കറുകച്ചാല്‍: കറുകച്ചാല്‍ ടൗണിലെ ഫെഡറല്‍ ബാങ്കിലും തൊട്ടടുത്തുള്ള നടുവിലേത്ത് റബ്ബല്‍ കടയിലും മോഷണശ്രമം. മേഴ്‌സി ഹോസ്പിറ്റലിന് സമീപം നടുവിലേത്ത് വിനുവിന്റെ കെട്ടിടത്തിലാണ് ഫെഡറല്‍ബാക്ക് പ്രവര്‍ത്തിക്കുന്നത്. ബാങ്കിന്റെ പിന്‍വശത്തുള്ള ഷട്ടറിന്റെ പൂട്ടു പൊളിച്ച് അകത്തു കടന്ന മോഷ്ടാവ് ഉള്ളിലുള്ള ഷട്ടറിന്റെ പൂട്ടും പൊളിച്ചു. വെളുപ്പിന് 2.10 നാണ് മോഷണശ്രമം നടന്നത്. ബാങ്കിന്റെ സി.സി.ക്യാമറയില്‍ മോഷ്ടാവിന്റെ ചിത്രം പതിഞ്ഞിട്ടുണ്ടെങ്കിലും വ്യക്തമല്ല. മോഷ്ടാവ് ബെര്‍മുടയും ഷര്‍ട്ടും കണ്ണടയും ധരിച്ചിട്ടുള്ളതായി വ്യക്തമായി അറിയുന്നു. മോഷ്ടാവ് സ്‌ട്രോങ് റൂമിനടുത്തെത്തിയിരുന്നെങ്കില്‍ വ്യക്തമായി സി.സി. ക്യാമറയില്‍ ചിത്രം ലഭിക്കുമായിരുന്നു എന്ന് എസ്.ഐ. എം.ജെ.അഭിലാഷ് അറിയിച്ചു. ബാങ്കിനു സമീപം പ്രവര്‍ത്തിക്കുന്ന നടുവിലേത്ത് വിനുവിന്റെ റബ്ബര്‍ കടയിലും മോഷണശ്രമം നടന്നു. ബാങ്കില്‍ നിന്നും റബ്ബര്‍ കടയില്‍ നിന്നും മോഷണം നടന്നിട്ടില്ലായെന്നെ ബാങ്ക് അധികൃതരും കടയുടമയും അറിയിച്ചു.
ചങ്ങനാശ്ശേരി ഡി.വൈ.എസ്.പി. എസ്. ശ്രീകുമാര്‍, വാകത്താനം സി.ഐ. അനീഷ് വി. കോര, കറുകച്ചാല്‍ എസ്.ഐ. എം. ജെ. അഭിലാഷ് എന്നിവര്‍ സംഭവസ്ഥലത്തെത്തി അന്വേഷണം ആരംഭിച്ചു. കോട്ടയത്തുനിന്നും വിരലടയാള വിദഗ്ദരും സ്ഥലത്തെത്തി തെളിവെടുപ്പു നടത്തി.
