പൊന്കുന്നം: ചിറക്കടവ് പഞ്ചായത്ത് കുടുംബശ്രീ യൂണിറ്റിലെ ലക്ഷങ്ങളുടെ മുട്ടക്കോഴി ക്രമക്കേട് ഒത്തുതീര്പ്പാക്കാനുള്ള നീക്കം പരാജയപ്പെട്ടു. പദ്ധതി നടത്തിപ്പ് ഏജന്സിയായ പ്ലാന്റേഷന് ഡവലപ്മെന്റ് സൊസൈറ്റി ഭാരവാഹി 10ന് മുമ്പ് ബാങ്കില് പണം തിരിച്ചടയ്ക്കുമെന്ന് പൊന്കുന്നം പോലീസിന് എഴുതി നല്കിയ വാഗ്ദാനം പാലിച്ചില്ല. വഞ്ചനാകുറ്റത്തിന് ഏജന്സിക്കും ബാങ്കിനും പഞ്ചായത്തിനും കുടുംബശ്രീ മിഷനുമെതിരെ കേസെടുക്കണമെന്ന് ക്രമക്കേട് ബോദ്ധ്യപ്പെട്ട ഉടനെ വീട്ടമ്മമാര് പൊന്കുന്നം പോലീസില് പരാതി നല്കിയിരുന്നു. എന്നാല് ഒത്തുതീര്പ്പ് ശ്രമങ്ങള് നടത്തുന്നല്ലാതെ കുറ്റക്കാര്ക്കെതിരെ കേസെടുക്കുന്നതിന് പോലീസ് താല്പര്യം കാട്ടുന്നില്ലെന്ന് വീട്ടമ്മമാര് ആക്ഷേപം ഉന്നയിച്ചു.
ഗുണഭോക്താക്കളെ പങ്കെടുപ്പിക്കാതെയാണ് ഒത്തുതീര്പ്പ് കരാര് ഉണ്ടാക്കിയതെന്ന് നേരത്തെ വീട്ടമ്മമാര് പരാതിപ്പെട്ടിരുന്നു. അഞ്ച് അംഗങ്ങള് വീതമുള്ള ഒരു ഗ്രൂപ്പിന് യൂണിയന് ബാങ്ക് പൊന്കുന്നം ശാഖ ഒരു ലക്ഷത്തിഅയ്യായിരം രൂപ വീതം വായ്പ അനുവദിച്ചതിന്റെ അടിസ്ഥാനത്തിലായിരുന്നു പദ്ധതി നടപ്പിലാക്കിയത്. ഇതിനായി വീട്ടമ്മമാര് വായ്പ എടുക്കാന് തീരുമാനിച്ചതിന്റെ മിനിട്സിന്റെ പകര്പ്പ്, തിരിച്ചറിയല് കാര്ഡ്, വസ്തുവിന്റെ കരം അടച്ച രസീത് എന്നിവ ബാങ്കില് നല്കിയിരുന്നു. എന്നാല് മുട്ടക്കോഴികള് വിതരണത്തിന് എത്തിയപ്പോഴാണ് ഒരുലക്ഷത്തി അയ്യായിരത്തിന് പകരം യൂണിറ്റുകളുടെ അനുവാദമില്ലാതെ ഒരു ലക്ഷത്തിഅന്പത്തിയാറായിരം രൂപ ഏജന്സിക്ക് കൈമാറിയ വിവരം വീട്ടമ്മമാര് അറിയുന്നത്. ഇതോടെ വീട്ടമ്മമാര് പദ്ധതിയില് നിന്നും പിന്മാറിയിരുന്നു. തുടര്ന്നാണ് ഇവര് പോലീസില് പരാതി നല്കിയത്.
എന്നാല് കേസെടുക്കണമെന്ന് ആവശ്യപ്പെട്ട് വീട്ടമ്മമാര് പരാതി നല്കിയിട്ടുണെന്ന് പൊന്കുന്നം പോലീസ് അറിയിച്ചു. പ്രശ്നത്തില് ആരുടെയും പക്ഷം ചേര്ന്നിട്ടില്ല. ഏതുവിധേനയും വീട്ടമ്മമാര്ക്ക് നഷ്ടമായ പണം തിരികെ ലഭിക്കുന്നതിനുള്ള ശ്രമമാണ് പോലീസ് നടത്തിയത്. കേസ് ചാര്ജ്ജ് ചെയ്യണം എന്ന ആവശ്യത്തില് വീട്ടമ്മമാര് ഉറച്ചു നില്ക്കുന്ന പക്ഷം അന്വേഷണം നടത്തി ആവശ്യമായ നടപടി സ്വീകരിക്കുമെന്ന് പോലീസ് അറിയിച്ചു.
