ന്യൂദല്ഹി: ദല്ഹിയിലെ ഭരണ തര്ക്കത്തില് ആം ആദ്മി പാര്ട്ടി സര്ക്കാരിന് താല്ക്കാലിക തിരിച്ചടി. സര്ക്കാരിന് അനുകൂലമായ ഹൈക്കോടതി നിരീക്ഷണം സുപ്രീം കോടതി സ്റ്റേ ചെയ്തു. കേന്ദ്രത്തിന്റെ അപ്പീലില് ദല്ഹി സര്ക്കാരിന് നോട്ടീസ് അയക്കാനും സുപ്രീം കോടതി നിര്ദേശിച്ചു.
സര്ക്കാര് മൂന്നാഴ്ചയ്ക്കകം മറുപടി നല്കണം. അതേസമയം, അധികാര തര്ക്കത്തില് ഇടപെടാന് വിസമ്മതിച്ച സുപ്രീം കോടതി, കേസില് ഹൈക്കോടതി തന്നെ ഉചിതമായ തീരുമാനമെടുക്കണമെന്നും നിര്ദേശിച്ചു.
കേസില് ഹൈക്കോടതി സ്വതന്ത്രമായി വാദം കേള്ക്കണം. ഏതെങ്കിലും വിധത്തിലുള്ള നിരീക്ഷണം കോടതിയെ സ്വാധീനിക്കാന് പാടില്ല. ഡല്ഹി പോലീസിനും കേന്ദ്ര ഉദ്യോഗസ്ഥര്ക്കും മേല് അഴിമതി നിരോധന ബ്യൂറോയുടെ അധികാര പരിധി സംബന്ധിച്ച ഹൈക്കോടതി ഉത്തരവ് അപ്രസക്തമാണ്. ഇത് ഹൈക്കോടതി പ്രത്യേകമായി പരിഗണിക്കണമെന്നും കോടതി വിധിച്ചു.
ദല്ഹി അഴിമതി നിരോധന ബ്യുറോയുടെയുടെ നിയന്ത്രണം ഡല്ഹി പോലീസിനും സിവില് സര്വീസ് ദ്യോഗസ്ഥ നിയമനം ലഫ്.ഗവര്ണര്ക്കും ചുമതലപ്പെടുത്തിയ കേന്ദ്ര ആഭ്യന്തര മന്ത്രാലയത്തിന്റെ വിജ്ഞാപനം ചോദ്യം ചെയ്ത് എഎപി സര്ക്കാര് നല്കിയ ഹര്ജിയിലാണ് ഹൈക്കോടതി വിജ്ഞാപനം സംശയാസ്പദമാണെന്ന് നിരീക്ഷിച്ചത്.
ദല്ഹി മന്ത്രിസഭയുടെ ഉപദേശം സ്വീകരിക്കാന് ലഫ്.ഗവര്ണര് ബാധ്യസ്ഥനാണെന്നും ഹൈക്കോടതി നിര്ദേശിച്ചിരുന്നു. ഇതിനെതിരെ കേന്ദ്രസര്ക്കാര് സമര്പ്പിച്ച അപ്പീല് പരിഗണിച്ചാണ് സ്റ്റേ അനുവദിച്ചത്.
