കോട്ടയം: നഗരത്തിലെ കോടിമത പാലത്തില്‍ നടന്ന വാഹനാപകടം യുവാവിന്റെ ജീവന്‍ അപഹരിച്ചു. ബിടെക് വിദ്യാര്‍ത്ഥികളായ സുഹൃത്തുക്കള്‍ ബൈക്കിന്റെ വേഗത പരീക്ഷിക്കുന്നതിനിടയിലായിരുന്നു അപകടം. നാട്ടകം മുപ്പായികാട് കരയില്‍ സാവിത്രിസദനത്തില്‍ (കരിമ്പില്‍) സദാശിവന്റെ മകന്‍ സച്ചിന്‍ (20) ആണ് മരിച്ചത്. സച്ചിന്റെ സുഹൃത്തായ താഴത്തങ്ങാടി സ്വദേശി ഹാഷിം ഹംസം കൊണ്ടുവന്ന 200 സിസി ബൈക്കിന്റെ വേഗത പരിശോധിക്കുമ്പോഴായിരുന്നു അപകടം. പണിമുടക്ക് ദിവസമായതിനാല്‍ റോഡില്‍ വാഹനങ്ങള്‍ കുറവായിരുന്നു. ഇവിടെയാണ് സുഹൃത്തുക്കള്‍ പലപ്രാവശ്യം അമിതമായവേഗതയില്‍ ബൈക്ക് ഓടിച്ചത്. പലപ്രാവശ്യം അങ്ങോട്ടുമിങ്ങോട്ടും ഇവര്‍ ബൈക്കില്‍ പായുന്നത് കണ്ടതായി ദൃക്‌സാക്ഷികള്‍ പറയുന്നു. കോട്ടയം നഗരഭാഗത്തുനിന്നും നാട്ടകം ഭാഗത്തേക്ക് വരുമ്പോള്‍ കോടിമത പാലത്തില്‍ കയറിയ ബൈക്ക് ഉയര്‍ന്ന് ചാടി നിയന്ത്രണം വിടുകയായിരുന്നു. റോഡില്‍ വട്ടം കറങ്ങിയ ബൈക്ക് എതിര്‍ദിശയില്‍വന്ന ഒരു കാറിലും ഇടിച്ചു.
ബൈക്കിന്റെ പുറകിലിരുന്ന സച്ചിന്റെ കാല് ഒടിഞ്ഞ്തൂങ്ങിയ നിലയിലായിരുന്നു. സംഭവം നടന്നയുടനെ സ്ഥലത്തെത്തിയ വെസ്റ്റ് സ്റ്റേഷനിലെ അഡീഷണല്‍ എസ്‌ഐ വി.ആര്‍. ഗണേഷും നാട്ടുകാരും ചേര്‍ന്ന് ഇരുവരേയും മെഡിക്കല്‍ കോളേജ് ആശുപത്രിയിലെത്തിച്ചുവെങ്കിലും സച്ചിന്റെ ജീവന്‍ രക്ഷിക്കാനായില്ല. ബൈക്ക് ഓടിച്ചിരുന്ന ഹാഷിം ഹംസ ഇപ്പോള്‍ തെള്ളകത്തെ സ്വകാര്യ ആശുപത്രിയില്‍ ചികിത്സയിലാണ്. ചിങ്ങവനം പോലീസ് മേല്‍നടപടികള്‍ സ്വീകരിച്ചു. പോസ്റ്റുമോര്‍ട്ടത്തിനുശേഷം സച്ചിന്റെ മൃതദേഹം ബന്ധുക്കള്‍ക്ക് വിട്ടുകൊടുത്തു. സംസ്‌കാരം ഇന്ന് നടക്കും. കെഎസ്ആര്‍ടിസി ഡ്രൈവറായ സദാശിവന്റെ മൂത്തമകനാണ് പയ്യപ്പാടി ജിസാറ്റില്‍ ബിടെക് വിദ്യാര്‍ത്ഥിയായ സച്ചിന്‍. ഷീനയാണ് അമ്മ. പ്ലസ്‌വണ്‍ വിദ്യാര്‍ത്ഥി നിധിന്‍ സഹോദരനാണ്.
അശ്രദ്ധമായ ഡ്രൈവിംഗും അമിതമായവേഗതയും മൂലം ഇന്നലെയും മിനിഞ്ഞാന്നുമായി രണ്ട് ജീവനുകളാണ് നഗരങ്ങളില്‍ ഹോമിക്കപ്പെട്ടത്. ചൊവ്വാഴ്ച കുടയംപടി മെഡിക്കല്‍ കോളേജ് റോഡില്‍ അശ്രദ്ധമായി ഓടിച്ചമിനിലോറിക്കടിയില്‍പ്പെട്ട് ബൈക്ക് യാത്രികന്‍ മരിച്ചിരുന്നു. കടപ്പൂര് ചാമന്താനത്ത് ഗോപാലകൃഷ്ണന്‍ നായരുടെ മകന്‍ രഞ്ജിത്ത് ജി. നായരാണ് മരിച്ചത്. സ്വകാര്യകമ്പനിയുടെ കറിപൗഡറുമായി വന്ന വാഹനത്തിന്റെ അടിയില്‍പ്പെട്ട രഞ്ജിത്തിന്റെ ശരീരത്തിലൂടെ വാഹനം കയറിയിറങ്ങുകയായിരുന്നു.
