ന്യൂദല്ഹി: ഭാരതത്തിലെ ജനസംഖ്യ 121.09 കോടിയാണെന്ന് സെന്സസ്. 96.63 കോടി ഹിന്ദുക്കളും 17.22 കോടി മുസ്ലിംകളും 2.78 കോടി ക്രിസ്ത്യാനികളും ഉണ്ടെന്ന് ജാതി സെന്സസ് വ്യക്തമാക്കി. 2011ലെ സെന്സസ് വിവരങ്ങളാണ് ഇന്നലെ രജിസ്ട്രാര് ജനറല് ഓഫ് സെന്സസ് കമ്മീഷണര് പുറത്തുവിട്ടത്.
പത്തുവര്ഷത്തിനിടെ രാജ്യത്തെ മുസ്ലിം ജനസംഖ്യയുടെ വളര്ച്ചാ നിരക്കില് 0.8 ശതമാനത്തിന്റെ വര്ദ്ധനവുണ്ടായി. ഹിന്ദുജനസംഖ്യ വളര്ച്ചാ നിരക്കില് 0.7 ശതമാനത്തിന്റെ കുറവും സംഭവിച്ചു. ആകെ ജനസംഖ്യയുടെ 79.8 ശതമാനമാണ് ഹൈന്ദവ ജനസംഖ്യ. 14.2 ശതമാനം മുസ്ലിംകളും 2.3 ശതമാനം ക്രിസ്ത്യാനികളുമുണ്ട്. സിഖുകാര് 2.08കോടി (1.7ശതമാനം), ബുദ്ധന്മാര് 84ലക്ഷം (0.7ശതമാനം), ജൈനന്മാര് 45ലക്ഷം (0.4ശതമാനം), മറ്റു ജനവിഭാഗങ്ങള് 79ലക്ഷം (0.7ശതമാനം) എന്നിങ്ങനെയാണെന്ന് സെന്സസ് കണക്കുകള് വ്യക്തമാക്കുന്നു. മതം തിട്ടപ്പെടുത്തിയിട്ടില്ലാത്ത 29 ലക്ഷംപേരും രാജ്യത്തുണ്ട്.
2011 ലെ സെന്സസ് പ്രകാരം ഹിന്ദു ജനസംഖ്യയില് 16.8 ശതമാനത്തിന്റെ വര്ദ്ധനവുണ്ടായപ്പോള് മുസ്ലിം ജനസംഖ്യയില് 24.6 ശതമാനമാണ് വര്ദ്ധിച്ചത്. ക്രിസ്ത്യാനികള് 15.5 ശതമാനം വര്ദ്ധിച്ചു. സിഖ് സമുദായം 8.4 ഉം ബുദ്ധന്മാര് 6.1ഉം ജൈനന്മാരില് 5.4 ശതമാനം വര്ദ്ധനവും ഉണ്ടായി.
സിഖ്,ബുദ്ധ മതക്കാരുടെ ജനസംഖ്യയില് മാറ്റങ്ങളില്ല. എന്നാല് ക്രിസ്ത്യന്,ജൈന വിഭാഗക്കാരുടെ എണ്ണത്തില് വലിയ കുറവുണ്ടായിട്ടുണ്ട്. 2001ല് രാജ്യത്തെ ആകെ ജനസംഖ്യ 102 കോടി ആയിരുന്നു. ഹിന്ദുജനസംഖ്യ 82.75 കോടിയും മുസ്ലിം ജനസംഖ്യ 13.8കോടിയുമായിരുന്നു. 2001ല്നിന്നും 2011ല് എത്തുമ്പോള് ജനസംഖ്യാ വര്ദ്ധനവിന്റെ ശരാശരി 17.7 ശതമാനമായി ഉയര്ന്നിട്ടുണ്ട്.
സാമൂഹ്യ-സാമ്പത്തിക സെന്സസ് വിവരങ്ങള് ജൂലൈ മൂന്നിന് പുറത്തുവിട്ടെങ്കിലും ജാതി-മത സെന്സസ് കേന്ദ്രസര്ക്കാര് പുറത്തുവിട്ടിരുന്നില്ല. വിവിധ രാഷ്ട്രീയ പാര്ട്ടികള് ആവശ്യപ്പെട്ടതിനെ തുടര്ന്നാണ് സെന്സസ് വിവരങ്ങള് പരസ്യപ്പെടുത്തിയത്.
