ന്യൂദല്ഹി: ഭാരതവും കസാഖിസ്ഥാനും അഞ്ചു കരാറുകളില് ഒപ്പുവെച്ചു. പ്രതിരോധം, റെയില്വേ, യുറേനിയം നല്കല്, കായികം, കുറ്റവാളികളെ കൈമാറല് എന്നീ മേഖലകളുമായി ബന്ധപ്പെട്ട കരാറുകളിലാണ് ഇരുരാജ്യങ്ങളും ഒപ്പുവെച്ചത്.
കസാഖിസ്ഥാനാണ് മേഖലയിലെ ഇന്ത്യയുടെ ഏറ്റവും വലിയ സാമ്പത്തിക പങ്കാളിയെന്ന് പ്രധാനമന്ത്രി നരേന്ദ്ര മോദി പറഞ്ഞു. കസാഖ് തലസ്ഥാനമായ അസ്താനയില് കസാഖിസ്ഥാന് പ്രസിഡന്റ് നൂര്സുല്ത്താന് നസര്ബയേവുമൊത്ത് വാര്ത്താസമ്മേളനത്തില് സംസാരിക്കവെ ഇരുരാജ്യങ്ങളും തമ്മിലുള്ള സാമ്പത്തിക ബന്ധങ്ങള് പുതിയ തലത്തിലേയ്ക്കുയര്ത്താന് യോജിച്ച് പ്രവര്ത്തിക്കുമെന്നും പ്രധാനമന്ത്രി പറഞ്ഞു.
സിവില് ആണവ കരാര് പ്രകാരം ഇന്ത്യ യുറേനിയം വാങ്ങിയ ആദ്യ രാജ്യങ്ങളിലൊന്നാണ് കസാഖിസ്ഥാന്. രണ്ടാമതും കൂടുതല് വലിയ കരാറില് ഏര്പ്പെടാന് കഴിഞ്ഞതില് സന്തുഷ്ടിയുണ്ടെന്ന് പ്രധാനമന്ത്രി പറഞ്ഞു. മറ്റ് ധാതുക്കളുടെ കാര്യത്തിലും സഹകരണം വ്യാപിപ്പിക്കും. കസാഖിസ്ഥാനില് എണ്ണ പര്യവേഷണത്തിന് കൂടുതല് ബ്ളോക്കുകള് പരിഗണിക്കണമെന്ന ഇന്ത്യയുടെ നിര്ദ്ദേശത്തോട് അനുകൂലമായിട്ടാണ് പ്രസിഡന്റ് നസര്ബയേവ പ്രതികരിച്ചതെന്ന് നരേന്ദ്ര മോദി പറഞ്ഞു.
നിര്മ്മാണ മേഖലയിലും അടിസ്ഥാന വികസന സൗകര്യ രംഗത്തും പരസ്പരം നിക്ഷേപം വര്ദ്ധിപ്പിക്കുന്നതിനും ധാരണയായി. ഇരു രാജ്യങ്ങളിലെയും വാണിജ്യ വ്യവസായ മണ്ഡലങ്ങളുടെ സംയുക്ത ബിസിനസ് കൗണ്സില് സഹകരണത്തിനുള്ള പുതിയൊരു രൂപരേഖ തയ്യാറാക്കുമെന്ന് പ്രതീക്ഷിക്കുന്നതായി പ്രധാനമന്ത്രി പറഞ്ഞു. അസ്താനയില് അടുത്ത വര്ഷം നടക്കുന്ന എക്സ്പോ 2017 ല് ഭാരതം വന്തോതില് പങ്കെടുക്കും. യുറേഷ്യന് സാമ്പത്തിക യൂണിയനുമായി ഒരു സ്വതന്ത്ര വ്യാപാര കരാറിനുള്ള ഭാരത നിര്ദ്ദേശം പരിഗണിക്കാന് സംയുക്ത പ്രവര്ത്തക ഗ്രൂപ്പിന് രൂപം നല്കിയത് ഇരുരാജ്യങ്ങളുടെയും സാമ്പത്തിക സഹകരണം വര്ദ്ധിപ്പിക്കും.
പ്രതിരോധ നിര്മ്മാണ രംഗത്തും സുരക്ഷാ സഹകരണത്തിനും ഭാരതവും കസാഖ്സ്താനും തമ്മിലുള്ള തന്ത്രപരമായ സഹകരണം സുപ്രധാനമാണ്. ഐക്യരാഷ്ട്ര സഭയുടെ നേതൃത്വത്തില് ഭീകരതയ്ക്കെതിരായ സമഗ്ര അന്താരാഷ്ട്ര ഉടമ്പടി വേണമെന്ന നിര്ദ്ദേശത്തോടും സുരക്ഷാ സമിതിയില് ഭാരതത്തിന്റെ സ്ഥിരാംഗത്വത്തിനുവേണ്ടി കസാഖ്സ്താന് നല്കുന്ന പിന്തുണയ്ക്കും പ്രധാനമന്ത്രി നന്ദി അറിയിച്ചു.
2017-18 ല് സുരക്ഷാ സമിതിയില് സ്ഥിരമല്ലാത്ത അംഗത്വത്തിനുവേണ്ടിയുള്ള കസാഖ്സ്താന്റെ സ്ഥാനാര്ത്തിത്വത്തിനു ഭാരതത്തിന്റെ പിന്തുണ പ്രധാനമന്ത്രി ആവര്ത്തിച്ചു വ്യക്തമാക്കി. പ്രസിഡന്റ് നസര്ബയേവിനെ ഭാരതം സന്ദര്ശിക്കാനും നരേന്ദ്ര മോദി ക്ഷണിച്ചു.
