ന്യൂദല്ഹി: ഹൃദ്രോഗം കഴിഞ്ഞാല് കാന്സറാണ് ലോകത്തില് ഏറ്റവും കൂടുതല് ആള്ക്കാരെ കൊല്ലുന്നതെന്ന് റിപ്പോര്ട്ട്.ഭാരതത്തില് വായില് കാന്സര് ബാധിക്കുന്നവരുടെ എണ്ണം 90 മുതല് 2013നുള്ളില് ഇരട്ടിയായതായും റിപ്പോര്ട്ട് വ്യക്തമാക്കുന്നു.
90കളില് ലോകത്ത് പന്ത്രണ്ടുശതമാനം പേരാണ് കാന്സര് മൂലം മരിച്ചതെങ്കില് 2013ല് ഇത് 15 ശതമാനമായി. ഭാരതത്തില് കാന്സര് മരണം ഈകാലയളില് അറുപതുശതമാനമായി. 2013ലെ കാന്സര് ഭാരമെന്ന റിപ്പോര്ട്ടിലാണ് ഇക്കാര്യം. 30 ശതമാനംജനസംഖ്യാ വര്ദ്ധനവ് കണക്കിലെടുത്താല് പോലും കാന്സര് മരണം പത്തു ശതമാനം കൂടിയെന്ന് വേണം വിലയിരുത്താന് പ്രൊഫ. ലളിത് ഡാന്ഡോണ പറഞ്ഞു.
2013ല് ലോകത്ത് 149 ലക്ഷം പുതിയ കാന്സര് രോഗികളുണ്ടായി. ഇവരില് 82 ലക്ഷം പേര് മരിച്ചു.188 രാജ്യങ്ങളിലെ 28 കാന്സര് ഗ്രൂപ്പുകളില് നടത്തിയ സര്വ്വേയിലാണ് ഇക്കാര്യം. ലോകത്ത് എല്ലാത്തരം കാന്സറുകളും കൂടുകയാണ്. എന്നാല് മികച്ച ചികില്സ ലഭ്യമാകുന്നതിനാല് പല രാജ്യങ്ങളിലും മരണം കുറഞ്ഞിട്ടുണ്ട്. എന്നാല് മെച്ചപ്പെട്ട ചികില്സ ലഭ്യമല്ലാത്ത രാജ്യങ്ങളില് മരണം കൂടുകയുമാണ്. പ്രതിരോധവും കാന്സര് നേരത്തെ കണ്ടെത്തി ചികില്സിക്കുകയുമാണ് ഭാരതം ചെയ്യേണ്ടത്. പ്രൊഫ. ഡാന്ഡോണ പറഞ്ഞു.
ഭാരതത്തില് വായിലെ കാന്സറാണ് മാരകമാകുന്നത്. 1990 മുതല് 2013 വരെയായി 130 ശതമാനമാണ് വായിലെ കാന്സര് വര്ദ്ധിച്ചത്.പുകയില ചവയ്ക്കുന്നതും പാനിന്റെ ഉപയോഗവുമാണ് ഇത് കൂടാന് കാരണം. ബംഗഌദേശ്, നേപ്പാള്, പാക്കിസ്ഥാന് എന്നിവടങ്ങളിലുംവായിലെ കാന്സര് കൂടുകയാണ്. ഭാരതത്തിലെ പുരുഷന്മാരായ കാന്സര് രോഗികളില് കൂടുതലും വായില് കാന്സര് ഉള്ളവരാണ്.
