ന്യൂദല്ഹി:പാസ്പോര്ട്ട് അപേക്ഷകള് ഓണ്ലൈനില് പോലീസ് വെരിഫിക്കേഷന് നടത്തുന്ന രാജ്യത്തെ ആദ്യ നഗരമായി ബെംഗളൂരു മാറും. രാജ്യവ്യാപകമായി നടപ്പിലാക്കുവാന് ലക്ഷ്യമിടുന്ന ഈ പദ്ധതി നവംബറിലാണ് ബെംഗളുരൂവില് തുടക്കമാവുന്നത്. പാസ്പോര്ട്ട് അപേക്ഷകളിലെ അനാവശ്യ കാലതാമസം ഒഴിവാക്കി വളരെ വേഗം നല്കുന്നതിനാണ് പദ്ധതി വിഭാവനം ചെയ്യുന്നത്. ഇപ്പോള് ഒരുമാസം സമയമെടുക്കുന്നത് ഒരാഴ്ചക്കുള്ളില് അപേക്ഷകര്ക്ക് പാസ്പോര്ട്ട് നല്കുവാനാകും.
ഓണ്ലൈന് പോലീസ് വെരിഫിക്കേഷനായി ആഭ്യന്തരമന്ത്രാലയം ജില്ലാ പോലീസ് അധികാരികളുടെ നേതൃത്വത്തില് പ്രത്യേക സംവിധാനമാണ് ഒരുക്കുന്നത്. അപേക്ഷന്റെ പൂര്ണ്ണവിവരം ലഭിക്കുന്നതിനായി നാഷണല് പോപ്പുലേഷന് രജിസ്റ്റര് (എന്പിആര്), ആധാര്. ക്രൈം ആന്ഡ് ക്രമിനല് നെറ്റ് വര്ക്കിങ് സിസ്റ്റം (സിസിടിഎന്എസ്) ആണ് ഒരുക്കുന്നത്.ഈ ഓണ്ലൈന് സംവിധാനത്തിലൂടെ അപേക്ഷകന് ക്രിമിനല് പശ്ചാത്തലമുണ്ടെങ്കില് അറിയുവാനാകും.
ബയോമെട്രിക് ഡാറ്റ, ഫോട്ടോ, എന്പിആറിലെ മേല്വിലാസം, ആധാര് ഡാറ്റ,സിസിടിഎന്എസിലൂടെ ക്രിമിനല് പശ്ചാത്തലവും പോലീസ് ഓഫീസര്ക്ക് കണ്ട് പിടിക്കാനാവും. രാജ്യത്തെ 14000 പോലീസ് സ്റ്റേഷനുകള് ഇതുമായി ബന്ധിപ്പിക്കും,
പോലീസ് ഐടി എന്ന പേരില് കര്ണാടക സര്ക്കാര് പോലീസ് ഡാറ്റാ ബാങ്ക് സംവിധാനം ഒരുക്കിയിട്ടുണ്ട്. സിസിടിഎന്എസിലൂടെ വിദേശകാര്യ മന്ത്രാലയത്തിനും ആഭ്യന്തര മന്ത്രാലയത്തിനും രാജ്യംമുഴുവന് വിവരങ്ങള് കൈമാറുവാനാവും. ഈ സംവിധാനം നിലവില് വരുന്നതോടെ ഒരുമാസമെന്നത് ഒരാഴ്ചയായി ചുരുങ്ങുമെന്നും ആഭ്യന്തരമന്ത്രാലയം വക്താക്കള് പറഞ്ഞു.
പുതിയ പാസ്പോര്ട്ട് എടുക്കുന്നതിനും പഴയത് പുതുക്കുന്നതിനും ഇപ്പോള് കാലതാമസം വരുന്നത് പോലീസ് വെരിഫിക്കേഷന് റിപ്പോര്ട്ടിന്റെ പേരിലാണ്. പുതിയ സംവിധാനത്തോടെ ഈ കാലതാമസമാണ് ഒഴിവാകുന്നത്. സിസിടിഎന്എസ് ഡാറ്റബേസ് സംവിധാനത്തിലൂടെ വളരെ പെട്ടെന്ന് കുറ്റവാളികളുടെ നീക്കങ്ങള് സുരക്ഷാ ഏജന്സികള്ക്ക് അറിയുവാനാകും.
