ലണ്ടന്: ജിഹാദി ജോണ് എന്നറിയപ്പെടുന്ന ഭീകരന് ഇസ്ലാമിക് സ്റ്റേറ്റില് നിന്നും ഒളിച്ചോടിയെന്ന് റിപ്പാര്ട്ടുകള്. മരണഭയം മൂലം ജിഹാദി ജോണ് ആഴ്ചകള്ക്കുമുമ്പ് ഐസിസില് നിന്നും ഒളിച്ചോടിയതായി ആഫ്രിക്കന് ദിനപത്രമായ എക്സ്പ്രസ് ഡെയ്ലിയാണ് റിപ്പോര്ട്ട് ചെയ്തത്.
ഐസിസ് ഭീകരര് തട്ടിക്കൊണ്ടുവന്ന പാശ്ചാത്യരെ കൊലപ്പെടുത്തിയതോടെയാണ് മുഹമ്മദ് എംവൈസിയെന്ന ഇയാള് അന്താരാഷ്ട്ര തലത്തില് കുപ്രസിദ്ധി നേടിയത്.
ഭീകരപ്രവര്ത്തനങ്ങളില് എന്തെങ്കിലും വീഴ്ച സംഭവിച്ചാല് തന്നേയും കൊല്ലുമെന്ന് ജിഹാദി ജോണ് ഭയപ്പെട്ടിരുന്നു. അതിനാലാണ് ഐസിസ് വിട്ടതെന്നു പറയുന്നു. സിറിയയിലെ അത്ര പ്രചാരമില്ലാത്ത ജിഹാദി ഗ്രൂപ്പില് ചേര്ന്ന് ഇയാള് പ്രവര്ത്തമനം ആരംഭിച്ചതായും റിപ്പോര്ട്ടുണ്ട്. എന്നാല് സിറയന് ഭരണകൂടം ഇതുവരെ വാര്ത്ത സ്ഥിരീകരിച്ചിട്ടില്ല.
പാശ്ചാത്യന് രാജ്യങ്ങള് ഭീകരനായി പ്രഖ്യാപിച്ച് ഇയാള്ക്കുവേണ്ടി തെരച്ചില് നടത്തിവരുന്നതിനാല് ആഫ്രിക്കയിലേക്ക് കടക്കാനാണ് ജിഹാദി ജോണ് ശ്രമിച്ചുവരുന്നത്. കുവൈത്തില് ജനിച്ച്, ലണ്ടനിലാണ് ഇയാള് വളര്ന്നതും വിദ്യാഭ്യാസം പൂര്ത്തിയാക്കിയതും. കംപ്യൂട്ടര് സയന്സ് ബിരുദധാരിയായ ജിഹാദി ജോണ് 2014 ആഗസ്തില് അമേരിക്കന് മാധ്യമപ്രവര്ത്തകന് ഫോലെയെ വധിക്കുന്ന വീഡിയോയിലാണ് ആദ്യമായി പ്രത്യക്ഷപ്പെടുന്നത്. അതിനുശേഷം സ്റ്റീഫന് സോട്ലോഫ്, ഡേവിഡ് ഹെയ്നെസ്, അലന് ഹെന്നിംങ്, പീറ്റര് കാസിംങ് തുടങ്ങിയ പാശ്ചാത്യരെ കഴുത്തറത്ത് ജിഹാദി ജോണ് കൊല്ലുന്ന ദൃശ്യങ്ങളും പുറത്തുവന്നിട്ടിട്ടുണ്ട്.
