഏര്പ്പെടുത്തിയെങ്കിലും കഞ്ചാവ് അടക്കമുള്ള ലഹരിമരുന്നുകള് പലവഴികളിലൂടെ ആവശ്യക്കാര്ക്ക് ധാരാളമായി ലഭിച്ചു.
ഓണത്തിന് ജില്ലയുടെ വിവിധ പ്രദേശങ്ങളില് വ്യാപകമായി വ്യാജ വിദേശ മദ്യം ഒഴുകുമെന്ന രഹസ്യാന്വേഷണ ഏജന്സികളുടെ മുന്നറിയിപ്പിനെ തുടര്ന്ന് പോലീസും എക്സൈസും നിരീക്ഷണം കര്ശനമാക്കിയത്. അതെസമയം അന്യസംസ്ഥാനങ്ങളില്നിന്നും ഓണാവധിക്കായി നാട്ടിലെത്തിയ വിദ്യാര്ത്ഥികളെയും മറ്റും ഉപയോഗപ്പെടുത്തി മയക്കുമരുന്നുകള് വ്യാപകമായി എത്തിച്ചു. കാന്സര് രോഗികളടക്കമുള്ളവര് ഉപയോഗിക്കുന്ന വീര്യംകൂടിയ വേദനാസംഹാരികളാണ് ലഹരിമരുന്നായി എത്തിച്ചതെന്നാണ് സൂചന. ഇതിനുപുറമേ കഞ്ചാവ് അടക്കമുള്ള ലഹരിമരുന്നുകളും സുലഭമായി ലഭിക്കും. ഹൈറേഞ്ച് മേഖലകളിലൂടെ അന്യസംസ്ഥാനത്തുനിന്നും റോഡു മാര്ഗ്ഗം കിലോക്കണക്കിന് കഞ്ചാവാണ് ജില്ലയുടെ വിവിധ ഭാഗങ്ങളില് എത്തിച്ചത്. ഇതില് ഒരംശമാത്രമേ പോലീസിന് കണ്ടെത്താനായുള്ളുവെന്നും പറയപ്പെടുന്നു.
പാലാ, ഈരാറ്റുപേട്ട, ഏറ്റുമാനൂര്, കുറവിലങ്ങാട്, വൈക്കം മേഖലകളില് സ്ഥിരമായി കഞ്ചവ് പൊതികള് എത്തിക്കുന്ന ചെറിയ സംഘങ്ങള് വഴിയാണ് ഇവയുടെ വില്പ്പന. കഞ്ചാവ് വില്പ്പനയ്ക്ക് എക്സൈസ് വകുപ്പിലെയും പോലീസിലെയും ചിലര് കൂട്ടുനില്ക്കുന്നതായും ആക്ഷേപം ഉണ്ട്. വിവിധ ജോലികള്ക്കായി അന്യ സംസ്ഥാനത്തുനിന്നും ഈ മേഖലകളിലെത്തിയ തൊഴിലാളികളാണ് ഇത്തരം ലഹരിമരുന്നുകളുടെ പ്രധാന ഉപഭോക്താക്കള്. സ്കൂള് വിദ്യാര്ത്ഥികളടക്കമുള്ളവരും ലഹരിമരുന്ന് ഉപയോഗിക്കുന്നുണ്ട്.
ലഹരിമരുന്നുകള്ക്ക് പുറമെ അനധികൃത മദ്യവില്പനയും പലയിടങ്ങളിലും വ്യാപകമാണ്. കടപ്ലാമറ്റം, വയല, കടപ്പൂര്, വെമ്പള്ളി, പുതുവേലി പ്രദേശങ്ങളില് അനധികൃതമായി വിദേശ മദ്യ വില്പന തകൃതിയായി നടക്കുന്നതായി പരാതിയുണ്ട്. ബന്ധപ്പെട്ട ഉദ്യോഗസ്ഥര് ഇവിടങ്ങളില് പരിശോധനയ്ക്കെത്തിയാല് പരിശോധനാ വിവരം മുന്കൂട്ടിയറിയാന് എക്സൈസ് വകുപ്പിനുള്ളില്തന്നെ മദ്യവില്പ്പന മാഫിയ സംവിധാനം ഒരുക്കിയിട്ടുണ്ട്. പലപ്പോഴും പരിശോധനാ സംഘത്തെ ആള്ബലമുപയോഗിച്ച് തടഞ്ഞ് തിരിച്ചയക്കുന്ന സംഭവമുണ്ടായിട്ടുണ്ട്. അനധികൃത മദ്യവില്പനകള് സംബന്ധിച്ച് രഹസ്യ വിവരം റേഞ്ച് ഓഫീസുകളില് അറിയിച്ചാല് വിവരം നല്കുന്നവരുടെ വിശദാംശങ്ങള് മാഫിയ സംഘങ്ങള്ക്ക് ചില ഉദ്യോഗസ്ഥര് ചോര്ത്തി നല്കുന്നതായും ആക്ഷേപമുണ്ട്.
