കൊട്ടാരക്കര: ഉണ്ണിഗണപതിയുടെ തിരുനാള് ദിനത്തില് മഹാഗണപതിഹവനവും ഗജപൂജയും തൊഴുത് ആയിരങ്ങള് സായൂജ്യമടഞ്ഞു. രാവിലെ 5.30 ന് തന്ത്രി തരണനല്ലൂര് എന്.പി.പരമേശ്വരന് നമ്പൂതിരിപ്പാട് പുറത്തെ മഹാഹോമകുണ്ഡത്തില് അഗ്നിജ്വലിപ്പിച്ചതോടെ 1008 നാളീകേരത്തിന്റെ അഷ്ടദ്രവ്യ മഹാഗണപതിഹോമത്തിന് തുടക്കമായി.
മഹാഗണേശമന്ത്രത്തോടെ മേല്ശാന്തി സുബ്രഹ്മണ്യന്പോറ്റി, കീഴ്ശാന്തി മോഹനന്പോറ്റി എന്നിവരുടെ കാര്മ്മികത്വത്തില് ബ്രാഹ്മണേശ്രഷ്ഠര് യജ്ഞദ്രവ്യങ്ങള് ഒന്നൊന്നായി ഹോമകുണ്ഡത്തില് സമര്പ്പിച്ചു. ഇതോടെ യജ്ഞധൂപത്താലും മഹാഗണേശമന്ത്രത്താലും അന്തരീക്ഷം ഭക്തിസാന്ദ്രമായി. യജ്ഞം കണ്ട് തൊഴാനും ഹോമകുണ്ഡത്തെ വലംവയ്ക്കാനും വന് തിരക്കാണ് അനുഭവപ്പെട്ടത്.
നവീകരിച്ച ഹോമകുണ്ഡ സമര്പ്പണവും തന്ത്രി രാവിലെ നിര്വഹിച്ചു. രാവിലെ എട്ടിന് പുതുതായി പണികഴിപ്പിച്ച രസീത് കൗണ്ടറിന്റെ ഉദ്ഘാടനം ബോര്ഡംഗം സുഭാഷ് വാസുവും നാളീകേരക്കൂടിന്റെ ഉദ്ഘാടനം പി.കെ.കുമാരനും നിര്വഹിച്ചു. 8.30ന് ഗജപൂജക്കായി മൂന്ന് ഗജരാജാക്കന്മാരെ ക്ഷേത്രത്തിലേക്കാനയിച്ചു. ഗജമുത്തച്ഛന് കൊട്ടാരക്കര കൃഷ്ണന്കുട്ടിയുടെ പ്രതിമക്ക് സമീപമെത്തി പ്രണാമം അര്പ്പിച്ച ശേഷം ആനകളെ ക്ഷേത്രാഭിമുഖമായി പ്രത്യേകം തയ്യാറാക്കിയ സ്ഥലത്ത് എത്തിച്ചു.
തുടര്ന്ന് തന്ത്രി ഗജപൂജ നടത്തിയ ശേഷം ആനകള്ക്ക് ഉണ്ണിയപ്പം, മോദകം, ചോറ്, കരിമ്പ്, പഴം എന്നിവ നല്കി. പയ്യന്നൂര് ശ്രീധരന് നമ്പൂതിരിയുടെ മുഖ്യകാര്മ്മികത്വത്തില് ശനിദോഷ നിവാരണപൂജ നടന്നു. സ്വാമിനി സര്വമയീദേവി ഭദ്രദീപം തെളിയിച്ചു. പയ്യന്നൂര് ശ്രീധരന് നമ്പൂതിരിയായിരുന്നു ആചാര്യന്. മാതൃസമ്മേളനം മങ്ങാട് ശാന്താനാന്ദാശ്രമത്തിലെ സ്വാമിനി ജ്ഞാനാഭനിഷ്ഠ ഉദ്ഘാടനം ചെയ്തു.
മാതൃസമിതി ജില്ലാപ്രസിഡന്റ് യശോദ ടീച്ചര് അദ്ധ്യക്ഷയായി. പ്രൊഫ. വി.ടി.രമ, ഡോ.കെ.വത്സലാമ്മ, കെ.കെ. വിജയമ്മ എന്നിവര് സംസാരിച്ചു. വൈകിട്ട് 5.30ന് നടക്കുന്ന സാംസ്കാരിക സമ്മേളനം മുന് കേന്ദ്രമന്ത്രി ഒ. രാജഗോപാല് ഉദ്ഘാടനം ചെയ്തു. ഐഎംഎ മുന് സംസ്ഥാനപ്രസിഡന്റ് ജെ. രാജഗോപാല് അദ്ധ്യക്ഷനായിരുന്നു. ഉപദേശകസമിതി പ്രസിഡന്റ് ആര്.ദിവാകരന്, ജി.മുരളീകൃഷ്ണന്, വി.ടി.ഗോപകുമാര് എന്നിവര് സംസാരിച്ചു.
സിവില് സര്വീസ് റാങ്ക് ജേതാവ് രേണുരാജിനെ അനുമോദിച്ചു. 7.35ന് വര്ഷത്തിലൊരിക്കല് മാത്രം നടക്കുന്ന മഹാഗണപതിയുടെ എഴുന്നള്ളത്തും വിളക്കും നടന്നു. കേരളാക്ഷേത്രസംരക്ഷണസമിതിയും ക്ഷേത്രഉപദേശസമിതിയും സംയുക്തമായാണ് ആഘോഷങ്ങള്ക്ക് നേതൃത്വം നല്കിയത്.
