പത്തനംതിട്ട: ദുരൂഹ സാഹചര്യത്തില് കാണാതായ ഭൂലോകലക്ഷ്മി (46) എന്ന വീട്ടമ്മയെ കണ്ടെത്താനുള്ള ക്രൈംബ്രാഞ്ച് അന്വേഷണംപ്രഹസനമെന്ന് പരാതി.ഇന്നലെ പത്തനംതിട്ടയില് സിറ്റിംഗ് നടത്തിയ മനുഷ്യാവകാശ കമ്മീഷന് ജസ്റ്റിസ് ജെ.ബി. കോശിക്ക് ഇതു സംബന്ധിച്ച് ഇവരുടെ ഭര്ത്താവ് ഗവി കെഎഫ്ഡിസി കോളനി നിവാസിയായ ഡാനിയേല്കുട്ടി സ്കറിയ പരാതി നല്കി.ക്രൈംബ്രാഞ്ച് അന്വേഷണത്തില് പുരോഗതി ഇല്ലാത്തതിനാല് സിബിഐ അന്വേഷണം ആവശ്യപ്പെട്ട് ഹൈക്കോടതിയില് റിട്ട് ഹര്ജി നല്കി കാത്തിരിക്കുകയാണ് ദാനിയേല്കുട്ടി. പരാതി ഫയലില് സ്വീകരിച്ച കമ്മീഷന് ഉടന് നടപടി സ്വീകരിക്കുമെന്ന ഉറപ്പും നല്കി.
2011 ആഗസ്റ്റ് 13 ന് ആണ് ഗവിയില് കൊച്ചുപമ്പ ചെക്ക്പോസ്റ്റിന് സമീപത്തുള്ള കെഎഫ്ഡിസിയുടെ ക്വാര്ട്ടേഴ്സില് നിന്നും ഭൂലോകലക്ഷ്മിയെ കാണാതാകുന്നത.് ഭര്ത്താവ് ഡാനിയേല്കുട്ടി സ്കറിയ തിരുനല്വേലിയില് പഠിക്കുന്ന മക്കളെ കണാന് പോയ ദിവസമാണ് ക്വാര്ടേഴ്സില് നിന്നും ഇവരെ കാണാതായത്. കെഎഫ്ഡിസി വക ഏലം തോട്ടത്തിലെ ജീവനക്കാരായിരുന്നു ഇരുവരും. ഡാനിയേല്കുട്ടി ഇവിടുത്തെ വാച്ചറും ഭാര്യ ക്ലര്ക്കും ആയിരുന്നു. കോര്പറേഷന് അനുവദിച്ച ക്വാര്ടേഴ്സിലായിരുന്നുകഴിഞ്ഞ 17 വര്ഷമായി ഇവര് താമസിച്ചിരുന്നത്.
തൊഴിലാളികള്ക്കുള്ള ജോലിക്കൂലി വിതരണം ചെയ്യുന്നത് ഭൂലോകലക്ഷ്മിയായിരുന്നു. കാണാതാവുന്ന ദിവസവും പകല് ജോലിക്കാര്ക്കൊപ്പം ഇവര് ഉണ്ടായിരുന്നു. വൈകുന്നേരം ആറു മണിക്ക് ഇവര് ക്വാര്ട്ടേഴ്സില് എത്തിയിരുന്നതായും തെളിവുകളുണ്ട്. ഇവിടെ നിന്നും ഭൂലോകലക്ഷ്മി ഭര്ത്താവ് ഡാനിയേല് കുട്ടിയെയും രാത്രി എട്ട് മണിയോടെ മക്കളെയും ഫോണില് വിളിച്ചിരുന്നു. എന്നാല് പിന്നീട് ഭര്ത്താവ് േഫാണില് ബന്ധപ്പെടാന് ശ്രമിച്ചെങ്കിലും സാധിച്ചില്ല. സംശയം തോന്നിയ ഡാനിയേല് തൊട്ടടുത്ത ദിവസം തന്നെ തിരുനെല്വേലിയില് നിന്നും ഗവിയില് എത്തി. മുറിയില് ലൈറ്റ് പ്രകാശിച്ച് നില്ക്കുന്നത് കണ്ട് കതകില് തട്ടി വിളിച്ചെങ്കിലും പ്രതികരണമുണ്ടായില്ല. വീട് പുറത്തു നിന്നും പൂട്ടിയ നിലയില് ആയിരുന്നെന്നും ഇയാള് പറയുന്നു.
രാത്രിയില് ആരോ ഭൂലോകലക്ഷ്മിയെ ക്വാര്ട്ടേഴ്സിന് പുറത്തേക്ക് വിളിച്ചു കാണ്ടുപോയിരിക്കാമെന്നും കൊലപ്പെടുത്തിയതായി സംശയിക്കുന്നതായും ഡാനിയേല് പറയുന്നു. സംഭവത്തെപ്പറ്റി ആങ്ങമൂഴി പൊലീസില് പരാതി നല്കിയെങ്കിലും യാതൊരു പുരോഗതിയും ഉണ്ടായില്ല. ഇതേ തുടര്ന്നാണ് ഒന്നര വര്ഷം മുമ്പ് ആലപ്പുഴ ക്രൈംബ്രാഞ്ച് ഡിവൈഎസ്പി. അന്വേഷണം ഏറ്റെടുത്തത്. ഫോറസ്റ്റ് ജീവനക്കാര് ഉള്പ്പെടെ നിരവധി പേരെ ചോദ്യം ചെയ്തെങ്കിലും ഒരു തെളിവുകളും കണ്ടെത്താന് കഴിഞ്ഞിട്ടില്ല. ഭൂലോകലക്ഷ്മിയെ കാണാതായ രാത്രിയില് ഫോറസ്റ്റ് വകുപ്പിന്റെ ജീപ്പ് 50 കിലോമീറ്റര് അധികംഓടിയത് സംബന്ധിച്ചും ദുരൂഹത നിലനില്ക്കുന്നതായി ഡാനിയേല്കുട്ടി പറയുന്നു.സംശയമുള്ള ഫോറസ്റ്റ് ജീവനക്കാരെ ശരിയായി ചോദ്യം ചെയ്യാനും അന്വേഷണ സംഘം തയാറായിട്ടില്ല. ഇവര് ഉല്ലാസയാത്ര നടത്തി തിരിച്ചുപോകുന്നതായാണ് ഡാനിയേല്കുട്ടി പറയുന്നത്. പത്രസമ്മേളനത്തില് ഡാനിയേല്കുട്ടി സ്കറിയ, രതീഷ് എന്നിവര് പങ്കെടുത്തു
