502. നിര്ഗുണാ – ഗുണങ്ങളില്ലാത്തവള്. ഗുണങ്ങള് സൃഷ്ടിയുടെ ഭാഗമായി ദേവീസങ്കല്പംകൊണ്ടുണ്ടായതാണ്. സത്വം, രജസ്സ്, തമസ്സ് എന്നീ ഗുണങ്ങള് സര്വപ്രപഞ്ചത്തിനും ആധാരമാണ്. സത്വഗുണ പ്രധാനമായ വിഷ്ണുവും രജോഗുണപ്രധാനനായ ബ്രഹ്മാവും തമോഗുണപ്രധാനനായ ശിവനും ത്രിമൂര്ത്തികളായി പ്രപഞ്ചത്തിന്റെ രക്ഷയ്ക്കും സൃഷ്ടിക്കും നാശത്തിനും കാരണക്കാരായി. പഞ്ചഭൂതഘടനകൊണ്ട് പലതരത്തിലുള്ള സ്ഥാവരജംഗമങ്ങളുണ്ടായി. ഇങ്ങനെ ഗുണങ്ങള്ക്കു കാരണഭൂതയായെങ്കിലും ദേവി ഗുണങ്ങള്ക്ക് അതീതയാണ്.
മനുഷ്യര്ക്കും മറ്റു ജീവികള്ക്കും രൂപം, സ്വഭാവം തുടങ്ങിയ സവിശേഷതകളുള്ളവയെയും ഗുണങ്ങള് എന്നുപറയും. ദ്രവ്യങ്ങള്ക്ക് രൂപരസഗന്ധാദികളും ഔഷധവീര്യവുമുണ്ട്. അവയെയും ഗുണം എന്നുപറയും. ഇവയുടെയെല്ലാം ഗുണങ്ങള്ക്കു കാരണഭൂതയാണെങ്കിലും ദേവി ഗുണാതീതയാണ്.
503. പരമാശക്തി – എല്ലാ ശക്തികളെക്കാളും ശ്രേഷ്ഠമായ ശക്തി, പരാശക്തി. ചെറുതും വലുതുമായ അനേകമനേകം ശക്തികളുടെ സാമരസ്യമാണു പ്രപഞ്ചം. ഏകവും സര്വാതീതവും സര്വാധാരവുമായ പരമമായ ശക്തി അതിന്റെ സങ്കല്പസൃഷ്ടമായ പ്രപഞ്ചത്തില് ജീവികളായും വസ്തുക്കളായും കാറ്റും വെളിച്ചവുംപോലുള്ള പ്രകൃതിശക്തികളായും ഗ്രഹനക്ഷത്രാദികളായും രൂപംകൊള്ളുന്നു. അവയുടെ പരസ്പാകര്ഷവും വികര്ഷണവും വികാരങ്ങളും ദേശകാലാദികളായ പരിമിതികള്ക്കു കാരണമാകുന്നു. ഇവയ്ക്കെല്ലാം കാരണമായ മൂകാംബികയെ പരമയായ ശക്തിയായി നാമം സ്തുതിക്കുന്നു.
… തുടരും
