മുംബൈ: ശ്വാസകോശത്തില് കെട്ടിക്കിടക്കുന്ന ദ്രാവകം ചോര്ത്തിക്കളയാനുള്ള ചെറിയ ഓപ്പറേഷനില് രോഗി മരിച്ചു. ശ്വാസകോശത്തിന്റെ അറ മാറി ദ്വാരമിട്ടതാണ് കാരണം. വാമന് സാരെ എന്ന 65 കാരനാണ് ഡോക്ടറുടെ കൈപ്പിഴ മൂലം ജീവന് നഷ്ടപ്പെട്ടത്. വെറും പതിനഞ്ചു മിനിറ്റ് വേണ്ട ഓപ്പറേഷനായിരുന്നു ഇത്. മുംബൈ സയണ് ആശുപത്രിയിലായിരുന്നു ദുരന്തം.
മേലധികാരികളുടെയും തങ്ങളുടെയും അനുമതി തേടാതെ ജൂനിയര് ലേഡി ഡോക്ടര് തിരക്കിട്ട് ഓപ്പറേഷന് നടത്തിയതാണ് തങ്ങളുടെ പ്രിയപ്പെട്ടവന്റെ മരണത്തിന് ഇടയാക്കിയതെന്ന് ആരോപിച്ച് ബന്ധുക്കള് ആശുപ്രതിയില് ബഹളമുണ്ടാക്കി. ധാരാളം രോഗികളെ ഒന്നിച്ചു കാണുമ്പോള് പരിഭ്രാന്തിയിളകുന്ന ഒരു ഡോക്ടര്ക്കു പകരം വന്നതാണ് ലേഡി ഡോക്ടര്.
രോഗിയുടെ വലതു ശ്വാസകോശത്തിലായിരുന്നു നീര്ക്കെട്ട്. ഇവിടെ ചെറിയ ദ്വാരമിടുന്നതിനും പകരം നന്നായി പ്രവര്ത്തിച്ചിരുന്ന ഇടതു ശ്വാസകോശമാണ് ഡോക്ടര് കിഴിച്ചത്. ശ്വാസതടസവും ഹൃദയാഘാതവും അനുഭവപ്പെട്ട രോഗി ഉടന് മരിച്ചു.
പനി, വയറു വേദന എന്നിവയെത്തുടര്ന്ന് മുലുന്ദ് വീരസവര്ക്കര് ആശുപത്രിയിലാണ് സാരെയെ പ്രവേശിപ്പിച്ചിരുന്നത്. ശ്വാസകോശത്തില് വെള്ളംകെട്ടിക്കിടക്കുന്നതായി വീരസവര്ക്കര് ആശുപ്രതിയിലെ പരിശോധനയില് കണ്ടെത്തിയിരുന്നു. തുടര്ന്നാണ് വിദഗ്ധ ചികില്സയ്ക്ക് സയണിലേക്ക് മാറ്റിയത്.
ഉച്ചയ്ക്ക് ആഹാരം കഴിച്ച് ബസിലാണ് സയണ് ആശുപത്രിയിലേക്ക് പോയത്. വളരെച്ചെറിയ ഒരു ഓപ്പറേഷനിലൂെട ശ്വാസകോശത്തിലെ വെള്ളം ചോര്ത്തിക്കളയാമെന്ന് ഡോക്ടര്മാര് പറഞ്ഞത് ഞങ്ങള് ചര്ച്ച ചെയ്യുകയും ചെയ്തു. രണ്ടോ മൂന്നോ ദിവസത്തിനകം വീട്ടില് പോകാമായിരുന്നു. സയണ് ആശുപത്രിയില് എത്തിച്ചു, രണ്ടു മണിക്കൂറിനുള്ളില് മരിച്ചു. ജൂണിയര് ലേഡി ഡോക്ടര് കേസ് ഷീറ്റു പോലും വായിച്ചു നോക്കാതെയാണ് ശ്വാസകോശത്തിലെ ദ്രാവകം നീക്കാന് ശ്രമിച്ചത്. ശ്വാസകോശത്തില് ദ്വാരമിട്ടയുടന് പിതാവ് ശ്വാസ തടസമുണ്ടെന്ന് പറഞ്ഞിരുന്നു. ഉടന് ഓക്സിജന് നല്കി. പക്ഷെ പതിനഞ്ചു മിനിറ്റിനകം മരിച്ചു. മകന് രാഹുല് പറഞ്ഞു. ഡോക്ടര്ക്കെതിരെ ഒരു നടപടിയും എടുത്തില്ലെന്നും രാഹുല് പറഞ്ഞു.
നൂറിലേറെ രോഗികളാണ് ഒരു വാര്ഡില്. അവരെയും ബന്ധുക്കളെയും കൈകാര്യം ചെയ്യാന് ഞങ്ങള്ക്ക് ഒരു പരിശീലനവും ലഭിക്കാറില്ല. അതിനാല് പലര്ക്കും വാര്ഡിലെത്തുമ്പോള് ആകെ വെപ്രാളമാണ്. മറ്റൊരു ജൂനിയര് ഡോക്ടര് പറഞ്ഞു. ജോലി സമ്മര്ദ്ദം താങ്ങാന് കഴിയാതെ കഴിഞ്ഞ ദിവസം ഒരു ജൂനിയര് ഡോക്ടര് ആത്മഹത്യയ്ക്ക് ശ്രമിച്ചിരുന്നു.
