ന്യൂദല്ഹി: ഭാരതീയ സംസ്കാരവും ചിന്തയും രൂപപ്പെടുത്തുന്നതില് രാമായണവും മഹാഭാരതവും നിര്ണായക പങ്കുവഹിച്ചെന്ന് രാഷ്ട്രപതി പ്രണബ് മുഖര്ജി. രണ്ട് ഇതിഹാസങ്ങളും മതത്തിനും ജാതിക്കും വര്ഗത്തിനും വര്ണത്തിനും അതീതമാണെന്നും അദ്ദേഹം പറഞ്ഞു.
കോണ്ഗ്രസ് നേതാവും എംപിയുമായ വീരപ്പമൊയ്ലിക്ക് സരസ്വതി സമ്മാന് കൈമാറിക്കൊണ്ട് സംസാരിക്കുകയായിരുന്നു രാഷ്ട്രപതി.
കുടുംബ നന്മകളുടെയും ഉദാരതയുടെയും സഹനത്തിന്റെയും പാഠങ്ങളാണ് മഹാഭാരതം പകര്ന്നത്. എല്ലാ മനുഷ്യരുടെയും ക്ഷേമം നിധിപോലെ കണ്ട രാമായണം സാഹോദര്യത്തിന്റെയും പിതൃ-പുത്ര വാത്സല്യത്തിന്റെയും നിര്മ്മലമായ വൈവാഹിക ബന്ധത്തിന്റെയും ശീലുകള് നല്കി.
രാഷ്ട്രീയ തത്വചിന്തയുടെയും ആത്മീയ സംവാദത്തിന്റെയും അപൂര്വ്വമായ കൂടിച്ചേരലാണ് ഭാരത ഇതിഹാസങ്ങള്, പ്രണബ് പറഞ്ഞു. മഹാത്മാ ഗാന്ധിയുടെ രാമരാജ്യ സങ്കല്പ്പം ത്യാഗത്തിലും നീതിയിലും തുല്യതയിലും ആദര്ശധീരതയിലും അധിഷ്ഠിതമാണ്.
സത്യമേവ ജയതേയും രാമായണവുമെല്ലാം തെളിയിക്കുന്നത് സത്യംമാത്രമേ ജയിക്കുവെന്ന തത്വത്തെയാണെന്നും പ്രണബ് കൂട്ടിച്ചേര്ത്തു.
