ചെന്നൈ: തമിഴ് സിനിമാ ഇതിഹാസമായ ശിവാജി ഗണേശന്റെ ബഹുമാനാര്ത്ഥം സ്മാരകം നിര്മ്മിക്കുമെന്ന് തമിഴ്നാട് മുഖ്യമന്ത്രി ജയലളിത പറഞ്ഞു. തമിഴ്നാട് നിയമസഭയിലാണ് ജയലളിത ഇക്കാര്യം വ്യക്തമാക്കിയത്.
സൗത്ത് ഇന്ത്യന് ഫിലിം ആര്ട്ടിസ്റ്റ് അസോസിയേഷന്റെ അഭ്യര് ത്ഥന പ്രകാരം സ്മാരകത്തിന് 2002 സപ്തംബര് 26ന് പിഡബ്ല്യൂഡി യോട് അഡയാറില് 65 സെന്റ് സ്ഥലം നല്കാന് ഉത്തരവിട്ടിരു ന്നതായും ജയലളിത പറഞ്ഞു. ഭൂമി അസോസിയേഷന് നല്കുകയും ചെയ്തിരുന്നു. ജഡ്ജസ് ക്വാര്ട്ടേഴ്സിലേക്ക് ഈ ഭൂമിയുടെ മധ്യത്തിലൂടെ ഒരു റോഡ് പോകുന്നുണ്ടായിരുന്നു. മറ്റൊരു റോഡ് നിര്മ്മിക്കുന്നതിനായി അസോസിയേഷനോട് 4.20 ലക്ഷം രൂപ സര്ക്കാര് ആവശ്യപ്പെട്ടിരുന്നു.
എന്നാല് അസോസിയേഷന് 2004 ജൂലൈ 26ന് രണ്ടു ലക്ഷം രൂപമാത്രമാണ് നല്കിയത്. സ്മാരകം തങ്ങള് നിര്മ്മിച്ചോളാമെന്നാണ് അസോസിയേഷന് പറഞ്ഞിരുന്നത്. എന്നാല് ഇപ്പോള് സര്ക്കാര് നിര്മ്മിക്കണമെന്ന് ആവശ്യപ്പെട്ടിരിക്കുകയാണ്. ഈ സാഹചര്യത്തിലാണ് സ്മാരകം നിര്മ്മിക്കുവാന് സര്ക്കാര് തീരുമാനിച്ചത്. റോഡിന് അവശേഷിക്കുന്ന 2.20 ലക്ഷം രൂപയും സര്ക്കാര് നല്കും. സ്മാരകം നിര്മ്മിക്കുന്ന കാര്യത്തില് സര്ക്കാരിന് അതിയായ സന്തോഷമുണ്ടെന്നും ജയലളിത പറഞ്ഞു. 2001ല് 72-ാമത്തെ വയസ്സിലാണ് ശിവാജി ഗണേശന് അന്തരിച്ചത്.
