ന്യൂദല്ഹി: ദല്ഹി സര്ക്കാരിനേയും മുഖ്യമന്ത്രിയേയും മോശമായി ചിത്രീകരിക്കുന്ന തരത്തില് വാര്ത്തകള് നല്കുന്നതിനെ കുറിച്ച് പരാതി നല്കാന് ഉദ്യോഗസ്ഥരോട് നിര്ദ്ദേശിച്ചു കൊണ്ട് അരവിന്ദ് കേജ്രിവാള് പുറത്തിറക്കിയ സര്ക്കുലര് വിവാദമായി. സര്ക്കുലറിനെതിരെ പ്രതിപക്ഷവും രംഗത്ത് വന്നു. എല്ലാ വാര്ത്താ ചാനലുകളേയും സൂക്ഷ്മമായി നിരീക്ഷിക്കാന് ഉത്തരവിട്ടതിന് പിന്നാലെയാണ് ദല്ഹി സര്ക്കാരിന്റെ പുതിയ നിര്ദ്ദേശം. ദല്ഹി സര്ക്കാരിനെ തകര്ക്കാന് മാദ്ധ്യമങ്ങള് ശ്രമിക്കുകയാണെന്ന് നേരത്തെ കേജ്രിവാള് ആരോപിച്ചിരുന്നു.
സര്ക്കാരിന്റെ പ്രവര്ത്തനങ്ങളെ മോശമായി ചിത്രീകരിക്കുകയോ, മാദ്ധ്യമങ്ങളിലൂടെ അപകീര്ത്തിപ്പെടുത്തുകയോ ചെയ്താല് അതിനെതിരെ ആഭ്യന്തര പ്രിന്സിപ്പല് സെക്രട്ടറിക്ക് പരാതി നല്കാനാണ് ഉദ്യോഗസ്ഥരോട് കേജ്രിവാള് നിര്ദ്ദേശിച്ചത്. വാര്ത്ത പ്രസിദ്ധീകരിച്ച മാദ്ധ്യമത്തിന്റെ പേര്, വാര്ത്തയിലെ വസ്തുതാപരമായ തെറ്റ്, ആരോപണങ്ങള് എന്തൊക്കെ തുടങ്ങിയ വിവരങ്ങളും അടങ്ങിയ പരാതി ആയിരിക്കണം നല്കേണ്ടത്. ഇങ്ങനെ ലഭിക്കുന്ന പരാതിയില് കര്ശന നടപടി എടുക്കുമെന്നും സര്ക്കാര് പുറത്തിറക്കിയ സര്ക്കുലറില് പറയുന്നു. പരാതി ലഭിച്ചു കഴിഞ്ഞാല് പ്രിന്സിപ്പല് സെക്രട്ടറി അത് പരിശോധിക്കുകയും പ്രോസിക്യൂഷന് ഡയറക്ടറുടെ അഭിപ്രായം തേടിയ ശേഷം ഇന്ത്യന് ശിക്ഷാ നിയമത്തിലെ 499/500 വകുപ്പുകള് പ്രകാരം നടപടി സ്വീകരിക്കും. പ്രസിദ്ധീകരിക്കപ്പെട്ട വാര്ത്ത അപകീര്ത്തിപരമാണെന്നാണ് ഡയറക്ടറുടെ അഭിപ്രായമെങ്കില് പരാതി നിയമമന്ത്രാലയത്തിന് കൈമാറുകയും തുടര്ന്ന് ക്രിമിനല് കേസ് എടുക്കാനുമാണ് സര്ക്കുലുറില് നിര്ദ്ദേശിച്ചിരിക്കുന്നത്. അതേസമയം, കേജ്രിവാളിന്റെ പുതിയ ഉത്തരവ് പ്രതിപക്ഷ പാര്ട്ടികളില് നിന്നുള്ള കടുത്ത വിമര്ശനത്തിന് ഇടയാക്കി.
കേജ്രിവാള് കാപട്യക്കാരനാണെന്നും ജനാധിപത്യ വിരുദ്ധമായാണ് പ്രവര്ത്തിക്കുന്നതെന്നും ബിജെപിയും കോണ്ഗ്രസും ആരോപിച്ചു. സര്ക്കാരിന്റെ ജനവിരുദ്ധ നയങ്ങളും മറ്റും മാദ്ധ്യമങ്ങള് തുറന്നു കാട്ടുമ്പോള് കേജ്രിവാള് അതിനെ എതിര്ക്കുകയാണ്. ഇത് തികച്ചും ജനാധിപത്യ വിരുദ്ധമാണ് കോണ്ഗ്രസ് വക്താവ് പിസി ചാക്കോ പറഞ്ഞു. എപ്പോഴും അഭിപ്രായ സ്വാതന്ത്ര്യത്തെ കുറിച്ച് പറയുന്ന കേജ്രിവാള്, മറ്റുള്ളവര് അഭിപ്രായമോ വിമര്ശനമോ ഉന്നയിക്കരുതെന്നാണ് ആഗ്രഹിക്കുന്നതെന്ന് ബിജെപി വക്താവ് ജി.വി.എല് നരസിംഹ റാവു പറഞ്ഞു. മാദ്ധ്യമ സ്വാതന്ത്ര്യത്തിനു മേലുള്ള കടന്നു കയറ്റം എന്നാണ് സിപിഐ നേതാവ് ഡി രാജ ഇതിനെ വിശേഷിപ്പിച്ചത്.
പ്രതികരിക്കാൻ ഇവിടെ എഴുതുക: