കൊല്ലം: കാണംവിറ്റും ഓണമുണ്ണണമെന്ന പഴമൊഴി തിരുത്തി കാണം വില്ക്കാതെ ഓണമുണ്ണാന് ആര്ഡിപി വിപണനമേളക്ക് കൊല്ലത്ത് തുടക്കമായി.
ന്യായവിലക്ക് മായംകലരാത്ത ഉത്പന്നങ്ങളാല് സമ്പന്നമാണ് ക്യുഎസി മൈതാനിയില് ഇന്നലെ ആരംഭിച്ച വിപണനമേള. ഓണം പ്രമാണിച്ച് ന്യായവിലക്ക് വിവിധ ഉത്പന്നങ്ങള് ഒരു കുടക്കീഴില് ലഭ്യമാക്കുക എന്ന ലക്ഷ്യത്തോടെയാണ് കൊല്ലം ജില്ലാ പഞ്ചായത്ത്, ദാരിദ്ര്യ ലഘൂകരണവിഭാഗം വിപണനമേള തുടങ്ങിയത്.
പ്രവേശനകവാടത്തില് തന്നെ ലഘുഭക്ഷണവും ചായയും ലഭ്യമാണ്. ക്ഷീണമകറ്റി അകത്തു പ്രവേശിച്ചാല് ഏതു സാധനം വാങ്ങണമെന്ന അങ്കലാപ്പിലാകുന്ന വിധത്തിലാണ് ഉത്പന്നങ്ങളുടെ വൈവിധ്യം. ഓണം ആഘോഷിക്കാന് വേണ്ടതെല്ലാം സ്റ്റാളിലുണ്ട്. പലചരക്ക് സാധനങ്ങള്, തുണിത്തരങ്ങള്, നാടന്പച്ചക്കറി, കുടംപുളി, വാളന്പുളി, വിവിധതരം അച്ചാറുകള്, ചവിട്ടികള്, വിവിധതരം കാര്ഷികോല്പ്പന്നങ്ങള്, കറിക്കത്തി, സുഗന്ധവ്യഞ്ജന സാമഗ്രികള്, സൗന്ദര്യവര്ധക സാധനങ്ങള്, കല്ലുമാലകള്, വളകള്, തഴപ്പായ തുടങ്ങി കപ്പയും മീന്കറിയും വരെ മേളയില് ലഭ്യമാണ്. പുറത്തിറങ്ങിയാല് ഫലവൃക്ഷത്തൈകള്, അലങ്കാരച്ചെടികള് എന്നിവയും ലഭിക്കും.
കെ.എന്.ബാലഗോപാല് എംപി വിപണനമേള ഉദ്ഘാടനം ചെയ്തു. എ.എ.അസീസ് എംഎല്എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് എസ്.ജയമോഹന്, ഡെപ്യൂട്ടി കളക്ടര് അനു എസ് നായര്, കൗണ്സിലര് സി.വി.അനില്കുമാര്, ജില്ലാ പഞ്ചായത്ത് സെക്രട്ടറി കെ അനില്കുമാര്, ദാരിദ്ര്യ ലഘൂകരണ പ്രൊജക്ട് ഡയറക്ടര് ഡി ജോണ്സണ് എന്നിവര് സംസാരിച്ചു.
