വാദ്യമേളങ്ങളുടേയും നിരവധിയായ നിശ്ചല ദൃശ്യങ്ങളും ഘോഷയാത്രയ്‌ക്ക് ചാരുതയേകി. പുലികളി, വിവിധ കളരി സംഘങ്ങളുടെ അഭ്യാസ പ്രകടനങ്ങളും, അര്‍ജ്ജുന നൃത്തവും ശിവപാര്‍വ്വതി നൃത്തവും ഏറെ ആകര്‍ഷണീയമായി. ദേവീ ദേവന്മാരുടെ വേഷങ്ങളിഞ്ഞ കൊച്ചകുട്ടികളും ഘോഷയാത്രയില്‍ അണിനിരന്നു. കേരളീയ വേഷത്തിലെത്തിയ അമ്മമാരും നഗരത്തിലെ പൗര പ്രമുഖന്മാരും ഘോഷയാത്രയ്‌ക്ക് നേതൃത്വം നല്‍കി. ചരിത്ര സ്മരണകളുടെ ഓര്‍മ്മപുതുക്കിക്കൊണ്ട് തൃപ്പൂണിത്തുറയില്‍ നടക്കുന്ന അത്തച്ചമയ ഘോഷയാത്രയുടെ തനിപകര്‍പ്പായിമാറി തിരുനക്കരയിലെ അത്തച്ചമയ ഘോഷയാത്രയും. ഘോഷയാത്രയുടെ ഏറ്റവും പിന്നിലായി ആനപ്രേമികളുടെ മനമിളക്കിക്കൊണ്ട് ഗജരാജ മാണിക്യപട്ടം നേടിയ തിരുനക്കര ശിവനും ഇക്കുറി ആദ്യമായി ഘോഷയാത്രയില്‍ പങ്കാളിയായി.
ഘോഷയാത്രയ്‌ക്ക് മുന്നോടിയായി പോലീസ് പരേഡ് ഗ്രൗണ്ടില്‍ നടന്ന ഓണവിളംബര സമ്മേളനം മുന്‍സിപ്പല്‍ ചെയര്‍മാന്‍ കെആര്‍ജി വാര്യര്‍ ഉദ്ഘാടനം ചെയ്തു. സംഘാടകസമിതി ചെയര്‍മാന്‍ വി.എന്‍.വാസവന്‍ അദ്ധ്യക്ഷതവഹിച്ചു. ജില്ലാ പോലീസ് മേധാവി എം.പി ദിനേശ് ഘോഷയാത്ര ഫഌഗ്ഓഫ് ചെയ്തു. തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് എം.പി ഗോവിന്ദന്‍നായര്‍ ഗജരാജന്‍ തിരുനക്കര ശിവന് ഗജരാജമാണിക്യപട്ടം നല്‍കി ആദരിച്ചു. മന്നം സാസ്‌കാരിക സമിതി പ്രസിഡന്റ് എസ്.ജയകൃഷ്ണന്‍ അത്തപതാക എസ്എന്‍ഡിപി കോട്ടയം യൂണിയന്‍ പ്രസിഡന്റ് എ.ജി.തങ്കപ്പന് കൈമാറി. അഞ്ചാംതവണയാണ് ഘോഷയാത്ര സംഘടിപ്പിച്ചത്. മന്നം സാംസ്‌കാരികസമിതിയും നഗരസഭയും പ്രസ് ക്ലബും ചേര്‍ന്നാണ് അത്തച്ചമയ ഘോഷയാത്ര സംഘടിപ്പിച്ചുകൊണ്ടിരിക്കുന്നത്.
