413.ബ്രഹ്മവിഷ്ണുശിവാത്മികാ – ബ്രഹ്മാവായി രൂപം പൂണ്ട് പ്രപഞ്ചസൃഷ്ടി ചെയ്യുന്നതും വിഷ്ണുവിന്റെ രൂപത്തില് പ്രപഞ്ചത്തെ പാലിക്കുന്നതും ശിവനായി രൂപം ധരിച്ച് സംഹരിക്കുന്നതും മൂകാംബികാദേവി തന്നെയാണ്.
ബ്രഹ്മാവിഷ്ണു മഹേശ്വരന്മാരുടെ ഏകീഭവിച്ച രൂപമെന്നോ കാരണമെന്നോ പറയാവുന്ന പരബ്രഹ്മം പരാശക്തിയാല് ദേവിതന്നെയാണ്. ത്രിമൂര്ത്തികളില് ഓരോരുത്തരുടെയും പ്രവര്ത്തശക്തിയായി സരസ്വതിയായും ലക്ഷ്മിയായും ഗൗരിയായും വര്ത്തിക്കുന്നതും മൂകാംബികാദേവിയാണ്.
414. ജപാകുസുമസങ്കാശാ – ജപാപുഷ്പംപോലെ ചെമപ്പുനിറവും ഭംഗിയുമുള്ളവള്. (ജപാപുഷ്പം) ചെമ്പരത്തിപൂവാണെന്നും ചെമപ്പുനിറമുള്ള മറ്റൊരു പൂവാണെന്നും അഭിപ്രായമുണ്ട്.
415. ദാദ്ധിമീകുസുമപ്രഭാ – മാതളംപൂവിന്റെ നിറവും അഴകും ഉള്ളവള്. മുന്നാമത്തിന്റെ ആശയംതന്നെ ഈ നാമത്തിന് മാതളംപൂവിന്റെ നിറത്തിനു ഭംഗികൂടുമെന്നുപറയാം.
416. സര്വാഭരണസംയുക്താ – എല്ലാ ആഭരണങ്ങളും അണിഞ്ഞവള്. ത്രിപുരസുന്ദരിയായ ദേവിക്ക് ആഭരണങ്ങള് ആവശ്യമില്ല. പക്ഷേ ഭക്തജനങ്ങള് അവരുടെ മനോഗതിക്കു ചേര്ന്നവിധത്തില് പലതരത്തിലുള്ള ആഭരണങ്ങള് ദേവിയെ അണിയിക്കുന്നു. എന്തണിയിച്ചാലും അതെല്ലാം ദേവിയുടെ ആകാരഭംഗിയില് ലയിക്കുന്നു.
417. ശൃംഗാരൈകരസാലയാ – ശൃംഗാരം എന്ന ഏക രസത്തിന് ആലയമായവള്. ദേവി സദാശിവനോടു ചേര്ന്നിരിക്കുന്നവളാണ്. ശിവന്റെ ശരീരത്തിന്റെ ഇടതുപകുതി ദേവിയാണ്. ഭര്ത്താവില്നിന്ന് ഒരിക്കലും പിരിയാത്ത ദേവിയില് ശൃംഗാരം എന്ന ഒരു രസത്തിനേ സ്ഥാനമുള്ളൂ.
418. കൃപാതരംഗിതാപാംഗാ – കാരുണ്യം തിരയടിക്കുന്നു. കടക്കണ്നോട്ടമുള്ളവള്. സമസ്ത പ്രപഞ്ചത്തിന്റെയും മാതാവായ മൂകാംബിക തന്റെ സന്താനങ്ങളുടെ നേര്ക്ക് കാരുണ്യമുള്ളവളാണെന്ന് ഈ നാമവും അടുത്ത നാമവും വിളംബരം ചെയ്യുന്നു.
419. കരുണാരസസാഗരാ – കരുണയാകുന്ന രസം നിറഞ്ഞ കടലായവള്. മുന്നാമത്തിന്റെ ആശയം ആവര്ത്തിക്കുന്നു.
… തുടരും
