ഇസ്ലാമാബാദ്: മുംബൈ ഭീകരാക്രമണക്കേസില് വിചാരണ നടത്തുന്നതിനായി പാകിസ്ഥാന് ഇന്ത്യയില് നിന്ന് കൂടുതല് തെളിവുകള് ആവശ്യപ്പെട്ടു. പാക് ദേശീയ സുരക്ഷാ ഉപദേഷ്ടാവ് സര്താജ് അസീസ് ആണ് ഇക്കാര്യം അറിയിച്ചത്.
2007ല് 60പേരുടെ മരണത്തിനിടയാക്കിയ സംജൗത എക്സ്പ്രസ് സ്ഫോടനക്കേസിലും കൂടുതല് വിവരങ്ങള് കൈമാറണമെന്ന് പാക് പ്രധാനമന്ത്രി നവാസ് ഷെരിഫ് ആവശ്യപ്പെട്ടിട്ടുണ്ടെന്ന് അസീസ് കൂട്ടിച്ചേര്ത്തു.
2008ലെ മുംബൈ ഭീകരാക്രമണത്തിന്റെ സൂത്രധാരനും ലഷ്കര് ഇ തയ്ബ തലവനുമായ സക്കി ഉര് റഹ്മാന് ലഖ്വിയുടെ ശബ്ദ സാമ്പിള് ആവശ്യപ്പെട്ടു കൊണ്ട് പാക് സര്ക്കാര് കോടതിയില് പുതിയ ഹര്ജി സമര്പ്പിച്ചില്ലെന്ന് പ്രോസിക്യൂഷന് ടീം മേധാവിയുടെ വെളിപ്പെടുത്തലിനു ശേഷമാണ് ഇത്തരത്തില് ഒരു പ്രസ്താവന പുറത്തുവന്നത്. അതേസമയം കാശ്മീര് വിഷയത്തെ അവഗണിച്ചുള്ള ഒരു ചര്ച്ചയ്ക്കും ഇന്ത്യയുമായി തയ്യാറല്ലെന്ന് അസീസ് വ്യക്തമാക്കി.
എന്നാല് ഇന്ത്യയെ വിഡ്ഢികളാക്കുന്ന തരത്തിലാണ് പാകിസ്ഥാന്റെ മനോഭാവമെന്ന് സ്പെഷല് പബ്ലിക് പ്രോസിക്യൂട്ടര് ഉജ്ജ്വല് നിഗം ആരോപിച്ചു. 2013ല് കൊണ്ടുവന്ന നിയമപ്രകാരം ഭീകരരുടെ ശബ്ദസാമ്പിള് എടുക്കാന് അനുവാദമുണ്ട്. എന്നിട്ടും അതിനു തയ്യാറാകാത്തത് സൂചിപ്പിക്കുന്നത് കേസിലെ അവരുടെ അനാസ്ഥയാണ് എന്ന് അദ്ദേഹം ആരോപിച്ചു.
