ചേര്ത്തല: ചേര്ത്തല: പൊതുവിദ്യാലയങ്ങളിലെ എട്ട്, ഒന്പത് ക്ലാസുകളില് പഠിക്കുന്ന ഭിന്ന ശേഷിയുള്ള വിദ്യാര്ത്ഥികളെ പഠനത്തിന് സഹായിക്കുന്നതിനായി നിയമിച്ചിട്ടുള്ള അധ്യാപകര്ക്ക് ശമ്പളം ലഭിക്കാതായിട്ട് നാല് മാസം. കേന്ദ്ര ആവിഷ്കൃത പദ്ധതിയായ ഇന്ക്ലുസീവ് എഡ്യുക്കേഷന് ഫോര് ഡിസേബിള്ഡ് അറ്റ് സെക്കന്ഡറി സ്റ്റേജ് എന്ന പദ്ധതി പ്രകാരം 687 റിസോഴ്സ് അധ്യാപകരാണ് സംസ്ഥാനത്തെ വിവിധ വിദ്യാലയങ്ങളില് ജോലി ചെയ്യുന്നത്.
പോസ്റ്റ് ഗ്രാജുവേഷനോടൊപ്പം സ്പെഷല് എഡ്യുക്കേഷനില് ബിഎഡ് നേടിയിട്ടുള്ളവരാണ് അധ്യാപകര്. കേന്ദ്ര സാമ്പത്തിക സഹായത്തോടെയുള്ള പദ്ധതിയുടെ നടത്തിപ്പിന്റെ ചുമതല സംസ്ഥാന സര്ക്കാരിനാണ്. റിസോഴ്സ് അധ്യാപകര്ക്ക് 2016 മാര്ച്ച് വരെയുള്ള ശമ്പളം നല്കുന്നതിനുള്ള തുക മെയ് മാസത്തില് കേന്ദ്രമാനവ വിഭവ ശേഷി മന്ത്രാലയം സംസ്ഥാന സര്ക്കാരിന് കൈമാറിയിട്ടും ആലപ്പുഴയില് ജോലി ചെയ്യുന്ന അധ്യാപകര്ക്ക് ശമ്പളം ലഭിക്കുന്നില്ലെന്നാണ് ആക്ഷേപം.
കഴിഞ്ഞ വര്ഷം വരെ ഡയറ്റ് മുഖേനയാണ് ഇവരുടെ ശമ്പളം വിതരണം ചെയ്യുന്നത്. എന്നാല് ആലപ്പുഴ, തിരുവനന്തപുരം ജില്ലകളിലെ അധ്യാപകരുടെ ശമ്പളവിതരണം മാത്രം ഡിഡി ഓഫീസ് വഴിയാക്കി. പൊതുവിദ്യാഭ്യാസ ഡയറക്ടറേറ്റിലെ ഐഇഡി സെല് ഉദ്യോഗസ്ഥന്റെ ഉദാസീനത മൂലമാണ് ശമ്പളവിതരണം തടസപ്പെടുന്നതെന്നാണ് അധ്യാപകരുടെ പരാതി. 22600 രൂപ പ്രതിമാസ ശമ്പളമായി കേന്ദ്രം അനുവദിച്ചിട്ടും 18665 രൂപ മാത്രമേ നല്കുന്നുള്ളെന്നും വിമര്ശനമുണ്ട്. ശമ്പളവിതരണം വൈകുന്നതില് പ്രതിഷേധിച്ച് ഓണനാളില് ഉപവാസ സമരം നടത്താനാണ് അധ്യാപകരുടെ തീരുമാനം.
