മുംബൈ: ആര്ബിഐ ഗവര്ണ്ണര് രഘുറാം രാജന് അന്താരാഷ്ട്ര ഭീകര സംഘടനയായ ഐസിസിന്റെ വധഭീഷണി. രഘു റാം രാജനെ വധിക്കാന് പണം നല്കിക്കഴിഞ്ഞു, അതില് കൂടുതല് പണം നല്കിയാല് വധഭീഷണി പിന്വലിക്കാം. ഇമെയിലില് ലഭിച്ച ഭീഷണിയില് പറയുന്നു. എന്നാല് എത്ര പണമാണ് നല്കേണ്ടതെന്ന് അതില് വ്യക്തമാക്കുന്നില്ല.
ഐസിസ് 583847 @ ജിമെയില്. കോമില് നിന്നാണ് ഭീഷണി അയച്ചിരിക്കുന്നത്. അമേരിക്ക, ആസ്ട്രേലിയ, ബല്ജിയം, ഇറ്റലി, നൈജീരിയ, ജര്മ്മനി, യുക്രെയ്ന്, ഹോങ്ങ്കോങ്ങ് തുടങ്ങിയ രാജ്യങ്ങളില് നിന്നെല്ലാം ഈ മെയില് ഐഡിയില് കയറിയിട്ടുണ്ടെന്ന് സൈബര് സെല്ലിന്റെ പ്രാഥമിക അന്വേഷണത്തില് തെളിഞ്ഞിട്ടുണ്ട്.
സൈബര് സെല് വിപുലമായ അന്വേഷണം ആരംഭിച്ചു. ആര്ബിഐ ഗവര്ണ്ണര്ക്കുള്ള സുരക്ഷ ശക്തമാക്കിയിട്ടുണ്ട്. ആര്ബിഐ ആസ്ഥാനത്തിനു സമീപത്തുള്ള പെട്രോള് ബങ്ക് അടച്ചുപൂട്ടുകയും ചെയ്തു.
വ്യാജ ഭീഷണിയാകാമെന്നാണ് പോലീസിന്റെ വിലയിരുത്തല്. ഇ മെയില് സന്ദേശകന്റെ ഐപി അഡ്രസ് കണ്ടെത്താനുള്ള ശ്രമത്തിലാണ് സൈബര് സെല്.
അതേസമയം ഇത് മൂന്നു മാസം മുമ്പു ലഭിച്ചതാണെന്നും കേസില് അന്വേഷണം നടന്നുവരികയാണെന്നും മുംബൈ പോലീസ് മേധാവി രാകേഷ് മിശ്ര അറിയിച്ചു. വിശദമായ അന്വേഷണങ്ങള്ക്കായി ബന്ധപ്പെട്ട അധികൃതര്ക്ക് പരാതി നല്കിയിട്ടുണ്ട്.
സുരക്ഷയുടെ ഭാഗമായി ആര്ബിഐയുടെ എല്ലാ ചടങ്ങുകളിലും പുറത്തുനിന്നുള്ളവര്ക്ക് പങ്കെടുക്കാന് പ്രത്യേകം പാസുകളും ഏര്പ്പെടുത്തി. 26/11 ഭീകരാക്രമണത്തിനുശേഷം ആര്ബിഐയുടെ സുരക്ഷ ശക്തമാക്കിയിരുന്നു.
