425. കാമേശ്വരാകൃഷ്ണചിത്താ – കാമേശ്വരനാല് ആകര്ഷിക്കപ്പെട്ട ചിത്തമുള്ളവള്. കാമേശ്വരന് ശിവനെ കുറിക്കുന്ന പദമാണ്.
കാമദേവനെ തന്റെ നേത്രാഗ്നിയില് ദഹിപ്പിച്ചതുകൊണ്ടും കാമങ്ങളെ കീഴ്പ്പെടുത്തിയതുകൊണ്ടും ശ്രീപരമേശ്വരന് കാമേശ്വരനാണ്. ശിവഭക്തന്മാരുടെ ചിത്തത്തില് നിന്നു കാമത്തെ പുറത്താക്കുന്ന കാരുണ്യമുള്ളതിനാലും ഭഗവാന് കാമേശ്വരനാണ്.
പാര്വതി പാണീഗ്രഹണത്തിന് സര്വദേവന്മാരും ഋഷിമാരും ശിവഗണങ്ങളും ഉള്പ്പെടുന്ന ഘോഷയാത്രയായി ഹിമാലയത്തെ സമീപിച്ച ശിവനെക്കണ്ട് പാര്വതീദേവിയുടെ മാതാവായ മേനാദേവി ദുഃഖിച്ചതായി ഒരു കഥയുണ്ട്. ജട പിടിച്ച തലമുടി, നെറ്റിയില് കണ്ണ്, ആഭരണമായി പാമ്പുകള്, ഭസ്മം പൂശിയ ശരീരം, ആനത്തോലാണു വസ്ത്രം, വാഹനമായി കാള, ആകെ വിരൂപന്.
ഭഗവാന്റെ ഈ രൂപം കണ്ട് സുന്ദരിയായ തന്റെ മകള്ക്ക് ഇങ്ങനെയൊരു ഭര്ത്താവാണല്ലോ കിട്ടിയത് എന്ന് മേനാദേവി സങ്കടപ്പെട്ടു. ഘോഷയാത്ര അടുത്തെത്തിയപ്പോള് കണ്ടത് കാമകോടികളുടെ സൗന്ദര്യം ഏകീഭവിച്ച മണവാളനെയാണ്. എല്ലാ സുന്ദരവസ്തുക്കളുടെയും സൗന്ദര്യസാരം ഏകീഭവിച്ച രൂപം സ്വീകരിച്ച ശിവനെ കാമേശ്വരന് എന്നു ദേവന്മാരും ഋഷിമാരും സ്തുതിച്ചു. ആ കാമേശ്വരന് പാര്വതീദേവിയുടെ മനസ്സിനെ ആകര്ഷിച്ചതിനാല് ദേവിക്ക് കാമേശ്വരാകൃഷ്ണചിത്താ എന്നു നാമം.
426. കാമേശ്വരമനോഹരീ – കാമേശ്വരന്റെ മനസ്സിനെ ഹരിച്ചവള്. ദേവികാമേശ്വരനാല് ആകൃഷ്ടമായതുപോലെ കാമേശ്വരനെ ദേവിയും ആകര്ഷിച്ചു. ആകര്ഷിക്കുകമാത്രമല്ല കാമേശ്വരന്റെ മനസ്സിനെ ഹരിക്കുകയും ചെയ്തു.
മനോഹരി എന്ന പദത്തിന് സുന്ദരി എന്നും പറയാം. കാണുന്നവരുടെയെല്ലാം മനസ്സിനെ ഹരിക്കുന്ന സൗന്ദര്യമുള്ളവള് എന്നു പദാര്ത്ഥം. കാമേശ്വരന്റെ സുന്ദരിയായ പത്നി എന്നും നാമത്തെ വ്യാഖ്യാനിക്കാം. ദേവിയുടെ ത്രിപുരസുന്ദരി എന്ന നാമം പ്രസിദ്ധമാണല്ലോ.
… തുടരും
